Արմեն Երիցյանը վստահում է Ավետիսյանների ընտանիքի սպանության գործով իրավապահ մարմինների իրականացրած քայլերին

Ավետիսյանների ընտանիքի սպանության գործով իրավապահ մարմինների իրականացրած քայլերին և գործի արդար ընթացքին  հավատում է ՀՀ ՏԿԱԻ նախարարԱրմեն Երիցյանը: Արմեն Երիցյանը, ինչպես նաև ԱԺ  պատգամավորներ հունվարի 12-ին  եղան «Շիրակ» գերեզմանատանը, որտեղ հանգչում են Ավետիսյանների ընտանիքի 7 անդամ, ծաղիկներ դրեցին նրանց շիրիմներին և հարգանքի տուրք մատուցեցին:

«Դատավճիռը կլինի, և մենք բոլորս կտեսնեք, որ դա արդար է լինելու: Եթե որոշում է կայացվել, որ դատավարությունը պետք է տեղի ունենա ռազմաբազայի տարածքում, կարծում եմ, դա արդար որոշում է»,-նշեց Արմեն Երիցյանը:

Մարզային ու քաղաքային իշխանությունները ևս  հուսով են, որ դատական գործընթացը  վերջապես լույս կսփռի Ավետիսյանների ընտանիքի սպանության գործի վրա՝ իսկ հանցագործը կստանա իր արժանի պատիժը: «Մեկ տարի է անցել: Դատական պրոցեսը ընթացքի մեջ է, հունվարի 18-ին տեղի կունենա գործով երկրորդ դատական նիստը: Հուսով եմ և վստահ, որ հանցագործն իր արժանի պատիժը կստանա»,-նշեց Շիրակի մարզպետ Ֆելիքս Ցոլակյանը:

Թեև դատական գործընթացն ընթացքի մեջ է, և արդեն դատական նիստերը նշանակվածեն, սակայն  շատ հարցերի պատասխաններ, ինչպես շատ գյումրեցիների, այնպես էլ Գյումրու քաղաքապետ Սամվել Բալասանյանին անհայտ են: «Մեկ տարի է անցել, բայց շատ հարցերի պատասխանների դեռ սպասում ենք: Շատ հարցեր կան, որոնք կասկածի տեղիք են  տալիս «,-նշեց Գյումրու քաղաքապետ Սամվել Բալասանյանը՝ հույս հայտնելով, որ գյումրեցիները վերջապես հարցերի պատասխանները կստանան:

Հունվարի 12-ին լրացավ Գյումրիում Ավետիսյանների ընտանիքի դաժան սպանության  տարելիցը: Հարազատները, մինչ գերեզմաններ այցելելը եղան տանը, որտեղ դեպքից 1 տարի անց բացվեց տան դուռը. տանն ամեն ինչ նույնն էր, նույնիսկ տոնածառն ու երեխաների խաղալիքները, անկողինները, միայն խուզարկության արդյունքում մի փոքր խառնաշփոթ էր:

Արմենուհի Մխոյան