Հայտարարություն՝ «Նոր Զովք» ընկերությունում կատարված խուզարկությունների վերաբերյալ

2018 թվականի հեղափոխությունից հետո ձևավորված իշխանությունը հայտարարեց, որ վերացվելու են տնտեսական դաշտում առկա մրցակցային չարաշահումները, որ բոլորը ձեռք են բերելու հավասար պայմաններում բիզնես իրականացնելու իրական հնարավորություն, որի դրական արդյունքները «Նոր Զովք» ընկերությունն իրոք զգացել է իր գործունեության ընթացքում։

 

Դրա արդյունքում շահել են ոչ միայն տնտեսվարողները, այլ նաև՝ սպառողները, քանզի այդ նոր քաղաքականության ընթացքում մեր ընկերությունը հնարավորություն էր ստացել առավել նվազեցնել վաճառվող ապրանքների գները, ինչը սակայն լուրջ անհանգստություն էր պատճառում այլ շահագրգիռ մասնավոր սուբյեկտների։

Նրանց անհանգստությունն առավել բացահայտ դարձավ այն բանից հետո, երբ «Նոր Զովք» ընկերությունը Նոր Նորքի տարածքում նոր սուպերմարկետ հիմնեց, որից անմիջապես հետո բազմաթիվ տարօրինակ իրադարձություններ սկսեցին, որոնք ուղղված էին այդ սուպերմարկետի գործունեության խոչընդոտմանը՝ ընդհուպ դիմակավորված անձինք գիշերով կտրեցին սուպերմարկետի չիլերի խողովակը, որպեսզի դադարեցվի աշխատանքը։

 

Իհարկե, մենք հաջողությամբ վերացնում էինք այդ խոչընդոտները և վերականգնում ընկերության բնականոն գործունեությունը։

 

Սակայն, դրանից հետո, զարմանալի զուգադիպությամբ, 2023 թվականի փետրվարի 20-ին ՀՀ քննչական կոմիտեի քննիչներն օպերատիվ աշխատակիցների հետ միասին միաժամանակ խուզարկություններ սկսեցին «Նոր Զովք» ՍՊ ընկերությանը պատկանող թվով 29 սուպերմարկետներում, ինչպես նաև գրասենյակներում ու աշխատակիցների բնակարաններում։

 

Այդ փաստը որքան էլ անակնկալ էր և ոչ ցանկալի, սակայն մենք գիտակցում ենք, որ իրավապահ մարմինները կարող են տարբեր աղբյուրներից, այդ թվում՝ մեր ընկերության սուպերմարկետների հաջող գործունեությունից անհանգստացած, ինչ-որ շահագրգիռ անձանցից հատուկ ուղղորդված՝ սխալ, կեղծ և ոչ հավաստի տեղեկություններ ստանալ, որոնք ստուգելու կարիք լինի։

 

Հասկանում ենք նաև, որ ստուգման միջոց կարող են հանդիսանալ նաև խուզարկությունները, այդ թվում՝ ինչ-որ իրերի առգրավումները։

 

Նշված փաստը «Նոր Զովք» ընկերությանը չի անհանգստացնում, քանի որ իրավական պետությունում ոչ ոք, այդ թվում՝ մեր ընկերությունը չի կարող և չպետք է որևէ նման ստուգումներից անձեռնմխելիություն ունենալ։

 

Սակայն պետք է հատուկ արձանագրենք, որ մեր ընկերությանը և ընկերության ղեկավարությանը խիստ մտահոգում է այդ խուզարկությունների կատարման ձևը, որոնք դուրս են օրենքի շրջանակներից և այդ պարզ անօրինականությունները բազմաթիվ կասկածներ և չպարզաբանված հարցեր են առաջացնում։

 

Մասնավորապես,

 

1․ Խուզարկությունները կատարելուց առաջ իրավապահ մարմինները պահանջել են, որպեսզի անջատվեն սուպերմարկետների տարածքը տեսանկարահանող սարքերը։

Հարց- եթե իրավապահ մարմինները վստահ են, որ օրինական խուզարկություն են կատարելու, որ օրենքի խախտումներ թույլ չեն տալու, ապա ինչու՞ են նախապես անջատել տալիս տեսանկարահանող սարքերը, առավել ևս, եթե վերջում առգրավելու են նաև այդ տեսագրող սարքերի կրիչները։

 

2․ Խուզարկությունների արդյունքում ոչ միայն առգրավվել են ընկերության հաշվապահական փաստաթղթերը, համակարգիչները, այլև՝ ապրանքների վաճառքի համար պարտադիր դրամարկղային որոշ մեքենաներ ու ընկերության հաշվապահական հաշվառման վարումն ապահովող ծրագիրը (ՀԾ) պարունակող սերվերը, որի արդյունքում խաթարվել է Ընկերության բնականոն գործունեությունը։

 

Սերվերի առգրավման արդյունքում ընկերությունը զրկվել է՝

1. հաշվապահական հաշվառման վարելու,

2. մատակարարների հանդեպ պարտավորությունները մարելու,

3. ակտիվները հաշվառելու,

4. վարկային, հարկային և այլ պարտավորությունները մարելու նպատակով դրամական փոխանցումները կատարելու,

5. հարկման համար հիմք հանդիսացող հաշվարկ-հաշվետվությունները հարկային մարմնին ներկայացնելու,

6. ընկերության 29 խանութներում և պահեստներում ապրանքներ ստանալու,

7. շուրջ 1600 աշխատակիցների աշխատավարձերը հաշվարկելու և վճարելու,

8. այլ կենսականորեն կարևոր գործառույթներ իրականացնելու հնարավորությունից:

Հարց- եթե խուզարկության նպատակը բացառապես համապատասխան տվյալների ստուգումն ու հավաքագրումն է, ապա ինչու՞ են իրավապահ մարմինները առգրավել այդ ծրագիրը պարունակող սերվերը, այլ ոչ թե դրանում առկա տեղեկատվությունը, որի լիարժեք հնարավորությունն ունեցել են և որի արդյունքում Ընկերությանը չէր զրկվի իր ամենօրյա գործունեության պարտադիր մասը կազմող ծրագրին հասանելիությունից։

Ավելին, արդեն մի քանի օր է իրավապահ մարմիններին հասեցագրվող միջնորդություններով խնդրում ենք վերադարձնել այդ սերվերը կամ գոնե սերվերից պատճենահանված ծրագիրը, ինչը ևս մինչ օրս չի կատարվել։

 

Իհարկե, անհնար է պատկերացնել, որ իրավապահ մարմինները չեն գիտակցում, թե ինչ լուրջ խոչընդոտներ են ստեղծել մեր ընկերության համար և ինչ հսկայական նյութական վնասներ են պատճառում, որից ելնելով էլ կրկին անհասկանալի հարցեր են ծագում, թե ինչու՞ մեր ընկերության այդ հասարակ իրավունքները չեն պահպանվում և ի՞նչ իրական նպատակ է հետապնդում այդ ամենը։

 

Ակնկալում ենք, որ «Նոր Զովք» ընկերության վերաբերյալ իրականացվող քրեական վարույթը դուրս չի գա օրինականության շրջանակներից և այդ ընթացքում խստորեն կպահպանվեն շուրջ 1600 աշխատակից ունեցող տնտեսվարողի՝ օրենքով երաշխավորված իրավունքները։

 

Հակառակ իրավիճակը խիստ անբարենպաստ պայմաններ է առաջացնում «Նոր Զովք» ընկերության համար՝ մրցակիցների համեմատ։

 

#Զովքիհետ #Հայտարարություն