Պատահական ստեղծված մեքենա, որ տասնամյակներ շարունակ սիրված է եղել շատերի կողմից. «Փաստ»

«Փաստ» օրաթերթը գրում է

Հայտնի Porsche ավտոընկերության եզակի ավտոմեքենաներից մեկը լեգենդար Porsche 911 մոդելն է: Porsche ավտոարտադրողի խնդիրն էր ստեղծել մեքենա, որը սիրված կլիներ երկար տարիներ: Եվ դա տեղի է ունեցել, կարելի է ասել, պատահականորեն: 911 առաջին մոդելը թողարկվել է Porsche 356 հնացած տարբերակը փոխարինելու համար: Porsche 911- ի պատմությունը սկսվել է 1963 թվականից: Հենց այդ ժամանակ այն հանրությանն է ներկայացվել Ֆրանկֆուրտի ավտոսրահում՝ այն մշակող Ֆերդինանդ Պորշե կրտսերի կողմից: Դա նախնական արտադրության օրինակ է եղել: Շուկայական մասշտաբով այդ ավտոմեքենաները սկսել են արտադրվել մեկ տարի անց, որից հետո արդեն Փարիզում է ներկայացվել Porsche 911-ը:

Ի սկզբանե, 911-ը պարզապես մեկ այլ ստանդարտ համար է եղել, որով անվանվել են բոլոր հերթական մոդելները: Բայց այս մեքենայի շուկայական հաջողությունների շնորհիվ որոշվել է այս մոդելի համար բացառություն անել և թողնել թվային համարը: Դա Porche ապրանքանիշի պատմության մեջ տեղի է ունեցել միակ անգամ: Porche 911- ի առաջին տարբերակը դադարել են արտադրել միայն 1974 թվականին: Իր գոյության ընթացքում այն ունեցել է 8 տարբեր փոփոխություններ և թարմացումներ: Իսկ արդեն 1974 թվականից մինչև 1985 թվականը սկսել են արտադրվել այս ապրանքանիշի երկրորդ սերնդի մեքենաները, սակայն արդեն այլ սերիական համարով՝ 930: Չնայած Porsche ընկերությունը հերքում է, բայց հասարակական կարծիքով 911-ը և 930-ը մեկ սերնդի ավտոմեքենաներ են:

Porsche- ի նորացված ավտոմեքենաների զարգացման պատմության մեջ նոր ժամանակաշրջան սկսվել է 1990 թվականից հետո, երբ հոսքագծից դուրս է եկել վերջին դասական մոդելը: Փոփոխված Porsche 911 Carrera S - ը աշխարհին է ներկայացվել 2011 թվականին: Քննադատների կարծիքով, մեքենան դարձել է ավելի «ֆոտոգենիկ»: Եվ դա, ամենայն հավանականությամբ, այն պատճառով, որ նոր մոդելում դիմապակու թեքության անկյունը կրճատվել է, գումարած՝ տանիքը երկարացվել է: Ընդհանուր առմամբ, Porsche- ի ներկայիս բոլոր մոդելները նորարարական են: Փոփոխությունները տեղի են ունեցել ինչպես արտաքին, այնպես էլ ներքին հարդարանքում:

Օրինակ՝ ավելի էլեգանտ լուսարձակներ են տեղադրվել, առջևի նստատեղերն այժմ ունեն 9 հարմարավետության պարամետրեր: Այնուամենայնիվ, նայելով Porsche 911 Carrera Sին, կարելի է տեսնել որոշ նմանություններ առաջին դասական մոդելի հետ: Porsche 911 Carrera S- ն ունի 3,8 լիտրանոց վեցագլան շարժիչ 400 ձիաուժ հզորությամբ և յոթ արագությամբ մեխանիկական փոխանցումատուփ: Մեքենայի նոր տարբերակների վրա անիվների շառավիղը հասցվել է 20 դյույմի: Բացի այդ, մեքենան վառելիքի խնայողության և վարելու հարմարավետությունը բարձրացնելու համար հագեցած է ղեկի ZF էլեկտրամեխանիկական ուժեղացուցիչով:

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում