Կառավարությունը հստակ քայլերով պետք է ցույց տա, որ կարող է հաղթահարել տնտեսական մարտահրավերները

Հայաստանը 2016 թ. կանգնած է տնտեսական լուրջ մարտահրավերների առջև՝ պայմանավորված հատկապես Ռուսաստանում տեղի ունեցող զարգացումներով: Հունվարի 13-ին լրագրողների հետ հանդիպմանն այսպիսի կարծիք հայտնեց ԱԺ ԲՀԿ խմբակցության պատգամավոր Միքայել Մելքումյանը:

«Մեր տնտեսությունն այնքան դիվերսիֆիկացված չէ, որպեսզի մենք կարողանանք խուսափել Ռուսաստանի տնտեսական բարդությունների ազդեցությունից: Նավթի գները շարունակում են անկում ապրել, իսկ ռուբլին՝ արժեզրկվել: Դուք գիտեք, որ մենք անցած տարի մեծածավալ տրանսֆերտներ կորցրեցինք ռուբու արժեզրկման հետևանքով: Այս տարի էլ տարբեր կանխատեսումներով նավթի գները նվազման միտում ունեն, իսկ դա նշանակում է, որ ռուբլին էլ ավելի է արժեզրկվելու: Հարց է առաջանում՝ մեր հայրենակիցները, ովքեր աշխատում են Ռուսաստանում, ի՞նչ ծավալի գումարներ են ուղարկելու Հայաստան այս պայմաններում: Հիմա հնարավոր է, որ մեր հայրենակիցների մի մասը չգնա Ռուսաստան աշխատելու և մնա Հայաստանում: Մենք պետք է կարողանանք ճիշտ կանխատեսել այդ արտաքին մարտահրավերները, սպառնալիքները»,-՝ նշեց Մելքումյանը:

Պատգամավորն ասաց, որ կառավարությունը պետք է 4-5 պարզ քայլերով ցույց տա, որ Հայաստանն այս տարի կարողանալու է հաղթահարել տնտեսական բոլոր մարտահրավերները, որքանով դա օբյեկտիվորեն հնարավոր է: «Առաջինը՝ շատ հստակ հակամենաշնորհային և մրցակցային հարաբերությունների բարելավման քաղաքականություն պետք է տարվի: Դա միայն խոսքով չէ, պետությունն այս առումով կամք պետք է ցուցաբերի»,- ասաց Մելքումյանը:

Երկրորդ կարևոր քայլը պատգամավորը համարում է ակտիվ պայքարը կոռուպցիայի դեմ: «Եթե կառավարությունը հակակոռուպցիոն քաղաքականությունը տանի ամենաարդյունավետ ձևով, դա միանշանակ լավ ազդեցություն կունենա տնտեսական և սոցիալական խնդիրների վրա: Ժողովուրդը պետք է զգա, որ կառավարությունն իր կողքին կանգնած է»,- նկատեց պատգամավորը:

Երրորդ կարևոր խնդիրը Միքայել Մելքումյանը համարում է ներդրումների պաշտպանության ապահովումը: Նրա խոսքով՝ ներդրողը պետք է վստահ լինի, որ իր ներդրումը պաշտպանված է լինելու, որ ինքը միայն շահելու է դրանից:

Չորրորդ հանգամանքը, որը Մելքումյանը համարում է ամենակարևորը, արտահանման խրախուսման ակտիվ քաղաքականությունն է և վարկավորման պայմանների բարելավումը: «Հարկավոր է գործարարներին տրամադրել ռուսական ռուբլով վարկեր, իսկ կառավարությունը մասամբ պետք է իր վրա վերցնի արտահանողների ռիսկերը: Օրինակ, եթե արտադրողները ցանկանում են իրենց արտադրանքը արտահանել, նրանք վախենում են, որ եթե գնան պայմանագիր կնքեն ռուսական որևէ կազմակերպության հետ, որպեսզի իրացնեն իրենց արտադրանքը, մի քանի ամիս հետո, երբ պետք է ստանան փողը, ռուսական ռուբլին արժեզրկվե լ է, և այդ դեպքում իրենց համար արտահանելը շահութաբեր չէ: Կառավարությունը պետք է կարողանա սուբսիդավորել այդ տարբերությունը: Կառավարությունը պետք է կանգնած լինի ցանկացած արտադրողի կողքին, մենք իրավունք չունենք թեկուզ մեկ արտադրողի կորցնել»,- եզրափակեց պատգամավորը: