Վարդենիսում 15 ժամ է պահանջվել, որ հղիին Ախպրաձորից հիվանդանոց հասցնեն

NEWS.am-ը գրում է.

Գեղարքունիքի մարզի Ախպրաձոր գյուղի բնակչուհի, 37-38 շաբաթական հղիին հիվանդանոց տեղափոխելու համար Վարդենիսի բժշկական կենտրոնի «Շտապօգնության» անձնակազմից 15 ժամ է պահանջվել՝ դժվարանցանելի ճանապարհների պատճառով: «Շտապօգնության» բժիշկ Հայկ Թովմասյանը NEWS.am-ին պատմեց, որ կանչը ստացել են կեսօրին՝ ժամը 12:00-ին, գիշերը ժամը 3-ին հասել են հիվանդանոց:

«Հղին ծննդաբերական ցավեր չէր ունեցել, պարզապես հորեղբոր քեֆը լավ էր եղել, վախեցել էր, որ հանկարծ կծննդաբերի, իսկ ճանապարհները փակ են, զանգել էր միանգամից փրկարարական ծառայություն, որ գան հղիին տանեն հիվանդանոց: Իրենք էլ մեզ էին զանգել»,- պատմեց բժիշկը:

Բժիշկը պատմեց, որ գնացել են երկու փրկակարական, մեկ «Շտապօգնության» մեքենա, ճանապարհը բացելով մի կերպ մի քանի ժամում հասել են գյուղ:

«Բուք էր, ձյունը տեղ կար՝ մինչեւ մեկ մետր դրել էր: Ճանապարհը բացելով մի կերպ բարձրացանք  մինչեւ Լճավան գյուղ, դրանից հետո ամենագնացով՝ Ախպրաձոր, հղիին վերցրինք, գնացինք Վարդենիս գյուղ, որտեղ էլ էլի կանչ կար հիվանդի: Իրեն էլ ստուգեցինք, էդ տանը մարդիկ կային, որ պետք է քաղաք գնային, չէին կարողանում, քաղաք հասցրինք իրենց էլ ու գիշերը 3-ին հիվանդանոց հասանք»,- պատմեց բժիշկը:

Ախպրաձորից վերադառնալու ժամանակ ձյան պատճառով հնարավոր չի եղել տեղից շարժել «Շտապօգնության» եւ փրկարական մեքենաներից մեկը, դրանք թողել են ճանապարհին:

19-ամյա հղին այս պահին Վարդենիսի ծննդատանն է, մի քանի օրից, հավանաբար, կծննդաբերի: