«Ձոն ծաղկանց». Նոյեմբերյանում տրվեց ամենամյա բազմերանգ փառատոնի մեկնարկը (ֆոտոշարք)

Նոյեմբերյանում առաջին անգամ կայացավ «Ձոն ծաղկանց» խորագրով ծաղկատոն-փառատոնը՝ նվիրված տարածաշրջանի հրաշագործ բնաշխարհին, ծաղկերանգ դաշտերին, ծաղկավետ լեռներին։

Փառատոնի նախորդ օրը Նոյեմբերյանի Մշակույթի կենտրոնի աշխատակիցները կազմակերպել էին ծաղկահավաք՝ Նոյեմբերյանի սարերից բերելով բազմագույն ու բազմահոտ ծաղիկներ, որոնց շնորհիվ փառատոնին գույների ու տրամադրության պակաս չկար:

Ծաղկատոնի մասնակիցները Նոյեմբերյան քաղաքի արհեստի և արվեստի ստեղծագործողներն էին՝ քարի և փայտի փորագրության ժողովրդական վարպետից մինչև տիկնիկագործ, գորգագործ, վիտրաժի վարպետ, գեղանկարիչ, մանրանկարիչ, թաղիքագործ:

Վայելելով մասնակիցների աշխատանքների ցուցադրությունը՝ փառատոնի հյուրերը հնարավորություն ունեցան մասնակցելու իրենց նախընտրած ճյուղի վարպետաց դասին։

Past.am-ի հետ զրույցում Նոյեմբերյանի Մշակույթի կենտրոնի տնօրեն Սոնյա Զուրաբյանը հույս հայտնեց, որ փառատոնը ամենամյա կդառնա.

«Մեկնարկը, կարծում եմ, ստացված է՝ դատելով ներկաների տրամադրությունից և արձագանքներից: Շնորհակալություն եմ հայտնում փառատոնի բոլոր աջակիցներին, բոլոր մասնակից արվեստագետներին, երաժշտական ելույթներով հանդես եկող մասնակիցներին, մեր սիրելի հանդիսատեսին»:

Միջոցառումն ուղեկցվում էր ժողովրդական երգ ու պարով՝ ինչպես մշակույթի կենտրոնի սաների, այնպես էլ համայնքի անհատ կատարողների մատուցմամբ։

Ալիսա Սիմոնյան