«Գործ ունենք տեղեկատվության ընտրողական մոտեցման հետ. մերժում ենք շահարկման յուրաքանչյուր փորձ». Արամ Անանյան

«Այս պահին գործ ունենք տեղեկատվության ընտրողական մոտեցման հետ»,- այս մասին Araratnews.am-ի հետ զրույցում ասաց FlyOne Armenia ընկերության տնօրենների խորհրդի նախագահ Արամ Անանյանը՝ անդրադառնալով լրատվամիջոցներից մեկի հրապարակմանը, ըստ որի՝ չվերթերի ուղևորները օդանավակայանում հանկարծ անակնկալ իմացել են, որ գրանցվելու (check-in անցնելու) համար պետք է հավելյալ վճարել 30 եվրո:

«FlyOne Armenia ընկերության տոմսերը ձեռք բերելիս յուրաքանչյուր ուղևոր տեղեկացվում է, որ ավիաընկերության առցանց գրանցումն անվճար է, այն հասանելի է լինում չվերթից 24 ժամ առաջ, և օնլայն հաշվառումը ավարտվում է չվերթից չորս ժամ առաջ, որից հետո ուղևորների հաշվառումը վճարովի է։ Այս երևույթը հատուկ է բոլոր լոուքոսթ ավիաընկերություններին. և´ դեպի Հայաստան, և´ Հայաստանից դուրս չվերթեր իրականացնող բազմաթիվ ավիաընկերություններ նույնպես իրականացնում են վճարովի հաշվառում հենց օդանավակայանում»,–պարզաբանեց Արամ Անանյանը, և նշեց, որ FlyOne Armenia–ն՝ հիմնադրման առաջին օրվանից սկսած, այդ մասին բազմիցս հայտարարել և հայտարարում է։

Նա նշեց, որ բազմիցս ավիաընկերությունն իրականացրել է իրազեկման արշավներ, որպեսզի ուղևորները չվերթից 24 ժամ առաջ իրականացնեն առցանց անվճար հաշվառում։ «Կարծում ենք, որ մեր աշխատանքի առաջնայնությունից մեկը պետք է մնա ուղևորների շարունակական տեղեկացումը, և ավիաընկերությունը՝ շարունակաբար հասանելի բոլոր միջոցներով իրականացրել և իրականացնում է այդ գործառույթը»,–ասաց նա։

Ինչ վերաբերում է չթվերթերի չեղարկման հարցին, ապա Արամ Անանյանն ասաց, որ քանի որ հայկական մի շարք լրատվամիջոցներում տեղ գտած և տառացիորեն իրար կրկնող հրապարակումները որևէ կերպով հստակություն չեն մտցնում, թե մասնավորապես որ չվերթի մասին է խոսքը, ապա ձեռնպահ է մնում որևէ այլ մեկնաբանությունից։ Նա նշեց, որ, բացի այդ, օրվա ընթացքում, ավելի քան 20 չվերթ իրականացնող ավիաընկերության չվացուցակը որոշակի շեղումներ է ունենում՝ հիմնականում ավիաընկերությունից անկախ պատճառներով, բայց ուղևորները պատշաճ տեղեկանոմ են այդ մասին, և ավիաընկերությունը ամբողջությամբ կատարում է իրենց ուղևորների առաջ ստանձնած պարտավորությունները, որոնք  սահմանվում են թե՛ ներպետական, թե՛ միջազգային իրավակարգավորումներով։

«Դրականորեն ընդունելով ցանկացած կառուցողական քննադատություն` կտրականապես մերժում ենք շահարկման յուրաքանչյուր փորձ։ FlyOne Armenia-ն ունի ուղևորների իրազեկման գործուն համակարգ, և չվերթի ժամկետի ցանկացած փոփոխության պարագայում ուղևորներն իրենց կողմից նշված կապից ստանում են համապատասխան իրազեկում։ Ինչ վերաբերում է ավիաընկերության աշխատանքին տրվող կամ տրվելիք գնահատականներին, հարկ ենք համարում նշել, որ լավագույն գնահատականը, թերևս, մեր ուղևորների վստահությունն է, և ուրախությամբ անդրադառնում ենք մի քանի փաստի․ առաջին՝ հիմնադրման օրվանից ցայսօր ավիանընկերությունը տեղափոխել է մեկ միլիոնից ավելի ուղևոր, երկրորդ՝ FlyOne Armenia ավիաընկերությունը 2023 թվականի առաջին կիսամյակի տվյալներով Հայաստանի ամենախոշոր ավիացիոն հարկատուն է, և 1000 խոշոր հարկատուների ցուցակում զբաղեցնում է 74–րդ հորիզոնականը, ավիաընկերությունը շահագործում է 8 օդանավ՝ երկու տասնյակից ավելի ուղղություններով»,–հավելեց ընկերության տնօրենների խորհրդի նախագահը։