Շատ արցախցիներ ցանկանում են մնալ Ալավերդիում, քանի որ իրենց Արցախի բնակավայրն է հիշեցնում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Աշխատանքներ են տարվում մարդկանց տեղավորելու հարցում, հաշվառվողների թիվը գնալով ավելանում է։ Այս մասին MediaHub-ի հետ զրույցում հայտնեց Վանաձորի համայնքապետարանի ներկայացուցիչը։ 

«Այս պահին բռնի տեղահանված արցախցիների թիվը Վանաձորում հատել է 1000-ը։ Անձը մոտենում է Վանաձորի համայնքապետարան, հաշվառվում է և անմիջապես իրականացվում է կարիքի գնահատում։ Փորձում ենք միանգամից լուծել կացարանի հարցը, սակայն հարցը շատ սուր է․ ոմանք այստեղ ունեն հեռու բարեկամներ կամ ծանոթներ, ովքեր տեղավորվում են և հետո իրենց բարեկամներին են կանչում»։

MediaHub-ը կապ հաստատեց նաև Ալավերդու համայնքապետարանի ներկայացուցչի հետ, ով նշեց հետևյալը․

«Վերջին տվյալներով մոտ 90 ընտանիք ունենք այստեղ, փորձում ենք ապահովել այն ամենով, ինչով կարող ենք։ Շատերը ցանկանում են հենց այստեղ մնալ, քանի որ Ալավերդին և հարակից գյուղերը արցախցիներին իրենց Արցախի բնակավայրն են հիշեցնում»։ 

MediaHub-ը կապ հաստատեց Կապանի քաղաքապետ Գևորգ Փարսյանի հետ, ով մեզ ներկայացրեց Կապանում ստեղծված իրավիճակը․ 

«Այս պահի դրությամբ ունենք մոտ 1000 արցախցի, հնարավորությունների սահմանում ապահովում ենք թե՛ կացարանով, թե՛ սնունդով և թե՛ առաջին անհրաժեշտության պարագաներով»,- նշեց Փարսյանը։

Հիշեցնենք, որ վերջին տվյալներով՝ ԼՂ-ից բռնի տեղահանված 100․514  անձ է ժամանել Հայաստան: Հակարիի կամուրջը հատել է 21.106 տրանսպորտային միջոց:

Մարիա Զարգարյան