Հիշողություններից՝ համակարգչային խաղեր. «Ծովամարտ». «Փաստ»

«Փաստ» օրաթերթը գրում է

Գաղտնիք չէ, որ համակարգչային խաղերի ու այլ գունագեղ խաղերի հավաքածուների հայտնվելով՝ թղթի վրայի կամ, այսպես կոչված, սեղանի խաղերը, ցավոք, մեծամասամբ մոռացվել են: Այսօր, հավանաբար, շատերը դեռ հիշում են, թե ինչպես են փորձել «Ծովամարտ» խաղալով անցկացնել ձանձրալի դասը կամ դասախոսությունը: Դա անելու համար պետք չէր համակարգիչ կամ պլանշետ, պարզապես պետք էր մի կտոր թուղթ և մատիտ: Բայց դրանով ժամանակն անհավատալիորեն արագ և հետաքրքիր էր անցնում, ընդ որում՝ ավելի լավ, քան շատ համակարգչային խաղեր խաղալիս: Ներկայումս ծնողները պետք է սովորեցնեն իրենց երեխաներին նաև նման խաղեր խաղալ: Դե, ցանկալի չէ դպրոցում կամ համալսարանում, բայց...

Նման խաղերը զարգացնում են տրամաբանորեն մտածելը, ուշադրությունը, բարելավում են հիշողությունը, համառություն և համբերություն ձեռք բերելու ունակություն ունեն: Խաղացողը սովորում է ռազմավարություն կազմել և կարևոր որոշումներ կայացնել: Նա նաև սկսում է հասկանալ, որ հնարավոր է հետաքրքիր ժամանակ անցկացնել համակարգչից հեռու: Ենթադրաբար, այս խաղի պատմությունը սկսվել է անցյալ դարի սկզբին խոշոր ռազմանավերի և նրանց վարած ծովամարտերի հայտնվելով: Որոշ մարդիկ ցանկություն են ունեցել վանդակում թղթի վրա վերարտադրել այդ բոլոր ծովամարտերը, մանավանդ որ այն ժամանակ դա հասանելի էր: Մեկ այլ վարկածի համաձայն, «Ծովամարտ» խաղը հորինվել է 1870-ականներին լեռնագնաց Պյոտր Կոնդրատևի կողմից, որը նման կերպ որոշել է հանգստացնել իրեն և իր ընկերներին ծանր, քրտնաջան աշխատանքից հետո:

Ըստ ամենայնի, խաղը դուր է եկել բոլորին, լայն տարածում ստացել բնակչության տարբեր շերտերի շրջանում և հաջողությամբ գոյատևել մինչև օրս: 1930-ականներին ԱՄՆ-ում Starex ընկերությունը արտադրել է հատուկ «Ծովամարտի» նոթատետրեր: 1960-ականներին Միլթոն Բրեդլիի ընկերությունն է թողարկել խաղի նոր տարբերակ՝ մարտական նավերով և պլաստիկ խաղատախտակով: 1982 թվականին «Ծովամարտը» ներկայացվել է փազլների տեսքով: Իսկ դրանից հետո հայտնվել է խաղի էլեկտրոնային տարբերակը: Այսօր այդ խաղը հասանելի է համացանցի տարբեր խաղային հարթակներում: Եվ, այնուամենայնիվ, լավագույնը հանդիսանում է դասական «Ծովամարտի» տարբերակը քառակուսի վանդակներով սովորական թղթի վրա:

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում