«Գիտության հետ համագործակցող բիզնեսները պետք է ծանրակշիռ մեծամասնություն կազմեն Հայաստանում»․ «Փաստ»

«Փաստ» օրաթերթը գրում է.

Դեկտեմբերի 1-ին և 2-ին Երևանում տեղի ունեցավ «Գիտության և գործարարության օրեր-2023» համաժողովը: Բացմանը ողջույնի խոսքով հանդես եկան էկոնոմիկայի նախարար Վահան Քերոբյանը, ԿԳՄՍ նախարար Ժաննա Անդրեասյանը, առցանց ուղերձով մասնակիցներին ողջունեց Նոբել յան մրցանակակիր, պրոֆեսոր, «Գիտության և գործարարության օրեր-2022»-ի պատվավոր հյուր Արդեմ Փաթափությանը։ Այս տարի համաժողովի պատվավոր հյուրն էր աշխարհահռչակ փիլիսոփա, գրող և գիտնական Նասիմ Թալեբը։ Համաժողովի ընթացքում հայ և օտարերկրյա գիտնականներն ու գործարարները հանդես եկան ելույթներով, տեղի ունեցան պանելային քննարկումներ, որոնք ուղղված էին գործարար ու գիտական միջավայրի կարողությունների, գիտության ու բիզնեսի փոխգործակցության ընդլայնմանը: Համաժողովը հնարավորություն տվեց անձամբ զրուցելու պաշտոնյաների և կազմակերպությունների ներկայացուցիչների հետ: Էկոնոմիկայի նախարարի տեղակալ Անի Իսպիրյանը «Փաստի» հետ զրույցում հիշեցրեց՝ ֆորումն անցկացվում է արդեն երկրորդ տարին:

«Անցած տարի մեր հատուկ հյուրն Արդեմ Փաթափությանն էր: Նա հայազգի առաջին Նոբել յան մրցանակակիրն է: Մինչ իր ժամանելը հասկացանք, թե որքան ոգևորված է մեր հանրությունը, և որոշեցինք գիտությանն ու գործարարությանը նվիրված՝ ծավալներով ավելի մեծ համաժողով կազմակերպել: Դրական ազդակներ ստացանք տարբեր շրջանակներից, արդյունքում որոշեցինք, որ համաժողովը պետք է լինի ամենամյա: Այս տարի արդեն հյուրընկալում ենք օտարերկրյա հայտնի բանախոսների, մեր պատվավոր հյուրը Նասիմ Թալեբն է, որն, ի դեպ, առաջին անգամ է Հայաստանում»,- ասաց Իսպիրյանը: Էկոնոմիկայի նախարարի տեղակալն ընդգծեց՝ մեր գործարար միջավայրը պետք է լինի գիտելիքի վրա հիմնված:

«Մեր հաջողության հիմքում պետք է լինի գիտելիքը: Գիտությունն առաջին հերթին ստեղծվում է մարդկանց, նրանց մտավոր կարողությունների շնորհիվ: Մեր հարստությունը մարդիկ են: Հայաստանում այսօր արդեն կան ընկերություններ, որոնք տարբեր ֆորմատներով համագործակցում են գիտության հետ, բայց անկեղծ լինելով պետք է ասել, որ նմանատիպ բիզնեսները դեռ փոքրամասնություն են կազմում: Այս համաժողովի նպատակն է, որ գիտության հետ համագործակցող բիզնեսները լինեն ծանրակշիռ մեծամասնություն, Հայաստանն էլ դառնա մեր մայրցամաքի Սիլիկոնյան հովիտը»,-նշեց մեր զրուցակիցը: Համաժողովի ընթացքում հյուրերը կարող էին ծանոթանալ նաև տարբեր ընկերությունների առաջարկների: Նրանցից մեկը Armbionics ընկերությունն է, որը զբաղվում է վերին վերջույթների պրոթեզների արտադրությամբ և համապարփակ լուծումների ներկայացմամբ ամպուտացիա ունեցող անձանց համար:

«Պրոթեզների ստեղծման համար օգտագործում ենք տարբեր տեխնոլոգիաներ: Նախ և առաջ տեղի է ունենում եռաչափ մոդելավորում, ծրագրի միջոցով ստեղծվում է համապատասխան մոդելը: Դրանից հետո պատրաստվում է պրոթեզը: Յուրաքանչյուր մասը պատրաստվում է տարբեր նյութերից, մետաղական նյութերը պատրաստվում են սիէնսի տեխնոլոգիայի միջոցով: Օգտագործում ենք նաև եռաչափ տպագրությունը»,-մեզ հետ զրույցում ասաց ընկերության համահիմնադիր և տնօրեն Մարինա Դավթյանը:

Ընկերությունն առաջարկում է մի քանի տեսակի պրոթեզներ: «Կան պրոթեզներ, որոնք աշխատում են մեխանիկական աշխատանքի՝ արմնկային կամ դաստակային հոդի ծալման միջոցով, ունենք միոէլեկտրիկ կառավարման պրոթեզներ, որոնք աշխատում են մկաններից ստացված էլեկտրական ազդակների միջոցով: Օգտագործում ենք սենսորներ, որոնց միջոցով մկաններից գրանցում ենք էլեկտրական ազդակներ և փոխանցում շարժիչներին, ինչի միջոցով արդեն մարդը կարող է ձեռքը շարժել և տարբեր գործողություններ իրականացնել: Այս պրոթեզները կիրառական են առօրյա կյանքում, մարդը կարող է տոպրակ բռնել, բաժակ վերցնել և այլն: Մեր պրոթեզները փորձարկել ենք Հայաստանում մի քանի պացիենտների և պրոթեզարանների հետ և արդեն պատրաստում ենք մեր արտադրական նմուշը, որի միջոցով կսկսենք արտադրանք ներկայացնել և՛ Հայաստանում, և՛ արտերկրում»,-եզրափակեց ընկերության համահիմնադիրը:

«Գիտության և գործարարության օրեր2023» համաժողովը լինելու է ամենամյա: Ինչպես նշում են բանախոսները, կարևոր է ոչ միայն համաժողովի, պանելային քննարկումների անցկացումը, այլ նաև դրանց ընթացքում լավագույն մտքերի գործածումը մեր տնտեսության մեջ:

ԼՈՒՍԻՆԵ ԱՌԱՔԵԼՅԱՆ

Մանրամասները՝ «Փաստ» օրաթերթի այսօրվա համարում