Կիրիլ պատրիարքի հայտարարությունն անհետեւանք չի մնացել. ռուսահայերն ընդվզում են

Երեկ Սանկտ Պետերբուրգի եւ այլ քաղաքների, որոնց անվանումները չի նշվում, հայ համայնքի ակտիվիստների մի խումբ, մտահոգ Համայն Ռուսիո պատրիարք Կիրիլի հունվարի 7-ի հայտարարությամբ, թե անգամ Օսմանյան կայսրությունում քրիստոնյաների հետապնդում չի եղել, պատրաստվել է 15 էջանոց բաց նամակ: Այս մասին տեղեկանում ենք Պետերբուրգի հայ համայնքի մեր աղբյուրներից: Նամակն ուղարկվել է Սանկտ Պետերբուրգի եւ Լադոժսկի միտրոպոլիտ Վարսոնոֆի սրբազանին: Տեքստում հայ համայնքի ներկայացուցիչները Համայն Ռուսիո պատրիարքի հարցազրույցի վերաբերյալ իրենց դիրքորոշումն են հայտնել՝ նշելով, որ այնտեղ իրականությունը խեղաթյուրվել է: Նամակագիրները նաեւ եկեղեցականների հետ հանդիպման եւ հարցը հանգիստ քննարկելու առաջարկով են հանդես եկել:

Պետք է նշել, որ նամակում բավական համարձակ ձեւակերպումներ կան: «Բոլորն էլ մեղավոր են եւ սխալներ գործում են: Հունվարի 7-ին Դմիտրի Կիսելյովին տված հարցազրույցում Սրբազնագույն Կիրիլ պատրիարքի արտահայտությունը համարում ենք անթույլատրելի սխալ, ինչպես նաեւ պատրիարքի մամլո քարտուղար Ալեքսանդր Վոլկովի բացատրությունն այդ թեմայով համարում ենք ոչ բավարար: Պատմական ռուս-հայկական հոգեւոր, մշակութային, այսօր նաեւ ռազմավարական հարաբերությունները մեծ արժեքներ են, որը պարտավոր ենք պահել, զարգացնել եւ փոխանցել հաջորդ սերունդներին: Ցավոք, ոչ առանց սխալների, փչացել են Ռուսաստանի հարաբերությունները բազմաթիվ քրիստոնեական բարեկամ երկրների հետ: Եվ ամեն անգամ դրանց հիմքում եղել են «պատահական սխալներ», ոչ միայն պատմական, այլեւ ներկայիս արագ փոփոխվող իրականության սխալ գնահատականներ: Մեր ասածն այն է, որ նույն ճակատագիրը բաժին չհասնի հայ-ռուսական հարաբերություններին»,-սա մեջբերում էր ռուսահայերի նամակից:

Նամակը ստորագրել է 30 անձ, որից 16-ը Պետերբուրգից, մյուսները՝ այլ քաղաքներից: Հայտարարությունը համացանցում տեղադրված է, որպեսզի ցանկացողները միանան դրան:

Գագիկ Աղբալյան