«ԵՄ առաքելությունը Հայաստանում, ամենայն հավանականությամբ, չի արդարացրել իրեն»․ «Փաստ»

«Փաստ» օրաթերթը գրում է

news.ru–ն «ՌԴ Դաշնային խորհրդում գովել են Փաշինյանին, որը համաձայնել է հանդիպել Ալիևի հետ Մոսկվայում» վերնագրով հոդվածում գրում է, որ Դաշնային խորհրդի միջազգային հարցերով կոմիտեի նախագահի առաջին տեղակալ Վլադիմիր Ջաբարովը NEWS.ru-ի հետ զրույցում բարձր է գնահատել մայիսի 25-ին Մոսկվայում Ադրբեջանի նախագահ Իլհամ Ալիևի հետ հանդիպելու Նիկոլ Փաշինյանի որոշումը։ Սենատորի խոսքով, այդ քայլը ցույց է տալիս, որ ԵՄ առաքելությունը Հայաստանում, ամենայն հավանականությամբ, իրեն չի արդարացրել։

«Լավ է, որ Հայաստանի ղեկավարությունը հասկանում է, որ առանց Ռուսաստանի միջնորդության Ադրբեջանի և Հայաստանի հարաբերությունների կարգավորման հարցը դժվար թե լուծվի։ Սա խոսում է այն մասին, որ ԵՄ առաքելությունը Հայաստանում, ամենայն հավանականությամբ, չի արդարացրել իրեն»,- ասել է Ջաբարովը։ Նա հավելել է, որ Մոսկվան հասկանում է, որ նախորդ՝ բրյուսել յան հանդիպմանը Հայաստանին «շատ բան են խոստացել», այդ թվում՝ Ֆրանսիայից։ Ջաբարովն ընդգծել է, որ «տարածաշրջանում խաղաղության պահպանման հարցում Ռուսաստանը որոշակի պատասխանատվություն է կրում, կարելի է ասել՝ զգալի պատասխանատվություն»։

«Ուստի հիանալի է, որ Մոսկվայում եռակողմ հանդիպում է լինելու։ Եվ դա խորհրդանշական է: Իսկ այն, թե ինչ կլինի այնտեղ, միայն պետությունների ղեկավարները գիտեն»,- ընդգծել է սենատորը։ Ավելի վաղ Փաշինյանը հայտնել էր, որ մայիսի 25-ին Մոսկվայում տեղի կունենա Հայաստանի, Ռուսաստանի և Ադրբեջանի ղեկավարների եռակողմ հանդիպումը։ Նա մանրամասնել է, որ ռուսական կողմից համապատասխան առաջարկ է ստացվել, և Երևանն այն ընդունել է։

Մանրամասները՝ «Փաստ» օրաթերթի այսօրվա համարում