Պետք լինի՝ օրումեջ ընտրություն կանեն, մինչև որ ՔՊ-ն հաղթի. «Փաստ»

ՔԱՂԱՔԱԿԱՆ 28 Մարտ, 2023 8:34

«Փաստ» օրաթերթը գրում է

Եվ այսպես, Սիսիան և Անի խոշորացված համայնքներում մարտի 26-ին նշանակված ՏԻՄ արտահերթ ընտրություններում, ըստ պաշտոնական արդյունքների, հաղթել է Նիկոլ Փաշինյանը, ի դեմս իր գլխավորած ՔՊի: Շատերը միանգամից նետվեցին մեկնաբանելու այս տեղեկությունը, ամենատարբեր հուզական շեղումներով ու տարակերպ վիրավորական բնորոշումներով: Ու, կարծես «կախարդական փայտիկի» շարժմամբ, գրեթե նույն «շատերը» մոռացության մատնեցին քաղաքական ենթատեքստը, որի պայմաններում տեղի ունեցան այդ արտահերթ, եթե կարելի է ասել՝ ընտրությունները: Բայց հիմնական դիտարկումները՝ հերթով:

Ամենից առաջ պետք է արձանագրել, որ բուն արտահերթ ընտրությունների ամբողջ օրվա ընթացքում այդ իրադարձությանը հետևող ԶԼՄ-ների էջերն ուղղակի հեղեղված էին ամենատարբեր ընտրախախտումների մասին աղաղակող հրապարակումներով: Խախտումներ, որոնք վերաբերում էին ընտրացուցակներին, դրանք նկարելուն ու «զեկուցելուն», թաղային հեղինակություններին, «տասովչիկներին», գովազդային պաստառներին, քվեարկության ընթացքում ինչ-ինչ միջամտություններին, վարչական ռեսուրսների խայտառակ կիրառմանն ու շահագործմանը, հասկանալի է՝ հօգուտ փաշինյանական ՔՊ-ի և այլն, և այլն:

Հատկանշական է, որ նույնիսկ Դանիել Իոաննիսյանի ներկայացրած «Անկախ դիտորդը» մի ամբողջ շարք խախտումներ էր արձանագրել և հրապարակել: Դե, ինչպես ասում են, եթե անգամ «թավիշի» ակնհայտ շահառուներից Դանիել Իոաննիսյանն է ընտրախախտումների մասին բարձրաձայնում, ապա հաշիվներդ վերցրեք, թե իրականում ինչպիսի խայտառակ պատկեր է եղել: Չնայած նշված արտահերթ ընտրությունների «հյուսիսկորեական» երանգներին, Նիկոլ Փաշինյանը, սանմաքրման աշխատակից ձևանալուց ազատ ժամանակ, մի քանի տողով անդրադարձավ յուրայինների գրանցած «փառահեղ» արդյունքներին:

Ներողություն խնդրելով ընթերցողներից՝ չզլանանք ու նրա գրառումն այստեղ մեջբերենք ամբողջությամբ. «Սիսիան եւ Անի խոշորացված համայնքների ընտրողների վստահությունը պարտավորեցնող է և սիրելի: Ծառայում ենք Հայաստանի Հանրապետությանը և Կա՜ Ապագա»: Մի կողմ դնենք նախկին լրագրողի երեք տողանոց գրառման մեջ տեղ գտած կետադրական և այլ կոպիտ սխալները: Ավելի կարևոր է նկատել հետևյալը…

Ամենից առաջ՝ Սիսիան և Անի խոշորացված համայնքներում տեղական ինքնակառավարման մարմինների այս արտահերթ ընտրություններին մասնակցել է գրանցված ընտրողների հազիվ կեսից ավելին: Սիսիանում, ի դեպ, կեսից էլ քիչ: Այսինքն, «ընտրողների վստահության» մասին Փաշինյանի նշումը, սիրելի լինի-չլինի, առնվազն փուչիկ է՝ ուռճացված: Կարող է խոսք լինել «քվեարկության մասնակիցների» վստահության մասին: Այն էլ նկատենք, որ ՏԻՄ ընտրություններում սովորաբար մասնակցությունն ավելի ակտիվ էր լինում: Երկրորդը՝ Սիսիանում և Անիում մարտի 26-ին ՏԻՄ արտահերթ ընտրություններ տեղի ունեցան այն պարզ պատճառով, որ կես տարի առաջ նույն համայնքներում նույն Փաշինյանի ՔՊ-ն պարտվել էր:

