Գեներալ Մանվելի հարցով՝ դատախազություն, Շուշան Պետրոսյանի հարցով՝ էթիկայի հանձնաժողով

Այսօր Հելսինկյան քաղաքացիական ասամբլեայի Վանաձորի գրասենյակի կողմից փոստային առաքմամբ դիմում է ներկայացվել Ազգային ժողովի էթիկայի հանձնաժողով՝ ՀՀԿ խմբակցության պատգամավոր Շուշան Պետրոսյանի կողմից «ՀՀ Ազգային ժողովի կանոնակարգ» օրենքով սահմանված էթիկայի նորմերը խախտելու, մասնավորապես՝ ֆեյսբուքյան օգտատեր Գայանե Շահինյանի հասցեին հնչեցրած բռնության եւ սպառնալիքի կոչերի ու վիրավորական արտահայտությունների վերաբերյալ որոշում կայացնելու հարցով:

Այս մասին տեղեկացանք ՀՔԱՎ մամլո ծառայությունից:

Հիշեցնենք, որ պատգամավորի կողմից վերոնշյալ սպառնալիքները հնչեցնելու վերաբերյալ www.armtimes.com լրատվական կայքում 2016 թվականի հունվարի 11-ին հրապարակվել էր «Լսի՛, ա՛յ լակոտ, աչքերդ կհանեմ». Շուշան Պետրոսյան» վերնագրով նյութը: Նույն օրը www.hraparak.am լրատվական կայքում հրապարակվել է «Էջմիածնի նախկին քաղաքապետը հաստատում է գեներալ Մանվելի հետ ունեցած միջադեպը» վերնագրով նյութը, որտեղ ներկայացվում է, թե ինչպես են 2015 թվականի դեկտեմբերի 29-ին ՀՀ Ազգային ժողովի պատգամավոր, գեներալ Մանվել Գրիգորյանի մարդիկ ծեծի ենթարկել Էջմիածնի նախկին քաղաքապետ Հրաչիկ Աբգարյանին:

Նույնաբովանդակ նյութ հրապարակվել է նաեւ tert.am լրատվական կայքում: Վերոնշյալ դեպքի վերաբերյալ ՀՔԱ Վանաձորի գրասենյակի կողմից 2016 թվականի հունվարի 13-ին փոստային առաքման միջոցով հանցագործության մասին հաղորդում է ներկայացվել ՀՀ Գլխավոր դատախազություն՝ քրեական գործ հարուցելու, հանցագործություն կատարած անձանց պատասխանատվության ենթարկելու պահանջով:

Գագիկ Աղբալյան