Մարդկանց ձնաբքից պաշտպանելու համար ՏԿԱԻՆ-ն ստեղծում է հենակետեր

Հաշվի առնելով այս տարվա սկզբին հանրապետության տարածքում գրանցված առատ տեղումները և ձնաբքի հետևանքով առաջացած արտակարգ իրավիճակները` ՀՀ ՏԿԱԻ նախարարությունը որոշել է ՀՀ մարզերում ծավալել ժամանակավոր հենակետեր` ձյան մեջ արգելափակված քաղաքացիներին հրատապ օգնություն ցուցաբերելու համար:

Ինչպես «Արմենպրես»-ին տեղեկացրին ՀՀ տարածքային կառավարման եւ արտակարգ իրավիճակների նախարարությունից, հունվարի 13-ին ՀՀ ՏԿԱԻՆ շարահրապարակում տեղի կունենա ձնաբքի դեպքում մարդկանց աջակցության ժամանակավոր հենակետի ծավալման ցուցադրություն, որի ընթացքում կներկայացվեն տվյալ իրավիճակում քաղաքացիներին օգնություն տրամադրելու միջոցները: Սահմանված տարածքներում տեղադրվելու են արագ ծավալվող վրաններ, որոնք հագեցած են լինելու մարդկանց ժամանակավոր պատսպարման, ցուրտ եղանակին ջերմությամբ և տաք սննդով ապահովելու միջացներով: Վրանը կարող է նաև ծառայել որպես տեղում կազմակերպված փոքր շտաբ` արագ արձագանքման ծառայությունների համար:

2015թ. դեկտեմբերի 31-ից մինչև 2016թ. հունվարի 11-ն ընկած ժամանակահատվածում ՀՀ ՏԿԱԻՆ Ճգնաժամային կառավարման ազգային կենտրոնը հանրապետության տարածքում արձանագրել է ձնաբքի մեջ մարդկանց և տրանսպորտային միջոցների արգելափակման 236 դեպք: Այդ օրերին փրկարարների ուժերով ձնաբքից անվտանգ տարածք է տեղափոխվել 3147 մարդ և 1265 տրանսպորտային միջոց: