Արարատի մարզի ինֆեկցիոն իրավիճակը վերահսկելի է

Արարատի մարզի հիվանդանոցներում, հունվարի 15-ի դրությամբ, սուր շնչառական հիվանդությամբ ստացիոնար բուժում է ստանում 120 քաղաքացի:«Արմենպրես»-ի թղթակցի հետ զրույցում Արարատի մարզպետարանի աշխատակազմի առողջապահության բաժնի պետ Հայկ Բադալյանն ընդգծեց, որ չնայած այս ցուցանիշին` մարզում ի րավիճակը վերահսկելի է: Հունվարի 10-ի դրությամբ հիվանդանոցային պայմաններում բուժում ստացողների թիվը եղել է 93, ամենաշատ ցուցանիշը գրանցվել է հունվարի 13-ին` 132 քաղաքացի: Այնուհետեւ, աստիճանաբար թիվը կրկին նվազել է: Բաժնի պետը հունվարի առաջին օրերին բուժում ստացող մեծահասակ եւ մանկահասակ հիվանդների նվազ ցուցանիշը պայմանավորում է տոն օրերին քիչ դիմելիությամբ:

«Բոլոր բուժհաստատություններն ապահովված են դեղորայքով, մասնավորապես` «Տամիֆլյու»: Ստացել ենք նաեւ անհրաժեշտ բոլոր պարագաները. դիմակներ, ձեռնոցներ, ներարկիչներ, եւ այլն»,-ընդգծեց Բադալյանը` հավելելով, որ ամեն րոպե առողջապահության վարչությունը կապի մեջ է թե նախարարության, թե բուժհաստատությունների հետ: «Իրավիճակը վերահսկվում է, իսկ անհրաժեշտության դեպքում ստանում ենք դեղորայքի ու բժշկական պարագաների նոր չափաբաժինը»,-ասաց նա:

Անդրադառնալով նախադպրոցական եւ դպրոցական ուսումնական հաստատությունների արձակուրդների երկարաձգմանը, Բադալյանն ասաց, որ դա չափազանց ճիշտ որոշում էր հիվանդության տարածումը կասեցնելու առումով: Մարզի բոլոր բուժհաստատությունները` ներառյալ պոլիկլինիկաները եւ ամբուլատորիաները`աշխատելու են նաեւ շաբաթ եւ կիրակի օրերին:

Բաժնի պետը կրկին անգամ ընդգծեց, որ ինֆեկցիայից հեռու մնալու համար անհրաժեշտ է հաճախակի օդափոխել բնակարանները, հատկապես` հիվանդասենյակները, հետեւել անձնական հիգիենային, հաճախակի ձեռքերը լվանալ օճառով, զերծ մնալ մարդաշատ տարածքներից եւ խուսափել գրկախառնություններից, եւ որ ամենակարեւորն է` խուսափել ինքնաբուժումից: