Քննչական կոմիտեի մամուլի խոսնակը արատավորում է ոչ միայն իմ, այլ նաև Տիգրան Խաչատրյանի բարի համբավն ու արժանապատվությանը

Հանրությունը տեղյակ է, որ օրեր առաջ հանդես եկա մամուլի ասուլիսով, որտեղ ներկայացրեցի իմ պաշտպանյալ Տիգրան Խաչատրյանի նկատմամբ նախաձեռնված անհիմն և ապօրինի քրեական վարույթ նախաձեռնելու մանրամասները և վարույթային էական ու կոպտագույն խախտումները: Ասուլիսի ժամանակ ներկայացրեցի նախաքննական մարմնի բացթողումները, և ակնհայտ անգործության վերաբերյալ փաստեր:

Դրան հաջորդեց մամուլում մի հրապարակում, որը առնչվում է Սյունիքի մարզային քննչական վարչության պետին: Այդ նյութում մեջբերում էր արված նաև իմ ասուլիսից մի հատված, որտեղ խոսվում է Տիգրան Խաչատրյանի նկատմամբ հարուցված քրեական գործի մասին:

Չանդրադառնալով մամուլի հրապարակմանը՝ ցանկանում եմ տարակուսանքս հայտնել ՀՀ ՔԿ մամուլի խոսնակի ֆեյսբուքյան գրառման վերաբերյալ և ՔԿ-ի կողմից ցուցաբերված տարօրինակ հապճեպային վարքագծին:

Այսօր Քննչական կոմիտեի մամուլի խոսնակ Gor Abrahamyanը՝ անդրադառնալով այս հրապարակմանը, քննության առարկա է դարձրել նաև իմ պաշտպանական մարտավարությունը՝ տալով ոչ պրոֆեսիոնալ որակումներ:

Տեղեկացնում եմ, որ այդ գրառումը առնվազն արատավորում է ոչ միայն իմ, այլ նաև Տիգրան Խաչատրյանի բարի համբավն ու արժանապատվությանը: Այս հրապարակմամբ խախտվում է նաև իմ պաշտպանյալի անմեղության կանխավարկածը:

Եթե մամուլի խոսնակն առնվազն հեռախոսազրույցի մակարդակով շփված լիներ գործը քննող քննիչի հետ, պատկերը կարող էր այլ լինել՝ անգամ պատկերավոր իր համար:

Այնուամենայնիվ, որոշակի տեղեկատվություն տրամադրեմ մեր հանրությանը և անձամբ Աբրահամյանին, որպեսզի հաջորդ անգամ տրամադրի ճշգրիտ և ստուգված տեղեկատվություն և խուսափի անբարեհաճ բառաֆոնդից ու չխախտի փաստաբանի և նրա վստահորդի իրավունքներն ու օրինական շահերը:

Այսպես.

1. Վարույթն իրականացնող մարմինը 8 օր շարունակ հրաժարվում էր ինձ՝ որպես Տիգրան Խաչատրյանի պաշտպան, ներգրավելը, որի մասին տեղյակ է նաև ՀՀ ՄԻՊ-ը,

2. Խուլիգանության մեղադրանքի վերաբերյալ քննիչը չի ներկայացրել որևէ ապացույց, որ իմ պաշտպանյալը դրսևորել է հասարակության նկատմամբ անհարգալից վերաբերմունք և խուլիգանական արարք է կատարել,

3. Քննչական մարմինը փաստացի հրաժարվում է հարցաքննել առանցքային վկային՝ վախենալով հետևանքներից, որը կարող է բերել քրեական գործի բեկմանը:

Կոչ եմ անում դատավարական բոլոր կողմերին և նրանց հետ առնչվող կամ փոխկապացված պաշտոնյաններին դրսևորել գերզսպվածություն և մասնագիտական հարթությունից որևէ պարագայում դուրս չգալ: Դա կարող է համարվել ճնշում քրեական վարույթի ընթացքի վրա:

Հարգանքով՝

Տիգրան Խաչատրյանի պաշտպան

Վահագն Քեշիշյան