Պաշտոնատար անձանց մասնակցությամբ տեղի ունեցած ենթադրյալ բռնության գործադրման դեպքի շուրջ նախապատրաստված նյութերը տեղափոխվել են գլխավոր դատախազության հատուկ քննչական բաժին
ՀԱՍԱՐԱԿՈՒԹՅՈՒՆԱրցախի Հանրապետության դատախազությունից հայտնում են. «Հաշվի առնելով ԱՀ դատախազության հանրային կապերի բաժնին ուղղված պարբերական հարցումները, իրազեկում ենք, որ 2022թ. նոյեմբերի 18-ին Ստեփանակերտ քաղաքի Փետրվարի 20-ի փողոցում ԱՀ Ազգային ժողովի պատգամավորների մասնակցությամբ տեղի ունեցած վիճաբանության և միմյանց նկատմամբ ենթադրաբար բռնություն գործադրելու դեպքի վերաբերյալ հաղորդումը նույն օրը գրանցվել է ԱՀ ոստիկանության Ստեփանակերտ քաղաքի վարչության հանցագործությունների, վարչական իրավախախտումների և պատահարների գրանցամատյանում և ընթացքավորվել ԱՀ քրեական դատավարության օրենսդրությամբ սահմանված ընթացակարգով:
Դեպքին մասնակից անձանցից վերցվել են բացատրություններ, նշանակվել են դատաբժշկական փորձաքննություններ: 24.11.2022թ. նախապատրաստված նյութերը ԱՀ ոստիկանությունից տեղափոխվել են ԱՀ գլխավոր դատախազության հատուկ քննչական բաժին՝ հետագա քրեադատավարական ստուգման համար:
Քրեական վարույթի հետագա ընթացքի ու արդյունքների վերաբերյալ կտրվի լրացուցիչ տեղեկություն»:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ԱՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: