Ծառայությանը վեց ամիս էր մնացել, «Քյավառը» չհասցրեց սիրած աղջիկ ունենալ. զոհված զինծառայողի ընկերը մանրամասներ է պատմում

Shabat.am-ը գրում է.

Հունվարի 9-ի երեկոյան ՊԲ արևելյան ուղղությամբ տեղակայված զորամասերից մեկի պահպանության տեղամասում, հակառակորդի կողմից արձակված կրակոցից մահացու հրազենային վիրավորում ստացած ՊԲ զինծառայող, 1996թ. ծնված Արամայիս Ոսկանյանի զորացրվելուն մնացել էր 6  ամիս:

«Վեց ամիս էր մնացել: Նա երազկոտ տղա չէր, նպատակ էր դնում ու քայլում դեպի իր նպատակը: Իրար հետ շատ նպատակներ ենք իրականացրել»,-Shabat.am-ի հետ զրույցում Արամայիսի մասին պատմեց նրա մտերիմ ընկեր Աղաս Մամբրեյանը, ով երեք օրից մեկնում է ծառայության:

«Մի հացը կիսում, երկուսով ուտում էինք, խոսում էինք, ինձ էլ բարի մաղթանքներ ու ընկերական խորհուրդներ էր տալիս բանակային կյանքի վերաբերյալ, քանի որ երեք օրից ես էլ եմ մեկնելու Հայոց բանակ, բայց այսպես եղավ…»,-շարունակեց ընկերը, ով Արամայիսին մտերմաբար «Քյավառ» է կոչում:

«Միայն ես էի Քյավառ ասում, Քյավառ, ախպեր, ընկեր էի ասում ու ընդհանրապես անունով չէի դիմում: Մի անգամ էլ ժպիտով հումորով ասաց՝ Աղաս, անունս Արամայիս ա,ախպեր, կարաս տենց էլ դիմես: Ասացի՝ չէ, դու իմ Քյավառն ես»,-վերհիշեց ընկերը, հավելելով, որ Արամայիսը ընկերուհի, սիրած աղջիկ չուներ՝ չհասցրեց ունենալ:

Զրույցի վերջում, զոհված զինծառայողի ընկերը նշեց, որ ծառայության կմեկնի ու կծառայի և՛ իր, և՛ ընկերոջ փոխարեն:

Նշենք, որ զոհված զինծառայողը սովորում էր Երևանի պետական ագրարային համալսարանի Ֆինանսների կառավարում բաժնում: Հունվարի 26-ին նա կդառնար 20 տարեկան:

Ավելի վաղ հայտնել էինք, որ հունվարի 9-ին` ժամը 21:30-ի սահմաններում, ՊԲ արևելյան ուղղությամբ տեղակայված զորամասերից մեկի պահպանության տեղամասում, հակառակորդի կողմից արձակված կրակոցից, մահացու հրազենային վիրավորում է ստացել ՊԲ զինծառայող, 1996թ. ծնված Արամայիս Յուրիկի Ոսկանյանը:

ԼՂՀ ՊՆ մամուլի ծառայությունից հայտնում են, որ դեպքի մանրամասները պարզելու համար կատարվում է քննություն:

Արամայիս Ոսկանյանը հետմահու պարգևատրվել է «Մարտական ծառայություն» մեդալով։