«Սերժ Սարգսյանն, այնուամենայնիվ, ճիշտ էր, որ ինքը սխալ է, բայց սխալ էր, որ Նիկոլը ճիշտ է». Մանե Թանդիլյան

Ապրիլի 22-ին տեղի ունեցավ «Ապրելու երկիր» կուսակցության համագումարը, որի ժամանակ 335 կողմ, 2 դեմ և 15 անվավեր ձայներով հավանության արժանացավ կուսակցության քաղաքական խորհրդի կազմը: Վերահսկիչ հանձնաժողովի կազմը հաստատվեց հետևյալ ձայներով` 343 կողմ, 5 անվավեր և 4 դեմ: Կուսակցության նախագահ ընտրվեց Մանե Թանդիլյանը` 346 կողմ, 5 դեմ և 1 անվավեր ձայներով:

«Ապրիլի երկիր» կուսակցության նախագահ Մանե Թանդիլյանը համագումարի իր ելույթում հիշեցրեց, որ այն ընթանում է մեր երկրի համար դժնդակ պայմաններում: «Մեր հայրենիքի մի մասը` Արցախը, գտնվում է շրջափակման մեջ և էթնիկ զտման վտանգի առջև, իսկ Հայաստանը` անհագուրդ թշնամու նշանառության տակ: Երկրի անկայուն անվտանգային համակարգը խոցելի և անպաշտպան է դարձրել ՀՀ քաղաքացիներին: Իշխանությունների անհեռատեսության և անգործության հետևանքով, երբ երկրի առնվազն 150 քմ կմ տարածքը գտնվում է թշնամու օկուպացիայի ներքո, ու շարունակում են անհեթեթ հանգամանքներում զոհվել հայորդիները, օրվա իշխանությունները զբաղված են իրենց գահավիժող վարկանիշը փրկելու փորձերով, սակայն ո՛չ կակաչները, ո՛չ սակուրաները այլևս չեն օգնելու: Հայ ժողովուրդը գտնելու է լուծումներ այս իրավիճակից, որովհետև մեզ բնութագրում են ոչ թե մեր խնդիրները, այլ դրանց լուծումները, իսկ մենք խելացի և ունակ ժողովուրդ ենք: Ունակ ենք լուծել դարերի խորքից մեզ հետապնդող բազում խնդիրներ, խոչընդոտներ հաղթահարել: Ու այսօր էլ ենք լուծելու: Վերականգնելու ենք այն ամենակարևորը, որն ընկած է առաջ գնալու կարողության հիմքում` հույսը: Վերականգնելու ենք հայ ժողովրդի կորցրած հույսը, որ ունակ ենք պետություն կառուցելու, ունակ ենք զարգացած և խելացի երկիր լինելու, ունակ ենք այս բարդ տարածաշրջանում, որտեղ գտնվում է մեր հայրենիքը, տեր կանգնելու իրեն»,-ասում է Թանդիլյանը:

Ընդգծում է` կուսակցության հիմնադիր համաժողովի ժամանակ խոսել է այն մասին, որ նախատեսում են որակապես նոր մակարդակի վրա դնել ինչպես քաղաքական, այնպես էլ հանրային քննարկումը, մերժելով ատելության խոսքը, հայհոյախառն հռետորաբանությունը, անհիմն քննադատությունն ու զրպարտանքը, պոպուլիզմը: «Դա արել ենք մեր օրինակով, մեր խոսույթով, մեր քաղաքական վարքագծով: Համոզմունք  եմ հայտնել, որ մեր ազնվությունը, նվիրումը և աշխատասիրությունը կվայելի հասարակության վստահությունը, և կստանձնենք ավելի մեծ պատասխանատվություն ապրելու երկիր կառուցելու գործում: Դա արել ենք: Հայաստանի 18 համայնքներում ներկայացված ենք ավագանիներում, որոնցից երեքում ստանձնել ենք կառավարման պատասխանատվություն: Կուսակցությունն ամենայն պատասխանատվությամբ, արդյունավետությամբ և հետևողականորեն իրականացնում է իր որդեգրած մարտավարությունը` ընտրությունների միջոցով հնարավորինս անցնցում երկրում իրականացնել իշխանափոխություն»,-ընդգծում է կուսակցության նախագահը:

