Կապրի կղզուց՝ համաշխարհային նորաձևության ցուցադրություններ․ «Փաստ»

«Փաստ» օրաթերթը գրում է

Կապրիները կտրված տաբատներ են կանանց համար՝ ոտքերի ներքևի մասում թեթև կողային բացվածքներով: Այս տաբատի երկարությունը մոտավորապես տաբատի «կանոնավոր» երկարության երեք քառորդն է կազմում։ Ինքնին բավական բարդ կտրվածքով կապրիները համակցվում են պարզ վերնաշապիկների, շապիկների և սովորական կտրվածքի այլ հագուստների հետ: Կապրիները սազում են բացարձակապես բոլոր կանանց՝ բարձրահասակ ու ցածրահասակ, նիհար ու գեր, երիտասարդ ու հասուն: Նրանք անթերի ընդգծում են կազմվածքի առավելությունները և, միևնույն ժամանակ, կարող են օգնել նրբորեն թաքցնել բացասական կողմերը։

Այդուամենայնիվ, մեծ հաշվով, կապրին, ինչ պես ցան կ ա ցած կարճ տա բ ա տ , «կտրում» է ոտքերի երկարությունը։ Այդ իսկ պատճառով ոճաբանները խորհուրդ են տալիս կարճ ոտքեր ունեցող կանանց զգուշանալ նման մոդելներից։ Կապրիները շատ լավ ընդգծում են կոնքերի գիծը՝ թույլ տալով ցույց տալ սրունքներն ու ոտնաթաթերն առավել բարենպաստ լույսի ներքո: Նման տաբատները հիանալի կերպով ընդգծում են հատկապես գոտկատեղի ուրվագծերը: Դրանց շնորհիվ կարելի է մարմնին ավազի ժամացույցի տեսք հաղորդել։ Այս ընտրությունը հաճախ անում են նրանք, ովքեր ցանկանում են ընդգծել կանացիությունը և իրենց կոկետությունը՝ միաժամանակ չկորցնելով այդ հագուստի գործնականությունը։

Սակայն ցանկալի է, որ կարճ հասակ ունեցող աղջիկները հնարավորինս հրաժարվեն այդ մոդելից՝ տարօրինակ տեսք ունենալու վտանգի պատճառով: Այդ կտրված տաբատներն իրենց անունը ստացել են իրենց գյուտի վայրի՝ իտալական Կապրի կղզու շնորհիվ: Առաջին անգամ կանանց զգեստապահարանում կապրի մոդելը հայտնվել է 1940 թվականին։ Հատկանշական է, որ դրանց ստեղծողը գերմանացի մոդելավորող Սոնյա Լենարտն է, որն այդ ժամանակ ապրում էր կղզում։ Ամառը շոգ էր, և դիզայները նկատել էր, որ տեղացիները, որոնք զբաղվում են ձկնորսությամբ և հողագործությամբ, կտրել են իրենց աշխատանքային տաբատներն այնպես, որ երկարությունը հասել է մինչև սրունքի կեսին։ Գաղափարը դիզայներին հետաքրքիր է թվացել, ուստի Բեռլինում նորաձևության հերթական ցուցադրության ժամանակ Ֆրաու Լենարտը ներկայացրել է կտրված տաբատների հավաքածու, որը նա անվանել է այն կղզու պատվին, որտեղ հանգստացել էր՝ Կապրի։

Բավական արագ կապրիները «արտագաղթել» են համաշխարհային նորաձևության մայրաքաղաքներից մեկը՝ Միլանը, և 10 տարի անց սկսել պահանջված լինել Եվրոպայի բոլոր քաղաքներում։ Նորաձևության աշխարհում հաճախակի տեղի ունեցող հեղափոխությունների պատճառով կապրիները մոռացվել են մինչև 90-ականների վերջը։ Իսկ ժողովրդականության գագաթնակետը նորից սկսել են ձեռք բերել 21-րդ դարի սկզբին։ Կապրի տաբատը ԽՍՀՄ երկրներում, այդ թվում՝ Հայաստանում հայտնի է դարձել միայն անցյալ դարի 90-ականներին։ Պետք է նկատել, որ այդ ժամանակաշրջանում հատկապես կովկասյան և միջինասիական երկրներում նույնիսկ կանանց ամենասովորական տաբատներն առանձնապես տարածված չէին առավել ավանդապաշտական պատկերացումների պատճառով։

Ժամանակակից խանութներում կարելի է գտնել կապրի տաբատների մեծ քանակությամբ տարբեր մոդելներ և ոճեր։ Դրանք կարելի է կրել աշխատանքի, զբոսնելու ժամանակ և մարզասրահներում: Նորաձևության դիզայներների աշխատանքի շնորհիվ կապրիները դարձել են ոչ միայն շատ հարմարավետ հագուստ, այլ նաև ոճային։Այսօր այդ տաբատները կարելի է հանդիպել նորաձևության գրեթե բոլոր ցուցադրությունների ժամանակ, իսկ համաշխարհային հայտնիները, ովքեր հասարակական վայրերում հայտնվում են կապրի տաբատներով, միայն մեծացնում են արդեն իսկ հայտնի այդ հագուստի պահանջարկը։

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում