Մանդատը վերցնելու հարցի պատասխանը մի քանի օրից Լևոն Քոչարյանի կողմից կհնչի. Խամոյան

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Քիչ առաջ ՀՅԴ Հայաստանի Գերագույն մարմնի անդամ Գերասիմ Վարդանյանը հայտարարեց, որ հրաժարվում է պատգամավորական մանդատից։

Նշենք, որ նա պետք է փոխարինելու գար «Հայաստան» խմբակցության պատգամավոր Արմեն Չարչյանին, որն իր մանդատն արդեն վայր է դրել: 

Տեղեկացնենք, որ Չարչյանի՝ մանդատից հրաժարվելու լուրերից հետո «Հայաստան» դաշինքի նախընտրական ցուցակի հերթական համար Միհրդատ Մադաթյանը հայտարարել էր, որ վերցնելու է մանդատը։

Սակայն, ինչպես մեր աղբյուրներն են հայտնում, թե՛ Մադաթյանը, թե՛ նրան հաջորդող Անժելա Նալբանդյանը և թե՛ Գերասիմ Վարդանյանը, ընդհանուր որոշումից հետո, հրաժարվել են իրենց մանդատներից։ Եվ այժմ հերթը Լևոն Քոչարյանինն է, որը նախընտրական ցուցակի 50-րդ համարն է։ 

Հիշեցնենք նաև, որ ՀՀ երկրորդ նախագահի որդին այս պահին կալանքի տակ է։ Նա Հանրապետության հրապարակում տեղի ունեցած բողոքի ակցիայի ժամանակ  բերման էր ենթարկել, ապա տեղափոխվել էր հիվանդանոց, որտեղից էլ նրան ձերբակալել էին:

Փաստաբան Ալեքսանդր Կոչուբաևի հաղորդմամբ` ոստիկանները հաղորդում են ներկայացրել, որ Լ. Քոչարյանը 4 կարմիր բերետավորի է ծեծել: Այս ամենից հետո նրան մեկ ամսով կալանավորեցին։

Կվերցնի՞ արդյոք նա մանդատը․ MediaHub.am-ը հարցն ուղղեց «Հայաստան» խմբակցության պատգամավոր Ագնեսա Խամոյանին։

«Ցուցակի հերթական համարը Լևոն Քոչարյանն է։ Բայց հարցին, թե արդյոք նա վերցնելու է մանդատը, չեմ կարող ասել՝ նաև օբյեկտիվ պատճառներից ելնելով, քանի որ Լևոն Քոչարյանը կալանքի տակ է, ու կա ինֆորմացիայի դեֆիցիտ։ Կարծում եմ՝ այս հարցի պատասխանը մի քանի օրից հենց իր կողմից է հնչելու»,- ասաց Խամոյանը։

Այլ մեկնաբանություններից մեր զրուցակիցը հրաժարվեց:

Նարե Գնունի