«Ես ավագանու նիստի եմ եղել, ոչ մի բան չեմ լսել». Ոսկեպարի գյուղապետը մամուլից է իմանում, որ գյուղերը հանձնում են

1or.am-ը գրում է.

Երեկ ասուլիսի ժամանակ Նիկոլ Փաշինյանը հայտարարեց՝ «Չեմ բացառել և չեմ բացառում, որ դելիմիտացիայի գործընթացը կարող է սկսվել Տավուշի մարզից»: 

Ավելի վաղ Փաշինյանը հայտնել էր, որ Ադրբեջանն առաջնահերթ պահանջում է հանձնել իրեն Տավուշի մարզի չորս գյուղերը՝ Բաղանիս-Այրում, Ներքին Ոսկեպար, Խեյրիմլի և Կըզըլ Հաջիլի: 

Բնական է, որ «անկլավների» հանձնումը մեծ ռիսկեր է պարունակում և կարող է անդառնալի հետևանքներ ունենալ: Հայաստանն ինքն իր ձեռքով «ականապատում» է իր իսկ տարածքները, և Ադրբեջանը, փաստացի, բլոկադայի է ենթարկում դեպի Վրաստան տանող գլխավոր մայրուղին: 

Նոյեմբերյան համայնքի Ոսկեպար բնակավայրի վարչական ղեկավար Իշխան Աղբալյանից փորձեցինք ճշտել՝ գյուղում ինչ տրամադրություն է վարչապետի երեկվա հայտարարություններից հետո: Պարզվեց՝ Աղբալյանը Փաշինյանի ասուլիսին չի հասցրել հետևել. 

«Օրը նոր է լուսանում, Դուք հարցնում եք՝ մարդիկ խուճապի մեջ ե՞ն: Ամեն մարդ իր գործով է զբաղված, ես ի՞նչ կարող եմ ասել»: 

Մեր  դիտարկմանը, թե՝ խոսակցությունները նոր չեն, գյուղերը հանձնելու մտադրություն դեռ վաղուց կար, Աղբալյանն արձագանքեց. 

«Սուտ խոսակցություններ են, այսպես եղել է, այսպես էլ գնալու է, ի՞նչ փոխվել, ի՞նչ բան: Որ ասածն են անմիջապես արել, որ հիմա դուք խառնվել եք իրար: Ամեն լրագրող տեղից վեր է կենում, մի բան գրում, ժողովրդին խուճապի մեջ գցում, որ ի՞նչ: Մարդիկ իրենց համար սովորական ապրում են»: 

Հակադարձեցինք, որ այս անգամ վարչապետի կողմից է կոնկրետ հայտարարություն եղել ասուլիսի ժամանակ, լրագրողներն ի՞նչ կապ ունեն. 

«Ես ավագանու նիստի եմ եղել, ոչ մի բան չեմ լսել, նոր հիմա նստած՝ ուզում եմ կարդալ: Միայն կարող եմ ասել, որ գյուղում ոչ մի անգամ խուճապ չի եղել, հիմա էլ չկա»,-  1or.am-ի հետ զրույցում ասաց Աղբալյանը:

Աննա Սարգսյան