Բորտուղեկցորդուհուց մինչև Քարդաշյանների կայսրության պարագլուխ. Քարդաշյանների մոր և ընտանիքի ուշագրավ պատմությունը

Ամերիկյան շուոբիզնեսի հանրահայտ դեմքերից Քարդաշյան քույրերի թեման շարունակում է մնալ տարբեր լրատվամիջոցների ուշադրությա կենտրոնում: Քարդաշյան ընտանիքի կյանքին և գործունեությանը ժամանակ առ ժամանակ անդրադառնում են գրեթե բոլոր միջազգային լրատվամիջոցները:

Փորձենք ծաղկաքաղ անել այդ հրապարակումներից և փորձենք ճշտել, թե որն է նրանց հաջողության գրավականը:

Այդ առումով ժամանակին ուշագրավ հոդված է հրապարակել թուրքական «Հյուրրիյեթ»-ը:

«Ի՞նչ գիտենք Քարդաշյանների մասին: Քրիս Ջեներն ու նրա երեխաները` Քորթնին, Քիմը, Քլոեն, Ռոբերտը, Քենդալն ու Կայլին, Հոլիվուդի այն ընտանիքներից են, ովքեր միշտ գտնվում են ուշադրության կենտրոնում: Կարելի է ասել, որ նրանք այնքան էլ չեն փայլում ոչ իրենց դերասանական տաղանդով, ոչ էլ մարմնի գեղեցկությամբ: Սակայն այդ ամենով հանդերձ Քարդաշյանների ընտանիքն անցած տարի ավելի շատ գումար` 65 միլիոն դոլար է վաստակել, քան Ջենիֆեր Լոպեսը, Թոմ Քրուզն ու Սանդրա Բալոքը»,- գրում է «Հյուրրիյեթը»` ավելացնելով. «Իսկ ինչո՞ւ հենց Քարդաշյանները: Ինչո՞ւ է բոլոր ամերիկացիներին հետաքրքրում Քարդաշյան ազգանունը կրողների վեճերը, հարաբերությունները: Եվ ինչո՞ւ է Քիմ Քարդաշյանը, ում անունը հայտնի դարձավ ընդամենը 4 տարի առաջ սեքս տեսանյութի պատճառով, Google-ում ներկա պահին ամենից շատ որոնվող անունների մեջ զբաղեցնում 4-րդ հորիզոնականը»:

Փորձելով գտնել բոլոր այդ հարցերի պատասխանը` «Հյուրրիյեթը» գրում է, որ Քարդաշյանների հաջողության գրավականը նրանց մոր` Քրիս Ջենների կողմից իրականացվող ճիշտ մենեջմենթն է և հենց Ջեններն էլ հանդիսանում է Քարդաշյանների կայսրության ղեկավարը: «Հյուրրիյեթը» նշում է, որ Քարդաշյանների աշխատած ողջ գումարի ուղիղ 10%-ը մտնում է նրանց մոր` Քրիս Ջեների գրպանը:

Պարբերականը նշում է, որ Քարդաշյան ընտանիքի հաջողության գրավականը հատուկ ռազմավարությունն է, որի միջոցով էլ ընտանիքը կարողանում ե մեծ գումարներ վաստակել: Այդ ռազմավարության մեջ առանձին տեղ է հատկացվում սոցիալական ցանցերին, որոնց միջոցով էլ Քարդաշյաններն ազդեցություն են գործում իրենց երկրպագուների վրա (ընտանիքը Twitter սոցիալական ցանցում ունի ընդհանուր առմամբ 13 միլիոն հետևորդ), ինչպես նաև քույրերի Keeping Up With Kardashians ռեալիթի շոուն` շաբաթական 3,5 միլիոն հեռուստադիտողով:

«Իրանակում Քարդաշյաններին մեծ գումար է բերում նրանց ռեալիթի շոուն: «Այդ շոուն մեզ համար 30 րոպեանոց գովազդ է»,- խոստովանում է Քլոեն: Բացի այդ, իրենց մոր հորդորների շնորհիվ քույրերը բավական ակտիվ են նաև սոցիալական ցանցերում: Միայն Քիմ Քարդաշյանը Twitter սոցիալական ցանցում ունի 6 միլիոն հետևորդ: Ներկա պահին Քիմը Twitter-ի իր էջում որևէ ապրանքանիշի անվանում գրելու համար վերցնում է 25 հազար դոլար: Քարդաշյաններն այնքան ակտիվ են սոցիալական ցանցերում, որ նրանց հետ պայմանագիր կնքող ընկերությունները պայմանագրերում հատուկ կետ են մտցնում սոցիալական ցանցերի մասին»,- գրում է «Հյուրրիյեթը»` նշելով, որ Քարդաշյան քույրերին կարելի է տեսնել ոչ միայն հեռուստատեսությամբ և սոցիալական ցանցերում:

Թերթն առանձին անդրադարձել է նաև քույրերից յուրաքանչյուրի ֆինանսական վիճակին և նշել, որ նրանցից ամենաշատը վաստակում է Քիմը:

«Քիմ Քարդաշյանը որևէ միջոցառման ժամանակ երևալու համար պահանջում է 100-250 հազար դոլար: Իսկ եթե միջոցառումը միջազգային է, այդ գումարը կարող է հասնել մինչև 1 միլիոն դոլարի: Քիմի քույրերը` Քլոեն և Քորթնին, վերցնում են ընդամենը 25 հազարական դոլար: Քարդաշյան քույրերը որևէ ամսագրի շապիկը զարդարելու համար ցանկացած աստղից ավելի շատ գումար են պահանջում: Օրինակ, Քիմի լուսանկարը կրող Allure-ը 2010թ. դարձել է ամենաշատ վաճառվող ամսագիրը: Քորթնին 300 հազար դոլար է վաստակել միայն այն բանի համար, որ Life and Style ամսագրին պատմել է իր հղիության մասին»,- գրում է «Հյուրրիյեթը»` նշելով, որ քույրերը բավականին մեծ գումարներ են վաստակել նաև իրենց հարսանիքների շնորհիվ:

«Հյուրրիյեթը» առանձին «Հայի տուն հարս եկավ և սովորեց` ինչպես ջուրը գինի դարձնել» խորագրով անդրադարձել է նաև Քարդաշյանների մորը` Քրիս Ջեներին:

«Քարդաշյանների կայսրության գլուխ կանգնած Քրիսը նախկինում եղել է բորտուղեկցորդուհի: Առաջին անգամ նա ամուսնացել է հայտնի փաստաբան Ռոբերտ Քարդաշյանի հետ: Իսկ մինչև իր ամուսնալուծությունը` 1990թ., Քրիսն հասցնում է սովորել գումար վաստակելու գաղտնիքները: 1991թ. Քրիս Ջեներն ամուսնանում է նախկին օիմպիական չեմպիոն Բրյուս Ջեների հետ»,- գրել է «Հյուրրիյեթը»: