«Մինչև պարտության սիմվոլները երկրի ղեկից չհեռանան, մենք, պարտությունը պարտության հետևից գրանցելով, անդունդն ենք գլորվելու»․ «Փաստ»

«Փաստ» օրաթերթը գրում է

Ադրբեջանի կողմից անցակետի տեղադրումը ոչ թե Ադրբեջանի հերթական սադրանքը, այլ Նիկոլ Փաշինյանի հրավերն է: «Փաստի» հետ զրույցում, անդրադառնալով Ադրբեջանի կողմից Բերձորի միջանցքի սկզբնամասում հսկիչ-անցագրային կետ տեղադրելուն, նշել է ԱՀ ԱԺ «Արդարություն» խմբակցության ղեկավար Դավիթ Գալստյանը:

«Պետք է ուշադրություն դարձնել ժամանակագրությանը, այսինքն՝ թե Փաշինյանի որ հայտարարություններին հաջորդեց Ադրբեջանի այս քայլը: Ադրբեջանն անցակետ տեղադրեց Նիկոլ Փաշինյանի՝ ԱԺ-ում արված այն ելույթներից հետո, որոնցով նա հրաժարվեց Արցախի սուբյեկտայնությունից, ինքնորոշման իրավունքից: Ադրբեջանն էլ իր հերթական քայլն արեց, որը համահունչ է Փաշինյանի հայտարարություններին: Ի՞նչ է ասում Փաշինյանը: Այն դեպքում, երբ Ադրբեջանն իրեն չի հռչակել Խորհրդային Միության իրավահաջորդ, Նիկոլ Փաշինյանը Հայաստանի Հանրապետության ամենաբարձր ամբիոնից հնչեցնում է հայտարարություն այն մասին, որ պատրաստ է Խորհրդային Միության տարածքներով ճանաչել Ադրբեջանի տարածքային ամբողջականությունը: Սա, իհարկե, ոչ այլ ինչ էր, քան հրավեր: Փաստորեն ասաց՝ «եկեք մեր սահման, մեր սահմանը ֆիքսենք», ու Ադրբեջանն էլ հրավերը ընդունեց և եկավ»,-ասաց Դ. Գալստյանը:

Միևնույն ժամանակ, նա հիշեցրեց այլ իրողության մասին. «Նիկոլ Փաշինյանը և իր խունտան ժամանակ առ ժամանակ, պատեհ-անպատեհ առիթներով հոխորտանքներ են հնչեցնում այն մասին, թե Արցախի անունից չեն կարող խոսել: Մինչդեռ նա իր ձեռքով է ստորագրել 2020-ի նոյեմբերի 9-ի փաստաթուղթը, որով նա լիիրավ կողմ է, իսկ Արցախը՝ շահառու: Եթե ինքն է ստորագրել այդ կետերի տակ ու չի կարողանում տեր կանգնել իր կողմից ստորագրված փաստաթղթին, ապա ինքն իրեն չի հարգում»:

Դավիթ Գալստյանը նշեց, որ այս համատեքստում Ադրբեջանի վարքագիծը սպասելի է: «Ադրբեջանն առավելապաշտ քաղաքականություն է վարում ու ցանկացած առիթ բաց չի թողնելու: Մինչդեռ մեզ համար ցավալի ու անհասկանալի է Հայաստանի իշխանությունների անտրամաբանական ու ոչ հայանպաստ քաղաքականությունը, ինչի մասին մենք Արցախից ժամանակ առ ժամանակ հնչեցնում ենք: Զուգահեռ՝ Նիկոլ Փաշինյանը պատվեր կատարող պատգամավորների բերաններով, որոնք պատրաստ են բարեկեցության համար հայրենիք վաճառել, հոխորտանքներ է հնչեցնում Արցախից հնչեցվող կարծիքների մասին»,-ասաց նա:

