Երևանի քաղաքապետարանը մինչև 2018թ. խոշոր քաղաքաշինական ծրագրերը նվիրելու է մայրաքաղաքի 2800-ամյակին

Երևանի քաղաքապետ Տարոն Մարգարյանն աշխատանքային խորհրդակցության ընթացքում անդրադարձել է 2018 թվականին մայրաքաղաքի հիմնադրման 2800-ամյակը նշելուն ու Երևանի գլխավոր ճարտարապետին և տոնակատարության կազմակերպչական աշխատանքային խմբին հանձնարարել է սկսել աշխատանքներն ու այդ համատեսքտում ներկայացնել առաջարկներ: Քաղաքապետը, մասնավորապես, անդրադարձել Õ § տոնակատարությանն ընդառաջ նոր պուրակի ձևավորմանը, որը կկրի հոբելյանական տարվա անունը: «Բոլորը գիտեն, որ մայրաքաղաքում մենք ունենք Էրեբունի-Երևանի 2750-ամյակի պուրակ: Ու տրամաբանական է, որ այն ունենա շարունակություն: Արդեն իսկ կա առաջարկ, որ տվյալ պուրակի շարունակությունը հանդիսացող Շահումյանի և Մյասնիկյանի արձանների միջնամասում գտնվող պուրակը վերակառուցվի և համապատասխան շատրվանային համալիրով դառնա Երևանի 2800-ամյակին նվիրված պուրակ: Եվ, ընդհանրապես, այսուհետ, մինչ հոբելյանական տոնակատարությունը, խոշոր քաղաքաշինական մեր բոլոր  ծրագրերը, որոնք կյանքի կկոչենք մինչև 2018 թվականը, պետք է նվիրենք մեր  մայրաքաղաքի 2800-ամյակին»,-ընդգծել է Տարոն Մարգարյանը:

Ինչպես «Արմենպրես»-ին տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից, խորհրդակցության ընթացքում նաև զեկուցվել է, որ Հայոց բանակի և Սուրբ Սարգսի տոների առթիվ մայրաքաղաքում կկազմակերպվեն մի շարք միջոցառումներ: Տոներին  համահունչ,   միջոցառումներ կանցկացվեն քաղաքապետարանի ենթակայության կրթական և մշակութային հաստատություններում: