Ադրբեջանի սահմանապահները Գուրգեն Ներսիսյանին որոշակի ժամանակ Հակարիի անցակետում պահել են արգելանքի տակ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Armlur.am-ը գրել է.

Սեպտեմբերի 19-ին Ադրբեջանի կողմից Արցախի ժողովրդի նկատմամբ սանձազերծված հերթական ագրեսիայից հետո արցախցիները ստիպված եղան լքել իրենց հայրենիքը՝ ֆիզիկական ոչնչացումից փրկվելու համար:

Ադրբեջանը Արցախը հայաթափելու համար անմիջապես բացեց ավելի քան 9 ամիս արգելափակված Լաչինի միջանցքը՝ ժողովրդի բռնի տեղահանումն ապահովելու համար՝ այդ ընթացքում Հակարիի կամրջի վրա տեղադրված ապօրինի անցակետից առևանգելով նախկին ու ներկա տարբեր պաշտոնատար անձանց:

Արցախը դատարկվելուց հետո Ադրբեջանը Բաքու տեղափոխեց նաև Արցախի երեք նախագահներին: Այդ ընթացքում լրատվադաշտը ուշադիր հետևում էր, թե արդյոք արցախյան պաշտոնյանները կկարողանան տեղափոխվել Հայաստան և յուրաքանչյուր այդպիսի դեպք հանրայնացվում էր կամ ՀՀ տեղափոխված պաշտոնատար անձինք էին հայտարարում այդ մասին:

Տևական ժամանակ էր որևէ տեղեկություն չկար Արցախի նախկին գլխավոր դատախազ, պետական նախարար Գուրգեն Ներսիսյանի մասին: Armlur.am-ը պարզեց, որ Գուրգեն Ներսիսյանը ընտանիքով նույնպես տեղափոխվել է ՀՀ: Սակայն այդ գործընթացը այդքան էլ սահուն չի անցել: Պարզվել է, որ Հակարիի կամրջին տեղադրված անցակետում ստուգման պահին ադրբեջանի սահմանապահ ծառայության աշխատակիցները անմիջապես ճանաչել են նրան և արգելանքի վերցրել:

Տևական ժամանակ նրա կինն ու երեխաները մնացել են մեքենայում միայնակ, իսկ Գ.Ներսիսյանը գտնվել է Ադրբեջանի սահմանապահ ծառայության աշխատակիցների վերահսկողության տակ: Գ.Ներսիսյանին ազատ են արձակել ՌԴ անվտանգության դաշնային ծառայության՝ Արցախում խաղաղապահ ուժերի կազմում ներառված աշխատակիցների միջնորդությամբ: Հարկ ենք համարում նշել, որ վերջին մեկ տարում Արցախում ռուսական խաղաղապահ ուժերի հետ համագործակցությունն ու շփումը հիմնականում ապահովվում էր Գ.Ներսիսյանի միջոցով, ինչը ամենայն հավանականության իր ազդեցությունն է ունեցել նրան ազատ արձակելու հարցում:

​Armlur.am-ի տեղեկություններով ՀՀ հասնելուն պես Գ.Ներսիսյանը հեռախոսազանգ է ունեցել Արցախի նախագահների հետ և տեղեկացրել դեպքի մասին: Մեր մեկ այլ աղբյուր էլ հայտնել է, որ Գ.Ներսիսյանի՝ ՀՀ տեղափոխվելը թույլատրելու մասին լուրը լսելուց հետո Ռուբեն Վարդանյանը նույնպես որոշել էր ռիսկի դիմել ու փորձել տեղափոխվել ՀՀ, սակայն, ինչպես տեսանք, դա նրան չհաջողվեց:

​Հատկանշական է, որ չնայած ակտիվ հանրային գործունեությանը, Գ.Ներսիսյանը ՀՀ տեղափոխվելուց հետո որևէ լրատվամիջոցի այդ մասին հարցազրույց չէր տվել և նույնիսկ չէր հայտարարել:

​Armlur.am-ին հաջողվեց հեռախոսակապ հաստատել պարոն Ներսիսյանի հետ, ով հաստատեց ՀՀ տեղափոխվելու, Հակարիի կամրջին ադրբեջանցիների կողմից իրեն արգելանքի վերցնելու և որոշակի ժամանակ անց ազատ արձակելու հանգամանքը: Վերջինիս պնդմամբ ինքը այդ մասին չի խոսել և չի բարձրաձայնել, քանի որ այդ ժամանակ Արցախում դեռևս պաշտոնյաններ կային, իսկ իր կողմից հայտարարություններ անելը, ինքնին Արցախից ՀՀ տեղափոխվելու մասին խոսելը կարող էր որոշակի խնդիրներ առաջացնել նրանց համար: Գ.Ներսիսյանը հաստատեց, որ ՀՀ հասնելուն պես հեռախոսային խոսակցություն է ունեցել նախկին նախագահներից Բակո Սահակյանի և Արայիկ Հարությունյանի հետ, սակայն հրաժարվեց զանգի բովանդակության մասին տեղեկություններ փոխանցելուց: Այն հարցին, թե ինչով է զբաղվելու ՀՀ-ում և արդյոք պետական համակարգում աշխատելու առաջարկ ստացել է, թե ոչ, Գ.Ներսիսյանը հայտնեց, որ աշխատանքի առաջարկ չի ստացել, մասնագիտությամբ իրավաբան է և կփորձի դրան համապատասխան աշխատանք գտնել: