«Նոր Հայաստանի» ակտիվիստին ծեծի են ենթարկել

«Նոր Հայաստան» հանրային փրկության ճակատի «Ընդդիմության միասնական շտաբ»-ը հանդես է եկել հայտարարությամբ, որտեղ նշել է, որ անհայտ անձինք հարձակվել են «Նոր Հայաստան» ճակատի աջակից Սյուզի Գեւորգյանի վրա եւ ծեծի ենթարկել: 

«Այսօր՝ հունվարի 5-ին, ժամը 19-ի սահմաններում միջին տարիքի երկու ամրակազմ տղամարդիկ դարանակալելեն «Նոր Հայաստան» ճակատի աջակից, ռուսաստանաբնակ Սյուզի Գեւորգյանին, հետապնդել նրան, այնուհետեւ՝ վրա հասնելով գետին են տապալել եւ ոտքերով բազմաթիվ հարվածներ հասցրել գլխին, դեմքին ու մարմնի տարբեր մասերին՝ պատճառելով մարմնական վնասվածքներ: Երիտասարդ աղջնակի վրա հարձակվողները հեռացել են միայն այն ժամանակ, երբ նրա օգնության կանչերի վրա մարդիկ սկսել են մոտենալ: Հարվածներ հասցնելու ժամանակ հարձակվողներն ասել են, թե քեզ ասացինք, որ հեռու մնաս, ինչու չլսեցիր: Սյուզի Գեւորգյանն այն արտերկրաբնակ երիտասարդներից մեկն է, որ Հայաստան է ժամանել հանրաքվեի ընթացքում «Ոչ»-ին աջակցելու համար եւ շարունակում է պայքարը հանրաքվեի արդյունքների կեղծման դեմ»,-նշված է ընդդիմության միասնական շտաբի հայտարարության մեջ:

Հաղորդագրության մեջ հիշեցվում է նաեւ, որ Սյուզի Գեւորգյանի վրա 2015 թ. օգոստոսի 14-ին նույն սցենարով հարձակվել էին եւ ծեծել ու ահաբեկել՝ պահանջելով հեռու մնալ պայքարից: «Վերջին շրջանում նա մի քանի անգամ սպառնալիքներ է ստացել»:

Սպառնացողներն ասելեն, որ այս անգամ նախորդ անգամվա համեմատությամբ շատ ավելի խիստ են պատժելու նրան: Ըստ Սյուզի Գեւորգյանի՝ այսօր իր վրա հարձակվողներին նա հունվարի 1-ի եւ հունվարի 4-ի երեկոյան ժամերին նկատել է իր շենքի բակում:

Գագիկ Աղբալյան