Առուշն ու Նիկոլի տենդերները. Ինչպե՞ս երբեմնի կոշտ ընդդիմադիրը դարձավ իշխանության բիզնես պարտնյորը

 

44-օրյա պատերազմից հետո ընդդիմադիր կեցվածքով հանդես եկող, տևական ժամանակ էլ անազատության մեջ անցկացրած Առուշ Առուշանյանն այսօր Նիկոլ Փաշինյանի ջերմ գործընկերն է դարձել, նրան դիմավորում է, նաև իր կողմից դավաճան հռչակված վարչախմբի պարագլխի հետ սեղան նստում, իրեն քննադատողներին էլ սպառնալիքներ տալիս։

Փաշինյանի հրաժարականը պահանջող Առուշանյանն այսօր հայտարարում է, թե ժողովուրդն է ընտրել նրան, ինքն էլ պարտավոր է դիմավորել վարչապետին։ Ավելին, Գորիսի քաղաքապետը հայտարարում է, թե իրեն քննադատում են «կանանց ներքնաշորի տակ թաքնված, պատերազմից փախածները», իսկ ինքը՝ պատասխանատու է 30 հազար քաղաքացու կյանքի համար։

Առուշանյանը չխորշեց քար նետել բոլոր այն մարդկանց "բոստանը", որոնց հետ ճանապարհ են անցել, մի կուսակցության կազմում պայքարել Նիկոլ Փաշինյանի դեմ։ Հոխորտալու և սպառնալու "արանքում" Առուշը գուցե բացատրեր, թե այդ ինչպես մոռացավ Փաշինյանին հասցեագրած իրենց իսկ «սյունյաց ողջույնները»։

Այս ամենը շատ պարզ բացատրություն ունի։ Մի քանի խոշոր ընկերությունների սեփականատեր Առուշանյանն այժմ դարձել է գործող վարչախմբի շահառուներից մեկը, խոշոր տենդերներ է շահում, լուծում սեփական բիզնեսի հարցերը, իսկ այդ հարցում նրան աջակցում է Սյունիքի մարզպետ Ռոբերտ Ղուկասյանը։ Վերջինս կարողացել է լեզու գտնել Սյունիքի երբեմնի կոշտ ընդդիմադիր շրջանակների հետ, պետական գանձարանի հաշվին էլ լավություններ է անում։

Իսկ Առուշ Առուշանյանը արդեն Գորիսում ավելի քիչ ժամանակ է անցկացնում, քան երևանյան սրճարաններում, որտեղից էլ, երևի, մերթընդմերթ փրկում է հայրենիքը։

Այսպիսով, քաղաքական փուչիկը տրաքեց: Հաջորդիվ կանդրադառնանք նաև այն հարցին, թե որտեղ էր Առուշ Առուշանյանը 44-օրյա պատերազմի ժամանակ և ինչ «խրամատում»

Հովսեփ Գրիգորյան