Բայց այդ ընթացքում կարողացան այնպես անել, որ տվյալ համայնքներում «նոր» կամ արտահերթ ընտրություններ անցկացվեն: Ամեն դեպքում, Սիսիանում և Անիում ոչ նիկոլականները կարող են համարել, որ «էժան պրծան», քանի որ այն համայնքներում, որտեղ Նիկոլ Փաշինյանը պարտվել է, անհապաղ կալանավորել է տվել հաղթող կուսակցությունները ներկայացնող համայնքապետի թեկնածուներին: Կարճ ասած, Սիսիանի ու Անիի դեպքում Նիկոլ Փաշինյանը գործել է «օրումեջ ընտրում ենք ՏԻՄ, մինչև որ ՔՊ-ն հաղթի» մարտավարությամբ: Դե, ինչո՞ւ միայն այս համայնքներում, էլի օրինակներ կան: Ու ոչ քիչ:

Պետք լինի, մի 1000 անգամ նոր ընտրություն կնշանակեն, մինչև բոլորի զահլեն գնա, իսկ ճամփեզրից քպացված որևէ տեղացի անցորդ նշանակվի համայնքապետ: Դե, իսկ հիմա եկեք պատկերացնենք, թե անցյալ տարվա սեպտեմբերից մինչև այս տարվա մարտի 26-ը Սիսիանում և Անիում ինչերով է զբաղվել կամ ինչերով կարող էր զբաղվել Նիկոլ Փաշինյանի իշխանությունը: Ամենից անմեղ բանը, ինչը հնարավոր է ենթադրել, վարչական ազդեցության լծակների լայնածավալ կիրառումն է: Երրորդ՝ «ծառայության» մասին: Նիկոլ Փաշինյանը հայտարարում է, թե՝ «ծառայում ենք ՀՀ-ին»:

Թե ինչպես են Նիկոլ Փաշինյանն ու նրա կուսակիցները, իշխանական տարբեր աթոռներին բազմած, «ծառայում Հայաստանի Հանրապետությանը», ակնհայտ է: Ակնհայտ է էլիտար շենքերում նրանց ձեռք բերած թանկարժեք բնակարանների փաստերից, ակնհայտ է նրանց ձեռք բերած շքեղ մեքենաներից, ակնհայտ է նրանց «բրենդային» հագուկապից, պլպլան դարձած թշերից, ինչպես նաև արդեն իրենց իսկ այլ «ծառայակիցների» կոռուպցիոն մեղադրանքներով կալանավորելուց: Նման «ծառաներ» ունեցող ժողովրդին անգամ թշնամիներ պետք չեն:

«Ծառաներն» այն օրը կգցեն, որ «ծառայատերերը» «հացին կակա կասեն»: Ապագայի մասին, որն, ըստ Փաշինյանի, դեռ՝ կա՛, այն էլ՝ մեծատառով Կա՛: Մարտի 26-ին ընտրությունների ալիքը Իշխանասար գյուղն էլ էր ընդգրկել: Գյուղում ամենից շատ քվե, ըստ հրապարակված արդյունքների, ստացել է Փաշինյանի ՔՊ-ն: Իշխանասար գյուղի բնակիչները անիծված «նախկինում», ասենք՝ մի 20 տարի առաջ, անարգել գնում էին մերձակա սարերը, իրենց կենդանիներին արոտներ էին տանում՝ առանց կես գրամ անհանգստության, թե ինչ-որ մեկը կարող էր իրենց վրա կրակ բացել, հովվին առևանգել կամ նման մեկ այլ բան:

Հիմա, իհարկե, Իշխանասարում շատ ավելի գոհ ու երջանիկ են, քանի որ Նիկոլ Փաշինյանի կառավարման 4-5 տարվա ընթացքում ու այդ կառավարման շնորհիվ վերջապես չեն կարող ազատ շրջել մոտակա սարերի լանջերին, չեն կարող իրենց նախիրն ու հոտը անվտանգ տանել արոտ, անգամ դաշտից իրենց գյուղտեխնիկան չեն կարող տեղաշարժել: Ու դա Իշխանասարում շատ բարձր են գնահատում, դրա համար էլ… Փաշինյանի ՔՊ-ին են «ձայն տալիս»: Հա, իսկ չեն կարող, որովհետև Նիկոլ Փաշինյանի «ապագան» թշնամական զորքի ու թշնամու տեսքով եկել ու թառել է Իշխանասար գյուղի մերձակա բարձունքներին, ու մեկ-մեկ էլ կրակում է...