Սերժ Թանկյանը, Քանյե Ուեսթը և այլք ցավակցություններ են հայտնում Դեւիդ Բոուիի մահվան կապակցությամբ

 Համաշխարհային աստղերն իրենց ցավակցություններն են հայտնում լեգենդար երաժիշտ Դեւիդ Բոուիի մահվան կապակցությամբ: «Արմենպրես»-ի փոխանցմամբ`սոցցանցերը ողողված են ցավակցական խոսքերով: Ռեփեր Քանյե Ուեսթը նշել է, որ աղոթում է երաժշտի ընտանիքի և ընկերների համար: «Դեւիդ Բոուին իմ ամենակարևոր ներշնչանքի ա ղբյուրներից էր, այնքան անվախ, ստեղծարար, նա տվեց մեզ ամբողջ կյանքի համար կախարդանք»,-հավելել է Ուեսթը:

Աշխարհահռչակ ռոք երաժիշտ Սերժ Թանկյանը ևս ցավակցել է Բոուիի մահվան կապակցությամբ: «Շատ տխրեցի, երբ կարդացի մեր ժամանակների ամենահիանալի արտիստներից, ինչպես նաև ամենահամեստ և սիրալիր մարդկանցից մեկի մահվան լուրը։ Հանգչիր խաղաղությամբ, Դեւիդ Բոուի»,- նշել է նա։

Անգլիացի կատակերգու Ռիկի Ջերվեյսը նշել է, որ հերոսի է կորցրել:

Դերասան Լոգան Լերմանը նշել է, որ խորապես տխրել է: «Մենք կորցրել ենք ամենամեծ արվեստագետներից մեկին, որ երբևէ ապրել է: Իմ սերը այն ամենի նկատմամբ, ինչ դու ստեղծել ես, անչափելի է»,- նշել է նա։

Դերասան Էլայջա Վուդն էլ շեշտել է, որ աշխարհն առանց Բոուի չի պատկերացրել: «Նա համբարձվեց տիեզերք, որտեղից էլ եկել էր»,-նշել է նա:

«Սա այն օրերից է, երբ դու կարող ես գոռալ և լաց լինել միևնույն ժամանակ...բայց հետո գալիս է լռությունը: Ցտեսություն, իմ հերոս»,-նշել է դերասանուհի Օռնելա Մուտին:

Կյանքի 70-րդ տարում վախճանվել Է բրիտանացի լեգենդար երաժիշտ Դեւիդ Բոուին: Բոուին տառապում Էր քաղցկեղից եւ մահացել Է այդ հիվանդության դեմ 18-ամսյա պայքարից հետո: Ինչպես նշում Է SkyNews-ը, երաժիշտը միշտ Էլ խուսափում Էր իր անձնական կյանքի մանրամասները հրապարակելուց, նրա հիվանդության մասին մինչ օրս հայտնի չԷր: Հունվարի 8-ին՝ իր ծննդյան 69-րդ տարեդարձի օրը, Բոուին ներկայացրել Է նոր՝ 29-րդ ալբոմը՝ Blackstar-ը:

Դեւիդ Բոուին (իսկական անունը՝ Դեւիդ Ռոբերտ Ջոնս) երաժշտական կարիերան սկսել Է 1960-ական թվականներին: Տարբեր տարիների նա աշխատել Է այնպիսի ռոք երաժիշտների հետ, ինչպիսին են Ջոն Լենոնը եւ Բրայան Ինոն: Նրա ալբոմներն ու սինգլները ամբողջ աշխարհում վաճառվել են միլիոնավոր տպաքանակներով: 2000 թվականին Բոուին NME բրիտանական հանդեսի կողմից ճանաչվել Է 100-ամյակի ամենաազդեցիկ երաժիշտը: Նա նաեւ 29-րդ տեղն Է գրավել «Հարյուր մեծագույն բրիտանացիների» ցուցակում: