«Տղեն պետք է ծառայի, որ տղամարդ դառնա». կրտսեր սերժանտ Պողոս Սարգսյանը զոհվել է հոկտեմբերի 7-ին, տուն «վերադարձել» չորսուկես ամիս անց. «Փաստ»

«Փաստ» օրաթերթը գրում է

«Պողոսը բնավորությամբ շատ համեստ երեխա էր, աշխույժ էր ու միևնույն ժամանակ ենթարկվող: Փոքրուց գիտեր թույլատրելիի իր սահմանը, գիտեր, թե որտեղ ու ինչ կարելի է անել ու ինչ՝ ոչ»,-«Փաստի» հետ զրույցում ասում է Պողոսի մայրիկը՝ տիկին Արփինեն:

Պողոսը ծնվել է Արագածոտնի մարզի Լեռնապար գյուղում, որտեղ էլ անցել է նրա մանկությունն ու պատանեկությունը, այստեղ դպրոց է հաճախել և այստեղից էլ մեկնել զինծառայության: Դպրոցական տարիներին Պողոսը լավ առաջադիմություն ուներ: Մայրիկն ասում է՝ ցանկացած միջոցառման մեջ ներգրավված էր, առաջիններից մեկն էր: «Մաթեմատիկայի, ֆիզիկայի ու ինֆորմատիկայի հանդեպ սեր ուներ: Դպրոցն ավարտելուց հետո միասնական քննությունները հանձնեց և ընդունվեց Խաչատուր Աբովյանի անվան մանկավարժական համալսարանի Մաթեմատիկայի, ֆիզիկայի և ինֆորմատիկայի ֆակուլտետի ինֆորմատիկայի բաժինը: Ընդունվեց, բայց ուսանող լինել չհասցրեց, քանի որ նույն տարվա ամռանը զորակոչվեց ժամկետային զինծառայության: Ցանկանում էր ծրագրավորող դառնալ: Առհասարակ շատ նպատակներ ուներ, որոնք բոլորն էլ անկատար մնացին»: Տիկին Արփինեն նշում է՝ որդին չէր խուսափում ծառայությունից, սիրով է մեկնել բանակ:

«Իր խոսքերն էին՝ տղեն պետք է ծառայի, որ տղամարդ դառնա»: Պողոսը բանակ է զորակոչվել 2019 թ.-ի հունիսի 13-ին: Ծառայության առաջին վեց ամիսն անցել է Արմավիրի ուսումնական զորամասում, իսկ հետո տեղափոխվել է Խնձորեսկ: «Այնտեղից էլ հենց սեպտեմբերի 27-ին Պողոսին տարել են Ջրական»: Պողոսն ուներ կրտսեր սերժանտի կոչում, մարտական մեքենայի հաշվարկի հրամանատարն էր։ Ծառայության ընթացքում արժանացել էր «Լավագույն զինվոր-մարզիկ» կրծքանշանի։ «Պողոսը ծառայել է մեկ տարի և երեք ամիս, ծառայության ընթացքից շատ գոհ էր, ընդհանրապես իրենից բողոք չենք լսել, երբեք չի ասել՝ այս մի բանից նեղվում եմ: Երկու վայրերում էլ՝ Արմավիրում և Խնձորեսկում, շատ սիրով ծառայել է: Սեպտեմբերի 27-ին իրեն մարտի դաշտ տարան, ու այդ փաստը Պողոսը մեզանից գաղտնի պահեց: Կռվի ամենաթեժ կետերում էր, բայց մեզ անգամ մեկ բառով չակնարկեց, թե որտեղ է:

Սեպտեմբերի 27-ին ցերեկային ժամի զանգահարեց ինձ՝ մա՛մ, ահավոր անձրև է եկել, լույս չունենք, հնարավոր է՝ կապ չլինի, հեռախոսս էլ զարյադկա չունի. որ չխոսենք, չանհանգստանաք: Խաբեց մեզ, հենց այդ ժամանակ իրենց արդեն տեղափոխում էին Արցախ: Խաբեց, որ չանհանգստանայինք: Պատերազմի սկսվելուց երեք օր էր անցել, զանգեց, ասացի՝ խնդրում եմ, ուղղակի տեղդ ինձ ասա՛, իմանամ, թե որտեղ ես: Կանխազգացումս ինձ չէր խաբում: Պողոսս հարցիս այսպես արձագանքեց՝ մա՛մ, մի՛ մտածիր, մի՛ անհանգստացիր, մենք Հայաստանի ու Արցախի սահմանի վրա ենք: Մեզ կռիվ չեն տարել: Բայց ընկերներին ասել էր, թե որտեղ է, ինչ վիճակում են»: Պատերազմի ընթացքում Պողոսը հասցրել է տարբեր վայրերում լինել՝ Իշխանասար, Արա լեռ, Ջրական և այլուր: «Իրենց անընդհատ ու տարբեր տեղեր են տեղափոխել: Իսկ դեպքը եղել է հոկտեմբերի 7-ին՝ Հավասլու գյուղի մոտ: ԲՄՊ-ին հարվածել է անօդաչու թռչող սարքը: Երեք հոգով են եղել ԲՄՊ-ի մեջ, երեք տղաներն էլ զոհվել են»: Երկու օր անց արդեն շատերն իմանում են, թե ինչ է պատահել:

«Չէին ասում, որ անօդաչուն հարվածել է, և երեխաները զոհվել են, ինձ խաբեցին, ասացին, որ պետք է գնամ, արյուն տամ, երեխես ծանր վիճակում է: Փաստորեն, խաբում էին, բոլորը գիտեին, բայց ինձ խաբեցին: Գնացինք, անալիզ հանձնեցի... Ու սկսեցինք փնտրել երեխուն, չորսուկես ամիս չէինք գտնում: Հետո փրկարարները կարողացել էին մտնել արդեն այդ հատվածը, որտեղ դեպքը եղել էր: Իրենց ԲՄՊ-ի համարը և մնացյալ տվյալները համադրելով՝ դուրս էին բերել երեխեքի մասունքները: 2021 թ.-ի փետրվարին նոր գտանք մեր տղային, իր զոհվելու փաստը նաև ԴՆԹ փորձաքննությունը հաստատեց»: Հիմա Պողոսը «տանն է»՝ Լեռնապար գյուղում: «Գյուղից մեկ զոհ էլ ունենք, և հիմա Պողոսն ու նա հուղարկավորված են կողք կողքի»: Իսկ նրա ընտանիքին ու հատկապես մայրիկին ուժ ու հույս տվողը փոքրիկ Մարիամն է, նա ծնվել է եղբոր զոհվելուց հետո, որ ապրեցնի ընտանիքին: «Մեծ աղջիկս ու թոռնիկներս, ապրեցնում են մեզ, ուժ տալիս պայքարելու: Եթե մեկ խոսքով ասեմ, ապա երեխաներս են ինձ ապրեցնողը՝ աղջիկներս և Պողոսս»:

Հ. Գ. - Պողոս Սարգսյանը հետմահու պարգևատրվել է «Մարտական ծառայություն» մեդալով: Պարգևատրվել է Մանկավարժական համալսարանի մեդալով: Համալսարանը գիրք է լույս ընծայել՝ ի հիշատակ պատերազմին մասնակցած իր ուսանողների: Այնտեղ պատմում են նաև Պողոսի մասին:

ԼՈՒՍԻՆԵ ԱՌԱՔԵԼՅԱՆ

Մանրամասները՝ «Փաստ» օրաթերթի այսօրվա համարում