Ֆուտբոլի ժամանակ ռեժիմը «պատկատ» է արել 13-ամյա Վալոդիկին

ԲԼՈԳ 15 Հունվար, 2016 18:42

Տիգրանուհի Դավթյանը ֆեյսբուքյան իր էջում գրում է.

«Նոր Հայաստան» հանրային փրկության ճակատն իր ֆեյսբուքյան էջում տարածել է հայտարարություն, ըստ որի հունվարի 12-ին ծեծի է ենթարկվել անչափահաս երեխա:

Հայտարարության մեջ մասնավորապես նշվում է, որ երկու հոգի դարանակալել և ծեծել են «Նոր Հայաստան» հանրային փրկության ճակատի համակիր, 16-ամյա Հովհաննես Հարությունյանին՝ նրան պատճառելով մարմնական վնասվածքներ:

Բացի դա նշվում է, որ ծեծից առաջ նրանք վեճ են հրահրել՝ բացահայտ կերպով նշելով, որ Հովհաննեսը ճիշտ ուղի չի ընտրել և պետք է հրաժարվի դրանից: Եվ վերջում մեջբերեմ ամենակարևորը. «Հանցավոր վարչախումբն արդեն թիրախավորված կերպով հարձակվում է անչափահաս երեխաների վրա»:

Նախ անհասկանալի է «Նոր Հայաստանի» տրամաբանությունը: Օրինակ ըստ նրանց 16-ամյա Հովհաննեսը «ռեժիմի համար» ի՞նչ վտանգ կարող էր ներկայացնել, որ ծեծը վերագրում են «հանցավոր վարչախմբին»: Հայտարարությունից մոտավորապես հասկանում եմ այն, որ ռեժիմը ռեպրեսիաների միջոցով փորձում է կանխել 16-ամյա հեղափոխական Հովհաննեսի հուժկու գործողություններն ու նրա կողմից իրականացվելիք իշխանափոխությունը: Կամ ինչու՞ պետք է ռեժիմը ծեծեր Հովհաննեսին: Չկա՞ր արդյոք ուրիշ ավելի հասուն ու թիկնեղ, ավելի «երևացած ֆիգուր» «Նոր Հայաստանում», որ պետք է երեխային ծեծեին:

«Ռեժիմը անչափահաս է ծեծում» արտահայտությունը, ինչ որ դրամատիկ կինոկատակերգության վերնագիր է հիշեցնում: Հետաքրքիր է մինչև ու՞ր է հասնում Նոր Հայաստանի երևակայությունը:

Երեխաները դուրսը վիճվում են ծեծում կամ ծեծվում են, «Նոր Հայաստանն» իր ֆեյսբուքյան լծակներն օգտագործում է երեխաների հրմշտոցը ռեժիմին վերագերլու համար: Ես լուրջ կասկածներ ունեմ, որ եթե երեխաները դուրս գան ֆուտբոլ խաղալու, խաղի ժամանակ ինչ որ մեկն ընկնի, քերծվածք ստանա, «Նոր Հայաստանը» հայտարարություն կտարածի ու կասի. «Ռեժիմը պատկատ է արել ազատության համար պայքարող 13-ամյա Վալոդիկին»: