Մեր մոտ էն կախիչներն էր, որ վարչապետը ծռում էր, նախարարն էլ՝ ուղղում․ ուշագրավ մանրամասներ՝ վանաձորյան այցից

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Mediahub-ի վանաձորյան աղբյուրները ուշագրավ դրվագ պատմեցին Նիկոլ Փաշինյանի՝ Լոռու մարզ կատարած այցից, որը հիշվեց նրա՝ դպրոցում կախիչ պոկելով։ 

Հայտնի է, որ Վանաձորի թիվ 27 և 23 դպրոցների նորակառույց մարզադահլիճներին ծանոթանալու ընթացքում Նիկոլ Փաշինյանը զայրույթի նոպաներ է ունենում՝ բղավելով կրթության նախարարի և մյուսների վրա, թե ինչո՞ւ են վոլեյբոլի շիթը ստանդարտներից փոքր սարքել, ինչո՞ւ է ցանցը «տուկի թելից» պատրաստված, իսկ վերջում ստուգում է կախիչներն ու պոկում դրանցից մեկը՝ արձանագրելով, որ շատ դժգոհ է ամեն ինչից։ Այս բոլորը ցուցադրված է կառավարության պաշտոնական էջում, բայց բնականաբար՝ մոնտաժված կադրերով։ Իսկ իրական կադրերում այլ՝ ավելի ուշագրավ բան էլ է տեղի ունեցել, որը կառավարության օպերատորները ֆիքսել են, բայց լրատվական բաժինը, բնականաբար, կտրել հեռացրել է։ 

Բանն այն է, որ, ինչպես փոխանցեցին մեզ Վանաձորի մեր աղբյուրները, Նիկոլ Փաշինյանը Վանաձորի թիվ 23 դպրոցի մարզադահլիճի կախիչներից բացի ստուգել է նաև հանդերձարանի պահարանները, որն ընդամենը մեկ ակնթարթ է երևում տեսանյութում։ Մեզ պատմեցին, որ պահարանների վրա Փաշինյանը ստուգել է նախ դռների վրա փակցված համարակալումները, թե արդյոք թվերը ամո՞ւր են փակցված դռներին։ Ու մատով քերելով՝ պոկել է դրանք։

Այս փաստը «պրարաբ» Փաշինյանին այնքան է զայրացրել, որ փրփրել է, ափերից դուրս եկել ու շուռ է տվել պահարանը։ Պահարանի՝ գետնին ընկնելու հետևանքով վնասվել են դռների բռնակները, որոնք գետնին ճզմվելու հետևանքով մյուս կողմից փուչ են տվել ու մասնակի դուրս եկել։ Հիմա այդ պահարանները նորոգման կարիք ունեն։ 

Այս ամենը, բնականաբար, խնամքով թաքցրել են կառավարության մոնտաժնիկները։
Այս թեմայով Mediahub-ը կապ հաստատեց Վանաձորի Ծովակալ Իսակովի անվան թիվ 23 հիմնական դպրոցի տնօրեն Տաթևիկ Հովսեփյանի հետ, որը Փաշինյանի այցի պահին դիմավորում էր նրան դպրոցի բակում։ Վերջինս մեզ հետ զրույցում հաստատեց, որ պահարանների դռներն ու բռնակներն իսկապես վնասված են, և պետք է ուղարկեն նորոգման, բայց չխոստովանեց, որ դա եղել է հենց Նիկոլ Փաշինյանի՝ պահարանը շուռ տալու հետևանքով։

«Ներսից ինչ-որ վնասված էր ու բռնակը ներս մտած, բայց փոխելու են էդ դռները, վնասված մասերը փոխելու են»,- ասաց նա՝ նշելով, թե իրենց մոտ որևէ բան չի պատահել։

Իսկ թե ինչի հետևանքով են այդպես վնասվել պահարանրի դռները, տնօրենը ենթադրեց, որ գուցե առաքիչն է վնասել․

«Կարող ա առաքիչը, որ բերել ա, դե՝ տարբեր դպրոցներ տարել ա, դա իմ ենթադրությունն ա, իհարկե, չի բացառվում, որ իրար վրա բարձել են, պրեսսի արդյունքում ա սեղմվել, որովհետև բռնակն էլ ա մի տեսակ սեղմված, դրսի կողմից սեղմված ա, ներսի կողմից էլ ոնց որ մի քիչ կիսատրաքածի նման լիներ լամինատը։ Գիտե՞ք ոնց ա, մենք տեղ չունեինք, դահլիճը դեռ պատրաստ չէր, ուղղակի, գույքը, որ բերել են, հենց մեր նախասրահում մի տեղ իրար կողքի դրել էինք, մենք էդ պահին չենք էլ ստուգել։ Հետո, որ պետք ա վարչապետը գար, նոր մենք ինչ ստացել ենք էդ գույքը, տեղավորել ենք դահլիճում»։

Մեր դիտարկմանը, թե կադրերում երևում է, որ Նիկոլ Փաշինյանը դռները բացում է, ու որևէ խնդիր չի երևում, նշանակում է՝ դրանից հետո է վնասվել պահարանը, դպրոցի տնօրենն ասաց․ «Չէ, Նիկոլ Փաշինյանի բացած դռները նորմալ են եղել։ Դե, դա երեք պահարան ա, ու ամեն մեկն ունի տասնհինգ դուռ, Նիկոլ Փաշինյանի բացածը չի եղել վնասվածը»։

Երբ պնդեցինք, որ Փաշինայնի այցի պահին շուռ է եկել պահարանը (ավելի ստույգ՝ Փաշինյանը շուռ է տվել, ըստ մեզ հասած տեղեկությունների), տիկին Հովսեփյանն արձագանքեց․ «Չէ, չէ, չի եղել նման բան, կամ որ դպրոցում մի բան շուռ գա, չի եղել նման բան։ Մեր մոտ էն կախիչներն էր, որ վարչապետը ծռում էր, ծռվում էր, ճիշտն ասած, նախարարն էլ ուղղում էր, հետո էն վերջինը, որ էլի ծռում էր, որ ցույց տա՝ տեսեք, հեշտ ծռվում ա, պոկվեց, ու էդ շուրուպները թույլ էին ամրացված, իրականում»։

Իսկ ի՞նչ եղավ այդ կախիչների հարցը, տնօրենը ծիծաղով ասաց․ «Ճիշտն ասած՝ էն պոկված կախիչի տեղը մենք հասցրել ենք դնել, որովհետև պոկվածը չգիտենք՝ ուր ա, երևի նախարարը մեխանիկորեն հետը տարել էր։ Մենք ամրացրել ենք կախիչ, հիմա գույքի բաժնից մեզ ասել են, որ պետք ա փոխարինեն պահարանը, կախիչները՝ չգիտեմ, կփոխե՞ն, թե՞ չէ։ Բայց կախիչները ասացին, որ եթե ամուր ամրացնեն, շուրուպները փոխեն՝ կկարգավորվի»։

Վահե Մակարյան