Թանդիլյանի խոսքով` այժմ հասել են կուսակցության որդեգրած մարտավարության հաջորդ հանգրվանին` Երևանի ավագանու ընտրություններին, որն առաջիկա ամենակարևոր քաղաքական իրադարձությունն է, որին պատրաստվում է կուսակցությունը: «Անհնարին է գերագնահատել Երևանի ավագանու ընտրությունների քաղաքական ազդեցության աստիճանը և ուրախ եմ ազդարարել, որ «Ապրելու երկիր» կուսակցությունը որոշում ունի մասնակցել և հաղթել ավագանու ընտրություններում: Երևանի ընտրություններն ակնհայտորեն ունենալու են քաղաքական ազդեցություն երկրի հետագա քաղաքական իրավիճակի վրա: Մեզ համար ակնհայտ է, որ Երևանն առաջնորդելու է երկրում քաղաքական փոփոխությունների գործընթացը և նաև Երևանում ենք իշխանազրկելու «Քաղաքացիական պայմանագիր» կուսակցությանը, ճիշտ այնպես, ինչպես դա արել ենք Ալավերդի, Նոյեմբերյան, Տաթև համայնքներում: Քաղաքամայր Երևանի, երևանցիների պատասխանատվությունը ամբողջական իշխանափոխության գործում շատ էական և վճռորոշ է լինելու: Թքած ունենալու նուրբ արվեստը որպես արժեհամակարգ կրող և թքելը քաղաքական հպարտության առարկա ներմուծողները պիտի հասկանան, որ խայտառակում են մեր պետությունը, խայտառակում են մեզ: Հույս ունե՞մ, որ կհասկանան: Ամենևին: Իմ հույսը իրենք չեն, իմ հույսը մեր ժողովուրդն է, ով իշխանազրկելու է թքողներին մի կողմից, մյուս կողմից քաղաքական ապտակ է հասցնելու նրանց Երևանում: Եթե Երևանը դա չանի, այս այլասերումը չի դադարելու, հասնելու է կատարելության և իշխանությունների սիրած աննախադեպության, որովհետև նրանք մեկնաբանելու են այսպես` ժողովուրդը մեզ մանդատ է տվել դրանից հետո, ուրեմն սա հանգիստ և անամոթաբար թքելու մանդատ է: Երևանի ընտրողը դա թույլ չի տալու: Պատկերավոր ասած` մայրական ապտակ է հասցնելու նաև դաստիարակչական բացերը լրացնելու համար: Առաջարկում եմ երևանցիներին Երևանի ավագանու առաջիկա ընտրությունները վերածել իշխանության անվստահության հանրաքվեի, ընդ որում` սա ամենևին չի նշանակում աչքաթող անել Երևանի զարգացման տեսլականը, որը կարճ ժամանակ անց ներկայացնելու ենք Երևանի բնակիչներին»,-շեշտում է նա:

Կուսակցության նախագահի խոսքով, Երևանը պետք է նաև արժանավույնս արձագանքի իշխանությունների` Երևանում իշխանությունը զավթելու փորձին: «Մինչև ապրիլի 25-ը գործող ավագանին պարտավոր է իր կազմից ընտրել Երևանի քաղաքապետ` համաձայն օրենսդրության: Սակայն երևանցու քվեի հետ կապ չունեցող, չընտրված, բայց դե ֆակտո քաղաքապետ Տիգրան Ավինյանի Հանրայինի եթերով հնչեցրած խոսքից պարզ է դառնում, որ այդպիսի մտադրություն չունեն: Մարդ, ով նախաձեռնել է Երևանի էկոցիդը, մտածում է, որ ինքն է դա որոշում, թե երբ կլինեն ընտրությունները: Իսկ ինչո՞ւ մտադիր չեն անելու: Որովհետև գործող իշխանությունը պարզապես վախենում է արտահերթ ընտրություն անցկացնելուց, քանի որ համոզված է` օրինական եղանակով անհնարին է իրենց վերարտադրությունը: Սակայն, եթե մինչև ապրիլի 25-ը չընտրվեց նոր քաղաքապետ, Երևանի ավագանին պետք է լուծարվի օրենքով սահմնաված կարգով, կառավարության որոշմամբ: Եթե կառավարությունը, ինչպես բոլոր հարցերում, այնպես էլ այս հարցում, մատնվի անգործության, կհանդիպենք դատարանում»,-ասում է Թանդիլյանը:

Անդրադառնալով այս օրերին իշխանությունների կողմից, ինչպես Թանդիլյանը որակեց,  «շարունակաբար հնչող անհեթեթ մտքերի, ստերի շարանին»՝ կուսակցության նախագահը նշեց. «Մի քանի տարի շարունակ ձախողվող գործունեության անփառունակ հետևանքները, ձախողված արտաքին ու անվտանգային և ներքին քաղաքականությունը ստիպում են արձանագրել մեզ, որ Սերժ Սարգսյանն, այնուամենայնիվ, ճիշտ էր, որ ինքը սխալ է, բայց սխալ էր, որ Նիկոլը ճիշտ է»,-եզրափակեց Մանե Թանդիլյանը:

Լուսինե Առաքելյան