Կարող, պրոֆեսիոնալ թիմով ուժ են մարդիկ փնտրում, և «Ապրելու երկիր» կուսակցությունն էլ իր հիմնադրման օրվանից աշխատում է մարդկանց հենց այդ պահանջմունքը բավարարել․ Անդրանիկ Ամիրջանյան

 

«Մեզ համար շատ կարևոր է Երևանի զարգացումն ու ուրույն դիմագծի ապահովումը։ Երևանը պետք է դառնա համայն հայության մայրաքաղաքը, մենք դա պետք է անենք»։ Այս մասին Past.am-ի հետ զրույցում ասաց «Ապրելու երկիր» կուսակցության քաղաքական խորհրդի անդամ Անդրանիկ Ամիրջանյանը։

Հիշեցնենք, որ «Ապրելու երկիր» կուսակցությունը բացմիցս է հայտարարել, որ մասնակցելու է Երևանի ավագանու  ընտրություններին։ Քաղաքական ուժի ներկայացրած հայտը բավականին լուրջ է, հայտարարում են, որ մասնակցում են՝ հաղթելու նպատակով։ Կուսակցության նախագահ Մանե Թանդիլյանն էլ առաջարկել է երևանցիներին՝ Երևանի ավագանու ընտրությունները  վերածել իշխանության անվստահության հանրաքվեի։

Ամիրջանյանը նշում է՝ իշխանությունները ձախողել են, նաև Երևանի կառավարումը․ ամեն տարի նույն փողոցը փոսալցնելը, մի քանի մաքրող մեքենաներ ձեռք բերելը համարում են մեծ ձեռքբերում։

«Ե՛վ քաղաքային տրանսպորտի, և՛ քաղաքի մաքրության հարցերն այն մինիմալ խնդիրներն են, որոնց լուծումը պետք է համարվի ոչ թե ձեռքբերում, այլ՝ նվազագույն պարտականությունների կատարում։  Զավեշտ է նման «ձեռքբերումներով» քաղաքական հայտ ներկայացնելը։ Մեր առաջարկը բնականաբար տարբեր է լինելու»,-ասում է նա։

Ըստ նրա՝ իրենք այնպիսի  առաջարկներ են անելու, որ երևանցին  չի մերժելու։ Ամբողջ թիմով, մասնագիտական հանրույթի ու բնակչության հետ շփման արդյունքում են դրան հասնելու։ «Մենք նախատեսում ենք իրականացնել այնպիսի ծրագրեր և ունենալ այնպիսի նախագծեր, որոնք կլինեն մի քանի սերունդների հպարտությունը, ինչպես օրինակ՝ Երիտասարդական պալատի վերականգնումն է, որի շնորհանդեսը մենք երևանցիներին ենք ներկայացնելու»,-նշում է նա, ապա հավելում, որ դա իրենց մեծ ծրագրի՝ Երևանը երևանցիներին վերադարձնելու նպատակի միայն մի մասն է։

Անդրանիկ Ամիրջանյանը նշում է նաև, որ իրենք ամենօրյա կապի մեջ են քաղաքացիների հետ․ ահազանգերին, բնակիչների կողմից բարձրաձայնվող խնդիրներին էլ միշտ ականջալուր են լինում։

«Ակնհայտ է, որ մարդիկ հոգնել են և՛ այսօրվա, և՛ երեկվա իշխանություններից, երկուսն էլ չեն կարողացել բավարարել մարդկանց մինիմալ պահանջները։ Նոր ասելիքով, կարող, պրոֆեսիոնալ թիմով ուժ են մարդիկ փնտրում, և «Ապրելու երկիր» կուսակցությունն էլ իր հիմնադրման օրվանից աշխատում է մարդկանց հենց այդ պահանջմունքը բավարարել»,- ասում է նա։

Անդրանիկ Ամիրջանյանի խոսքով՝ իրեն վստահություն է տալիս կուսակցության անցած ճանապարհը․ «Ապրելու երկիր»-ը ՏԻՄ ընտրություններում գրանցել է իր հաջողությունը, քանի որ կարողացել է իր վստահելի, պրոֆեսիոնալ թիմով գրավել հանրության վստահությունը մասնակցելով 21 համայնքում ընտրության՝ ներկայացված է 18-ում, հաղթել է Նոյեմբերյանում, Ալավերդիում, համատեղ կառավարում է իրականացնում Տաթևում։

«Կարծում եմ՝ 1․5 տարվա կյանք ունեցող կուսակցության համար հանրային այսպիսի մեծ վստահությունը՝ կարևոր ուղենիշ է։ Նշանակում է՝ ընտրված ճանապարհն ամենաարդյունավետն է։ Առաջիկայում՝ Երևանի ընտրությունների ժամանակ էլ, մենք մեր աշխատանքով, կկարողանանք գրավել երևանցիների վստահությունը»,- ասում է նա։