Սերգեյ Մինասյանը չի բացառում «Ժառանգության» կազմաքանդումը

Քաղաքագետ Սերգեյ Մինասյանը չի բացառում, որ «Ժառանգություն» կուսակցությունն այս տարի կարող է կառուցվածքային և մարդկային կազմալուծման ենթարկվել: Հունվարի 15-ին լրագրողների հետ հանդիպմանը քաղաքագետը կարծիք հայտնեց, որ «Ժառանգության» տեղը կարող է զբաղեցնել Նիկոլ Փաշինյանի ղեկավարած քաղաքական ուժը՝ «Քաղաքացիական պայմանագիր» կուսակցությունը:

«Փորձը ցույց է տալիս, որ Րաֆֆի Հովհաննիսյանի գլխավորած կուսակցությունը լուրջ փորձությունների առջև է կանգնած: Այստեղ աշխատել է և՛ սուբյեկտիվ գործոնը, և՛ նաև օբյեկտիվ գործոններն են դրան նպաստել»,- «Արմենպրես»-ի հաղորդմամբ՝ ընդգծեց Մինասյանը:  Քաղաքագետը նշեց, թե այն դաշտը, որն այս պահին զբաղեցնում է «Ժառանգություն»-ը, տարբեր ժամանակներում փորձել են զբաղեցնել տարբեր քաղաքական ուժեր: «Ժառանգության դեպքում մենք ունեցանք մի իրավիճակ, երÕ ¢ վերջին տարիների ընթացքում ոչ միայն կուսակցության տարբեր քաղաքական գլխավոր դերակատարները դուրս եկան, այլ նաև «Ժառանգության» խորհրդարանական խմբակցությունն այս պահին մեկ հոգուց է բաղկացած այն դեպքում, երբ սկզբում այն 5-հոգիանոց խմբակցություն էր: «Ժառանգություն»-ը լուրջ ճգնաժամի մեջ է այս պահին»,- ընդգծեց Մինասյանը:

Մինասյանը նաև հավելեց, որ իր համար քաղաքական դաշտում «Ժառանգություն» կուսակցության տեղը զբաղեցնելու լուրջ հավակնորդը Նիկոլ Փաշինյանի քաղաքական ուժն է: «Թե որքանով կկարողանա Նիկոլ Փաշինյանի քաղաքական ուժը զբաղեցնել այդ տեղը, ես հիմա կդժվարանամ ասել, սակայն ինձ համար միակ հավակնորդը հենց այդ քաղաքական ուժն է: Չեմ բացառում, որ կարող է ինչ-որ հրաշք տեղի ունենա և «Ժառանգություն»-ը վերածնվի, սակայն ես այս պահին դա այդքան էլ հնարավոր չեմ համարում»,- եզրափակեց քաղաքագետը: