Հաջողակ մաքսանենգներից շատ ավելի հաջողակ գործարարներ. «Փաստ»

«Փաստ» օրաթերթը գրում է

Ինչպիսի՞ն պետք է լինի իսկական վիսկին: Այցելեք Շոտլանդիայի կամ Իռլանդիայի ցանկացած թորման գործարան, և նրանք ձեզ կտան կատարյալ ըմպելիքի նկարագրությունը ու, միևնույն ժամանակ, կակնարկեն, որ հենց այդպիսի վիսկի են իրենք արտադրում։ Եվ Glen Grant թորման գործարանը բացառություն չէ: Ավելին, ընկերության կարգախոսն է «whisky as it should be»՝ «վիսկին այսպիսին պետք է լինի»։ Եվ, ինչպես շատ այլ նմանատիպ գործարանների պարագայում, նրանք ևս մասամբ իրավացի են: Գլեն Գրանտ վիսկու պատմությունը կապված է Գրանտ եղբայրների հետ, իրականում հենց նրանք են պատկերված այդ վիսկիի բոլոր պիտակների վրա։ Ավագ եղբայր Ջոնը ծնվել է 1797 թվականին, իսկ կրտսերը՝ Ջեյմսը, 1801 թվականին։ Ջեյմսը 1820 թվականին մասնակցել է Շոտլանդիայի վերջին Գելական ապստամբությանը, որից հետո հաստատվել է Էդինբուրգում։

Ջոնն այդ ժամանակ աշխատում էր ընտանեկան ֆերմայում, միաժամանակ ալկոհոլային խմիչքների մաքսանենգությամբ էր զբաղվում։ Բանն այն է, որ մինչև 1822 թվականը Շոտլանդիայում կար ալկոհոլի արտադրության լիցենզիա ունեցող ընդամենը ութ ձեռնարկություն։ Դա, իհարկե, չէր խանգարում հարյուրավոր փոքր տնային տնտեսությունների գոյությանը, որոնք արտադրում էին վիսկի փոքր քանակությամբ, բայց շատ բարձր որակով։ Հենց այդ վիսկին էլ մաքսանենգության բիզնեսի հիմքն էր։ Իսկ Ջոն Գրանտը շատ հաջողակ էր այս գործում։ 1822 թվականին իրավիճակը փոխվում է։ Լոնդոնում իշխանությունները որոշում են, որ ալկոհոլային արդյունաբերության օրինականացումը բրիտանական թագի համար միայն ձեռնտու կլինի: Լիցենզիա տրամադրելը հեշտացվում է, իսկ ալկոհոլի արտադրության ու վաճառքի հարկերը զգալիորեն կրճատվում են։

Արդեն 1824 թվականին Գրանտ եղբայրները 15 տարի ժամկետով վարձակալում են Աբերլոու քաղաքում գտնվող մի թորման գործարան: Վարձակալության ժամկետը լրանալուց հետո նրանք որոշում են սեփական արտադրությունը ստեղծել։ Այդ նպատակով էլ 1839 թվականին նրանք հող են ձեռք բերում հայտնի Սփեյ գետի հովտում, Ռոթս քաղաքի մոտ: Շինարարությունը տևում է մեկ տարի, և 1840 թվականին գործարանը տալիս է իր առաջին արտադրանքը։ Եղբայրները սկսում են շաբաթական 35 բարել վիսկի արտադրել։ Նրանք իրենց գործը շարունակում են մինչև 1872 թվականը, երբ վախճանվում է Ջեյմս Գրանտը, և նրա որդին՝ կրտսեր Ջեյմս Գրանտն է ստանձնում ընտանեկան բիզնեսի պատասխանատվությունը։ Նա էլ հետագայում դարձել է բրենդի ստեղծման պատմության գլխավոր դեմքերից մեկը։

Հենց նա է սկսել իր վիսկին արտահանել արտասահման, նա առաջինն էր տարածաշրջանում, ով էլեկտրաֆիկացրել էր արտադրությունը, նա նաև է դարձել տարածաշրջանում առաջին ավտոմեքենայի սեփականատերը։ Կրտսեր Ջեյմս Գրանտն է կառուցել նոր թորման գործարան, որը հագեցած էր իր կողմից ստեղծված թորման սարքերով, ինչը հնարավորություն էր տալիս արտադրել կատարյալ վիսկի։ Հենց նման քրտնաջան աշխատանքի շնորհիվ էլ Glen Grant վիսկին արագ տարածում է գտել ոչ միայն բուն Անգլիայում, այլ նաև ողջ Բրիտանական Կայսրությունում: Այդ տաղանդավոր ձեռնարկատիրոջ մահից հետո ժառանգ է դարձել Ջեյմսի թոռը՝ Դուգլաս Մաքեսսակը, ով չի կարողացել պահպանել ընտանեկան բիզնեսի կարգավիճակը։ Մի շարք գործարքների արդյունքում Glen Grant ապրանքանիշը դարձել է իտալական Campari Group-ի սեփականությունը: Այնուամենայնիվ այդ նոր սեփականատիրոջը հաջողվել է պահպանել այդ ըմպելիքի բոլոր հին առավելությունները։

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում