Հայաստանում նշում են Սուրբծննդյան Ճրագալույցը. Պահքից դուրս ենք գալիս

New.am-ը գրում է.

Հայկական առաքելական եկեղեցին այսօր՝ հունվարի 5-ին, նշում է Սուրբծննդյան Ճրագալույցը: Բոլոր եկեղեցիներում սուրբ պատարագ են մատուցում: Այս երեկո մարդիկ եկեղեցիներից տանում են վառված ճրագներ ու մոմեր: Դրանք խորհրդանշում են աստվածային լույսը, եկեղեցու օրհնությունը: Լապտերները վառելը խորհրդանշում է Բեթղեհեմյան աստղի լույսը:

Քանի որ եկեղեցական օրը փոխվում է ժամը 17:00-ին` երեկոյան պատարագից հետո, ապա Սուրբ ծնունդն ու Աստվածհայտնությունը Հայաստանում սկսում են տոնել հունվարի 5-ի երեկոյան եւ շարունակում հունվարի 6-ին:

Արարատյան թեմից NEWS.am-ին հայտնում են, որ Հայ Եկեղեցին Հիսուս Քրիստոսի Ծննդյան օրն անփոփոխ նշում է հունվարի 6-ին: Տոնի նախապատրաստությունը սկսվում է դեկտեմբերի 29-ից` Սուրբ Ծննդյան պահքի Բարեկենդանով: Հաջորդ օրը` դեկտեմբերի 30-ին, սկսվում է Ս. Ծննդյան շաբաթապահքը` իր մեջ ընդգրկելով Նոր Տարվա տոնը: Պահքից դուրս ենք գալիս հունվարի 5-ին: Այդ օրը երեկոյան բոլոր եկեղեցիներում մատուցվում է Ճրագալույցի Ս.Պատարագ։

Ճրագալույցի Ս. Պատարագ տարին ընդամենը 2 անգամ է մատուցվում` Ս. Ծննդյան և Ս. Հարության տոների նախատոնակին: Ճրագալույց նշանակում է ճրագ՝ մոմ, վառել (լուցանել): Այդ օրը երեկոյան, մարդիկ եկեղեցում վառած ճրագներն իրենց հետ տուն են տանում: Այն խորհրդանշում է աստվածային լույս, եկեղեցու օրհնություն: Ճրագալույցը խորհրդանշում է նաև բեթղեհեմյան աստղի լույսը, որն առաջնորդեց մոգերին դեպի Հիսուս Մանուկը: