Զարմանալի չէ, որ Ալիևն ու Էրդողանը գոհ են Փաշինյանից. «Փաստ»

«Փաստ» օրաթերթը գրում է

dzen.ru/yerkramas-ը «Հայաստանի թշնամիներին քծնելու Փաշինյանի հերթական փորձը» վերնագրով հոդվածում գրում է, որ իրավիճակը Հայաստանում և Արցախում օրեցօր վատթարանում է Նիկոլ Փաշինյանի պարտվողական կեցվածքի, անկարողության ու Ադրբեջանին և Թուրքիային անվերջ զիջումների պատճառով։ Երբ նա եկավ իշխանության, ներկայացավ որպես դեմոկրատ, բայց շուտով պարզվեց, որ նա բռնապետ է: Հինգ տարի առաջ Փաշինյանը մեծ հանրահավաքում խոստացավ. «Եթե Ղարաբաղի բանակցային գործընթացում լինի կարգավորման տարբերակ, որին ես ինքս համաձայնեմ և լավ տարբերակ համարեմ, ոչ ոք թող չմտածի, որ ես կստորագրեմ որևէ թուղթ կամ կանեմ որևէ գործողություն ձեզանից թաքուն:

Երբ տեսնեմ, որ կա մի տարբերակ, որի մասին իսկապես կարելի է խոսել, կգամ, կկանգնեմ այստեղ և կներկայացնեմ բոլոր մանրամասները, և դուք կորոշեք այդ տարբերակով գնա՞լ կարգավորման, թե՞ ոչ։ Եթե որոշեք, որ գնալու ենք, ուրեմն կգնանք, եթե որոշեք, որ չենք գնալու, ուրեմն չենք գնա։ Դուք բարձրագույն իշխանություն եք, և դուք եք որոշում, և դրանում որևէ կասկած չի կարող լինել»։ Բայց 2018 թվականի այդ հանդիսավոր խոստումից հետո նա ոչ մի հարցով ժողովրդի որոշումը չի հարցրել։ Բայց արել է հետևյալը.

-Իր քաղաքական ընդդիմախոսների հասցեին սպառնալից հայտարարություններ է արել, տեղական ընտրությունների ժամանակ բանտարկել է իր կուսակցության մրցակիցներին, ձերբակալել ցուցարարներին և արգելել սփյուռքահայ նշանավոր անձանց մուտքը Հայաստան իր ռեժիմի նկատմամբ նրանց քննադատության պատճառով:

-Նա Հայաստանի բնակչությանը բաժանել է երկու թշնամական ճամբարների և օտարել սփյուռքին Հայաստանից։

-Բանակի կառավարումն սկզբունքորեն վատ է կազմակերպել 2020 թվականի աղետալի պատերազմի ժամանակ, որի արդյունքում զոհվել են հազարավոր հայ երիտասարդ զինվորներ, իսկ Արցախի մեծ մասը կորսվել է։

-Նա չի կարողացել հասնել Ադրբեջանից հայ ռազմագերիների ազատմանը։

-Վերջին երկու տարվա ընթացքում նա չի կարողացել պաշտպանել Հայաստանի սահմանները Ադրբեջանի կողմից կրկնվող հարձակումներից:

-Վեց ամիս է՝ նա չի կարողանում բացել Ադրբեջանի կողմից շրջափակված Լաչինի միջանցքը, ինչի հետևանքով Արցախի 120 հազար բնակիչ ունի սննդամթերքի ու դեղորայքի պակաս։

-Նա թուլացրել է հայոց բանակը։

- Նա մերժել է Արևմտյան Հայաստանի վերաբերյալ Թուրքիային ուղղված հայկական պահանջները՝ հայտարարելով, որ Հայաստանը տարածքային պահանջ չունի իր հարևաններից որևէ մեկի նկատմամբ։

-Նա գնացել է Անկարա՝ նախագահ Էրդողանի երդմնակալության արարողությանը՝ խայտառակելով իրեն ու Հայաստանին։

