«Հիմա երեխաս էլ է ստիպված բուժվում»․ նոր մանրամասներ, թե ինչպես էր հայ բժիշկը սավանը մոռացել կնոջ որովայնում՝ կեսարյանից հետո (տեսանյութ)

Ինչպես արդեն տեղեկացրել էինք, Սանկտ Պետերբուրգ հիվանդանոցներից մեկում արտասովոր դեպք է տեղի ունեցել։ Կնոջը կեսարյան վիրահատման էին ենթարկել եւ նրա որովայնում մոռացել բժշկական սավան։ Տուժած կինը՝ Յուլյան, դեպքի նոր մանրամասներ է պատմել։ Նա նշել է, որ կեսարյանից հետո որովայնը չափազանց մեծ է եղել, եւ ինքը սարսափելի ցավեր է ունեցել, սակայն իրեն վիրահատած բժիշկ Մարիամ Առաքելյանը ոչինչ չի տեսել, ասել է՝ հեմատոմա է, դեղեր է նշանակել ու դուրս գրել։

Մոտ մեկ ամիս նա սարսափելի ցավեր է զգացել որովայնում, ստիպված ուրիշ հիվանդանոց է դիմել, որտեղի բժիշկները շոկի մեջ են ընկել՝ նրա որովայնից բժշկական ահռելի սավան հանելով՝ ամբողջովին թարախապատված։ Բժիշկները ապշած են, թե ինչպես կարող էին նման մեծ սավանը մոռանալ կնոջ որովայնում, հատկապես այն դեպքում, երբ ներկայումս նման սավաններ բժշկության մեջ չեն էլ օգտագործվում։ «Անձեռոցիկ չէր, որ մոռանային։ Հսկայական սավան էր, արդեն ամբողջովին թարախոտված էր, երբ հանեցին։ Փաստորեն այդ թարախը երեխայիս էլ է անցել կաթիս հետ։ Հիմա տղաս էլ է բուժում ստանում, բնականաբար, այլեւս չեմ կերակրում նրան»,- պատմել է Յուլիան։

Կինը պատրաստվում է դատի տալ հիվանդանոցին։ Հիվանդանոցից դեռեւս ոչ մի մեկնաբանություն չեն արել։ Միայն հիվանդանոցի բժիշկներից մեկը՝ պրոֆեսոր Վիտալի Բեժենարը «իր սեփական կարծիքն է արտահայտել» դեպքի հետ կապված՝ նշելով, որ դա պաշտոնական մեկնաբանություն չէ։

«Ես շատ եմ ցավում կնոջ համար, սակայն այդ դեպքը դիտավորություն չպետք է համարել, ցավոք, բժշկության մեջ նման բաներ լինում են»,- ասել է նա։