Ոչ միայն Հայաստանում, այլև եվրոպական տարածաշրջանում է գրանցվել գրիպի ակտիվացում. դասերը հետաձգվել են

Սուր շնչառական վարակներով հանրապետությունում գրանցվել է հոսպիտալացման 515 դեպք, որից 126-ը` թոքաբորբ: Ինչպես  տեղեկացրին ՀՀ առողջապահության նախարարությունից, ոչ միայն Հայաստանում, այլև եվրոպական տարածաշրջանում է գրանցվում գրիպի ակտիվացում: Դեպքերի շուրջ 75 տոկոսը Ա տեսակի գրիպն, է որի գե րակշռող մասը H1N1 ենթատեսակն է: Նախարար Արմեն Մուրադյանը վստահեցրել է, որ ժամանակին բժշկի դիմելու և ինքնաբուժմամբ չզբավելու դեպքում, հիվանդությունն ընթանում է որպես սովորական շնչառական վարակ:

Բժշկական կազմակերպություններում սահմանված է ամենօրյա հսկողություն և առողջապահական համակարգը տոնական օրերին աշխատել է արտակարգ ռեժիմով: Այս օրերին ծանրաբեռնված աշխատում է նաև շտապօգնության ծառայությունը, որը միայն Երևանում օրական կտրվածքով սպասարկում է շուրջ 900 կանչ:

Նախարարությունից վստահեցնում են, որ առողջապահական ցանցն ապահովված է անհրաժեշտ բոլոր դեղերով և բժշկական պարագաներով:

Հաշվի առնելով, որ հանրապետությունում սուր շնչառական վարակներով և թոքաբորբերով հիվանդների 80 տոկոսը 0-18 տարեկան երեխաներ են, ՀՀ առողջապահության նախարարությունը ձմեռային արձակուրդները երկարաձգելու առաջարկով դիմել է ՀՀ կրթության և գիտության նախարարություն:

ՀՀ կրթության և գիտության նախարար Արմեն Աշոտյանն իր ֆեյսբուքյան էջում գրառում է կատարել` տեղեկացնելով, որ, հիմք ընդունելով Հայաստանի Հանրապետության առողջապահության նախարարի միջնորդությունը, հանրակրթական, նախնական և միջին մասնագիտական ծրագրեր իրականացնող պետական ուսումնական հաստատություններում ուսումնական տարին շարունակվելու է 2016-ի հունվարի 18-ից։ Ուսումնական ծրագրի ամբողջական յուրացման նպատակով մինչ ուսումնական տարվա ավարտը կկազմակերպվեն լրացուցիչ դասընթացներ։