Անդրադառնալով Փաշինյանի՝ օրերս արված այն հայտարարությանը, թե Արցախի Ազգային ժողովն իր հայտարարությունները սխալ է հասկանում, Դավիթ Գալստյանն արձագանքեց. «Ոչ թե մենք ենք սխալ հասկացել, այլ Նիկոլ Փաշինյանն է հայ ազգի սխալը: Նա ամբողջ ազգի սխալն է, որը պարբերաբար նաև սխալ հայտարարություններ ու արտահայտություններ է անում: Մինչև Ազգային ժողովում արված վերջին՝ ապրիլի 18-ի հայտարարությունը, նա խոսում էր այն մասին, որ դեռ պետք է որոշեն, թե ինչ քարտեզներով պետք է տարածքային ամբողջականությունը ճանաչվի: Այդ ժամանակ վերոնշյալ անցակետի մասին խոսք չկար:

Երբ հստակեցրեց, թե ինչ քարտեզներով է պատրաստ ճանաչել սահմանները, տեսանք այն, ինչ տեսանք: Ըստ Նիկոլ Փաշինյանի, փաստորեն, մենք ճիշտ չենք հասկացել, իսկ Ադրբեջանը ճիշտ է հասկացել ու ֆիքսել սահմանը: Հիմա ամբողջ ազգը Փաշինյանին ճիշտ չի հասկացել, բայց նա, փաստորեն, ինքն իրեն հակասող պարբերական բնույթ կրող հայտարարություններով Ադրբեջանի ջրաղացին ջուր է լցնում: Նրանք համահունչ են գործում: Մեծ հաշվով՝ Նիկոլ Փաշինյան-Իլհամ Ալիև բանավոր պայմանավորվածությունների պտուղներն ենք քաղում»:

Շեշտելով, որ ՀՀ իշխանությունը շարունակում է պատասխանատվության իր բաժինը բարդել բոլորի վրա՝ բացի իրենից, Դ. Գալստյանը հավելեց. «Նիկոլ Փաշինյանը և իր ընտանիքի անդամները պատերազմի ամբողջ պատասխանատվությունն ու մեղքը բարդում են ամբողջ ազգի վրա վրա: Նրանք պատասխանտվություն չկրեցին այս կոտորածի համար: Բոլոր հարցերում, բացի իրենից, բոլորին մեղավորներ և պատասխանատուներ նշանակելը Փաշինյանի ձեռագիրն է, քանի որ չի կարող կանգնել ու ասել՝ այո, ես պարտված իշխանություն եմ: Սա փաստ է, որը չարձանագրելու փոխարեն նա մեղքի բաժինը պետք է գցի ժողովրդի վրա՝ հայտարարելով, թե դասալիքներն են պարտվել, բանակն է պարտվել, դավաճանություն է եղել:

Այսպիսի մանիպուլ յացիաներով պարզապես փորձում է երկարաձգել իշխանությունը: Հաշվի առնելով այս ամենը՝ ստեղծված իրավիճակից դուրս գալու առումով ես որևէ ակնկալիք չունեմ այս իշխանությունից: Միջազգային կառույցներից ևս ոչ մի լուրջ ակնկալիք չունեմ: Իմ ակնկալիքները միայն հայ ժողովրդից են, որը մի օր ոտքի կկանգնի, պարտության զինանշան դարձած իշխանություններին կվռնդի, ինչի արդյունքում ոչ թե թուրք-ադրբեջանական, այլ հայ ազգի շահերը սպասարկող իշխանություն կունենանք»: Դավիթ Գալստյանը, սակայն, նշեց, որ մենք շատ ժամանակ չունենք:

«Ցավոք, ժամանակը մեր դեմ է աշխատում, բայց, համենայն դեպս, իմ խորին համոզմամբ, մինչև պարտության սիմվոլները երկրի ղեկից չհեռանան, մենք պարտությունը պարտության հետևից գրանցելով՝ անդունդն ենք գլորվելու»,-եզրափակեց Գալստյանը:

ԱՆՆԱ ԲԱԴԱԼՅԱՆ

Մանրամասները՝ «Փաստ» օրաթերթի այսօրվա համարում