-Նա Արցախը տվել է Ադրբեջանին: Հակառակ Փաշինյանի ստերին, որն ասում է, թե Արցախը տվել են Հայաստանի նախկին ղեկավարները, ԵՄ արտաքին հարաբերությունների և անվտանգության քաղաքականության գերագույն ներկայացուցիչ Ջոզեֆ Բորելը վերջերս ասել է. «Առաջին անգամ… Հայաստանում Ղարաբաղը համարել են Ադրբեջանի մաս»։ Եվ զարմանալի չէ, որ Ալիևն ու Էրդողանը գոհ են Փաշինյանից: Վերջերս էլ Փաշինյանը խորհրդարանում ունեցած ելույթի ժամանակ կասկածելի հայտարարություններ է արել Հայաստանի պետական զինանշանի և օրհներգի վերաբերյալ, որոնք ամրագրված են Հայաստանի Սահմանադրությամբ։ Այսինքն, օրհներգի ու զինանշանի վերաբերյալ Փաշինյանի քննադատությունը հակասահմանադրական է։

Ահա թե ինչպես է Փաշինյանը բնութագրել Հայաստանի զինանշանը. «Ի՞նչ է պատկերված մեր զինանշանի վրա՝ Նոյյան տապանն Արարատ լեռան վրա, Հայաստանի չորս տոհմերի զինանշանները։ Վերջերս, երբ նայում եմ այս զինանշանին, հարց է ծագում՝ մեզանից յուրաքանչյուրի համար սրբավայր հանդիսացող պատկերն ինչպե՞ս է կապված 1991 թվականին հիմնադրված պետության հետ, ինչի՞ մասին է։ Նոյյան տապան, որը գտնվում է Արարատ լեռան վրա, իսկ Հայաստանի Հանրապետության այսօրվա տարածքը ջրի տակ է։ Առյուծ, որը բնական պայմաններում վաղուց Հայաստանում չէ: Առյուծ, որն արդեն Հայաստանում բնական պայմաններում այստեղ վաղուց չի ապրում: Եվ այս խնդիրը, որը մենք քննարկում ենք, իրականում մեզանից յուրաքանչյուրի, չթվա դա միայն ձեր մեջ է, մեզնից յուրաքանչյուրի մեջ առկա այդ երկվության մասին է, պատմական Հայաստանի և իրական Հայաստանի»։ Եզրափակելով իր խոսքը՝ Փաշինյանը առիթը բաց չի թողել դժգոհելու Հայաստանի պետական մյուս խորհրդանիշից՝ պետական օրհներգից:

Եվ դա՝ հենց այն օրը, երբ Հայաստանը նշում էր Պետական խորհրդանիշների օրը: Նա ասել է. «Այսօր մեր օրհներգի պաշտոնական խոսքերն ավարտվում են մահով։ Գաղափարախոսությունն ինքնին ճիշտ է, ուստի ես տեքստի հետ խնդիրներ չունեմ, բայց այն ավարտվում է մահվան տողով և մահվան տեսարանով»։ Սա Փաշինյանի հերթական փորձն է Հայաստանի թշնամիներին հանգստացնելու նպատակով թուլացնել հայերի ազգային զգացմունքները։ Հիշեցնենք, որ օրհներգի խոսքերը գրել է նշանավոր բանաստեղծ Միքայել Նալբանդյանը 1861 թվականին, այն Հայաստանի Առաջին Հանրապետության կողմից ընդունվել է 1918 թվականին և բառերի մի փոքր փոփոխությամբ վերահաստատվել է ներկայիս Հայաստանի Հանրապետության կողմից։

Ի՞նչ կառաջարկի Փաշինյանը հաջորդիվ: Երևի թե փոխել Հայաստանի դրոշն ու երկրի անունը: Սակայն սա այն նույն մարդն է, որն ինքնագոհ հայտարարում էր. «Ես չեմ պատկերացնում մի մարդու, ով կարող է ավելի շատ սիրել իմ երկիրը, քան ես: Չի կարող լինել նման բան, բացառվում է»։ Բայց անգամ խորհրդային տարիներին Խորհրդային Հայաստանի զինանշանի վրա էր պահպանվել Արարատ լեռը, որը Փաշինյանը առաջարկում է հանել։ Այդ դեպքում ինչպե՞ս կարող է անկախ Հայաստանի Հանրապետության վարչապետը լինել ավելի քիչ ազգայնասեր, քան անգամ Խորհրդային Հայաստանի ղեկավարները։

Մանրամասները՝ «Փաստ» օրաթերթի այսօրվա համարում