Հայաստանը միանում է ԱՄԿ գլխավոր տնօրենի նախաձեռնած Սոցիալական արդարության համաշխարհային կոալիցիային․ «Փաստ»

«Փաստ» օրաթերթը գրում է.

Օրերս Հայաստանում առաջին անգամ անցկացվեց աշխատանքի միջազգային համաժողով: Համաժողովի, դրա կարևորության, Հայաստանի՝ Սոցիալական արդարության համաշխարհային կոալիցիային անդամակցելու մասին զրուցել ենք ՀՀ աշխատանքի և սոցիալական հարցերի նախարարի մամուլի քարտուղար Զարուհի Մանուչարյանի հետ: Նախ՝ հետաքրքրվում ենք, թե ինչո՞վ է կարևորվում այս համաժողովի անցկացումը մեր երկրում:

«Հայաստանում առաջին անգամ անցկացված աշխատանքի միջազգային համաժողովն իրականացվեց աշխատանքի և սոցիալական հարցերի նախարարության նախաձեռնությամբ և Աշխատանքի միջազգային կազմակերպության մասնակցությամբ։ Միջոցառմանը մասնակցում էին բարձրաստիճան պաշտոնյաներ և տարբեր կազմակերպությունների ներկայացուցիչներ՝ Արաբական Միացյալ Էմիրությունից, Կատարի Պետությունից, Հնդկաստանի Հանրապետությունից, Շվեդիայից, Սինգապուրից, Ուզբեկստանի Հանրապետությունից, Ֆրանսիայից և մի շարք այլ երկրներից։ Համաժողովի անցկացումը Հայաստանում կարևոր էր մի քանի տեսանկյունից. առաջինը՝ այն, որ աշխատանքի ոլորտի վերաբերյալ նմանօրինակ լայնամասշտաբ համաժողով չէր կազմակերպվել Հայաստանում։ Կարևոր էր նաև այն, որ Աշխատանքի միջազգային կազմակերպության տնօրեն Գիլբերտ Հունգբոն անձամբ մասնակցեց միջոցառմանը. մինչ այս ԱՄԿ-ից որևէ ներկայացուցիչ չէր այցելել Հայաստան։

Հայաստանում համաժողովի կազմակերպումը նպատակ ուներ քննարկել արագ փոփոխվող համաշխարհային, տարածաշրջանային և ազգային աշխատաշուկաներում առկա մարտահրավերներն ու հնարավորությունները, որոնց բախվում են հասարակությունները։ Այն դիտարկվել է նաև արդյունավետ հարթակ՝ քննարկումների արդյունքում գտնելու աշխատանքի ոլորտին վերաբերելի այնպիսի լուծումներ, որոնք ժամանակակից աշխարհի զարգացման միտումների և մարտահրավերների պայմաններում հնարավորություն կտան հասնել սոցիալական արդարության և արժանապատիվ աշխատանքի ապահովմանը։ Համաժողովի ընթացքում քննարկվեցին սոցիալական արդարության ապահովմանն առնչվող կարևոր հարցեր՝ գլոբալ վերափոխումների ժամանակաշրջանում զարգացող աշխատաշուկայի մարտահրավերների, կանանց տնտեսական հզորացման, աշխատանքի ապագայի համատեքստում։ Եվ այդ ամենի իրականացման ճանապարհին աշխատանքի և սոցիալական հարցերի նախարարությունը կարևոր է համարել բոլոր շահագրգիռ կողմերի՝ թե՛ համապատասխան պետական կառույցների, թե՛ աշխատողների և գործատուների ներկայացուցիչների, թե՛ քաղաքացիական հասարակության ներկայացուցիչների ջանքերի և ռեսուրսների ներդրումը՝ առավելագույն արդարացի և արդյունավետ լուծումներ ունենալու համար»,-«Փաստի» հետ զրույցում ասում է Մանուչարյանը:

Համաժողովների, հանդիպումների ու քննարկումների պարագայում առավել հետաքրքիր է խոսքից գործին անցնելու միտումը: Այս համաժողովի արդյունքներով ի՞նչ գործնական քայլեր կարող ենք ակնկալել մեր աշխատանքի ոլորտում: «Համաժողովի ընթացքում նախ տարբեր երկրներից ժամանած բարձրաստիճան անձինք, փորձագետները, սոցիալական պաշտպանության ոլորտի քաղաքականություն մշակողները հնարավորություն են ունեցել ծավալել կառուցողական երկխոսություններ՝ արժանապատիվ, ներառական և կայուն աշխատանքային հնարավորություններ ստեղծելու հարցերի վերաբերյալ։ Համաժողովի անցկացումը կարևոր էր նաև փորձի փոխանակման, նորարարական լուծումներ գտնելու, ոլորտային առաջնահերթությունները վեր հանելու տեսանկյունից։ Համաժողովի՝ Հայաստանում անցկացնելը կարևոր էր աշխատանքի ոլորտում միջազգային կապերի հաստատման և զարգացման տեսանկյունից։ Հիմքեր ստեղծվեցին համաժողովին մասնակից երկրների ներկայացուցիչների հետ իրականացնել ոլորտային փորձնական ծրագրեր, գիտական ուսումնասիրություններ, ինչպես նաև փորձի փոխանակում։ Սա կնպաստի զարգացնել Հայաստանում ոլորտային քաղաքականություն մշակողների մասնակցայնությունը, լավարկել ոլորտային քաղաքականությունը և այլն։

Միջոցառումը նաև հնարավորություն տվեց նպաստել Սոցիալական արդարության համաշխարհային կոալիցիայի գործունեության իրազեկման արշավին, ներկայացնել նպատակներն ու առաջնահերթությունները»,-նշում է մեր զրուցակիցը: Հայաստանը միանում է ԱՄԿ գլխավոր տնօրենի նախաձեռնած Սոցիալական արդարության համաշխարհային կոալիցիային: Ի՞նչ է նշանակում Հայաստանի համար այս կոալիցիային անդամակցելը և ի՞նչ կտա այն մեր երկրին։ «Սոցիալական արդարության համաշխարհային կոալիցիային անդամակցությունը հնարավորություն է տալիս տարբեր երկրներին, միասին համագործակցելով, վեր հանել ոլորտային խնդիրները, գտնել մեխանիզմներ և համատեղ արձագանքել առկա մարտահրավերներին։ Այն նաև հնարավորություն կտա կանխարգելիչ քայլեր ձեռնարկել և նպաստել անհավասարության և սոցիալական լարվածության նվազմանը, ինչպես նաև կայունության, խաղաղության, ներառականության, կայուն սոցիալ-տնտեսական քաղաքականությունների մշակմանը և այլն։ Հարթակը մասնակից պետություններին հնարավորություն է տալիս միավորվել և համատեղ քայլեր ձեռնարկել սոցիալական արդարության հասնելու նպատակով։

Ամփոփելով՝ կարող ենք ասել, որ կոալիցիան մասնակից պետություններին հնարավորություն կտա ներգրավված լինել միջազգային գործընթացներում, որոնք միտված են համատեղ լուծել սոցիալական արդարության խնդիրները, առկա մարտահրավերները, համատեղ ռեսուրսների հիման վրա ավելի արդյունավետ արձագանքել և կանխարգելիչ քայլեր ձեռնարկել՝ առկա մարտահրավերների կամ կանխատեսվող մարտահրավերների հաղթահարման ուղղությամբ»,-եզրափակում է նախարարի մամուլի քարտուղար Զարուհի Մանուչարյանը:

Մանրամասները՝ «Փաստ» օրաթերթի այսօրվա համարում