Ամանորին երազանքն էլ եմ պահել, Աստծուն էլ եմ խնդրել, որ իմ ընկերները բարով ծառայեն, հասնեն իրենց տանեցիներին. Արցախում վիրավորված զինծառայող

Shabat.am-ը գրում է.

Սեպտեմբերի 25-ին Արցախում հակառակորդի հրետակոծության հետևանքով բեկորային վիրավորումներ ստացած զինծառայողներից Վանիկ Մարտիրոսյանը դեկտեմբերին դուրս է գրվել զինվորական հոսպիտալից, հիմա նրա վիճակը նորմալ է:

«Հիմա խնդիր չկա, նորմալ է, էն ժամանակ ընդհանրապես լավ չեմ եղել, էնպես էր, որ հույս էլ չեն տվել մերոնց, բայց հիմա ամեն ինչ նորմալ է, իր հունով գնում է»,-Shabat.am-ի հետ զրույցում ասաց Վանիկ Մարտիրոսյանը:

Նախկին զինծառայողը դեռևս չի որոշել ինչով է զբաղվելու հետագայում, ասում է կսպասի մինչև ընտելանա ոտքի պրոտեզավորմանը:

Վանիկն անդրադարձավ նաև Ամանորին և իր երազանքին. «Ամանորին երազանքն էլ եմ պահել, Աստծուն էլ եմ խնդրել, որ իմ ընկերները բարով ծառայեն, հասնեն իրենց տանեցիներին»:

Նա նաև վերհիշեց հոսպիտալում անցկացրած օրերը ու անդրադառնալով իր ու ընկերների հետ տեղի ունեցածին, բավականին հանգիստ ասաց. «Ծառայություն է, քո պարտքը տալիս ես, գնում, վիրավորվել ենք, ոչինչ…Հոսպիտալում բոլորը կողքիս էին, բժիշկները, բոլորը, ամեն ինչ ինձ համար արել են, շնորհակալ եմ իրենցից»:

Ողջ զրույցի ընթացքում, Վանիկը շեշտում էր իր զինակից ընկերների կարևորության ու նշանակության մասին ու իր բարեմաղթանքն էլ ուղղեց նրանց:

«Մեր զինվորներին առողջություն, բարի ծառայություն, գան հասնեն իրենց ծնողներին: Չեմ էլ կարողանում ասել, իմ կողքին զինվոր ընկեր է կորել, ամեն խոսելուց հիշում եմ իրեն»,-ասաց նա:

Հիշեցնենք, որ 2015թ. սեպտեմբերի 25-ին հակառակորդի  հրետակոծության հետևանքով զոհվել է 4 զինծառայող՝ Նորայր Միքայելի Խաչատրյանը (ծնված 1995թ.), Ռոբերտ Սուրենի Մկրտչյանը (ծնված 1995թ.), Հարութ Մաքսիմի Հակոբյանը (ծնված 1997թ.)  և  Կարեն Գեւորգի Շահինյանը  (ծնված 1997թ.):

Հրետակոծության հետևանքով վիրավորվել է 16 զինծառայող: Հիշեցնենք, որ Վանիկ Մարտիրոսյանը, ով բեկորային վնասվածք էր ստացել ոտքի շրջանում, այնուհետև վիրավատվել զինվորական հոսպիտալում: