Գյուղատնտեսությունն ապահովեց երկրի տնտեսական աճի զգալի մասը

Կարեն Մկոյանը Ֆեյսբուքյան իր էջում գրում է.

Գյուղատնտեսական աշխատանքները կազմակերպելու հարցում պետական աջակցություն ցուցաբերելու նպատակով 2012 թվականից սկսած մեր երկրում իրականացվում են հողօգտագործողներին մատչելի գներով ազոտական, ֆոսֆորական և կալիումական պարարտանյութերի և դիզելային վառելանյութի հատկացման ծրագրեր:

Կառավարությունն իր այս տարվա առաջին` հունվարի 14- ի նիստում որոշեց 2015թ. չիրացված ավելի քան 2 հազար 594 տոննա ազոտական պարարտանյութի սուբսիդիան և դրամաշնորհը` ընդամենը շուրջ 183 մլն դրամի, 759 տոննա ֆոսֆորական և 734,5 տոննա կալիումական պարարտանյութի սուբսիդիան և դրամաշնորհը` ընդամենը մոտ 195 մլն դրամի վերադարձը ՀՀ պետբյուջե երկարաձգել մինչև 2016թ. ծրագրով պարարտանյութերի իրացման ավարտը:

Գործադիրը կիրառում է գյուղատնտեսության պետական աջակցության բազմապիսի ծրագրեր: Անցած տարի, օրինակ, փետրվարի 5- ի նիստում որոշվեց ազոտական պարարտանյութի 1 պարկը շահառուներին վաճառել 6 հազար. ֆոսֆորական և կալիումական պարարտանյութերի 1 պարկը` 7 հազար, դիզելային վառելանյութի 1 լիտրը` 350 դրամով: Ավելին, փետրվարի 19- ի նիստում գյուղատնտեսության ոլորտին տրամադրվող վարկերի սուբսիդավորման նպատակով հատկացվեց շուրջ 290 մլն դրամով ավելի գումար, քան նախորդ տարի, ինչը հնարավորություն տվեց տարբերակված 4 և 6 տոկոսի փոխարեն երկրի բոլոր համայնքների համար կիրառել վարկերի տոկոսադրույքների 6 տոկոսային կետի սուբսիդավորում: Գործընթացի շարունակմանը նպաստեց 2015թ. մայիսի 14- ի որոշումը, որով կառավարությունը գյուղատնտեսության վարկավորման սուբսիդավորումը շարունակելու նպատակով 10 մլրդ դրամ հատկացրեց ՀՀ կենտրոնական բանկին, որն էլ իր հերթին գումար տրամադրեց այդ ծրագրով զբաղվող բանկերին: Այսպիսով, այս ծրագրով գյուղացին վարկը 14- ի փոխարեն ստացավ 8 տոկոսով:

Գյուղացիական տնտեսությունների համար պակաս կարևոր չէր կառավարության 2015թ. ապրիլի 30- ի այն որոշումը, որով ջրօգտագործողներին հնարավորություն տրվեց 80 հազար հա հողատարածության ոռոգման ջուրն ստանալ անհատույց: Նույն նիստում անասնապահության զարգացմանն աջակցելու նպատակով կառավարությունը պայմաններ ստեղծեց, որպեսզի հանրապետություն ներկրվի 257 տոհմային երինջ: Ավելի ուշ` 2015- ի սեպտեմբերի 19- ի նիստում գործադիրը փոփոխություն կատարեց իր այս որոշման մեջ և ապահովեց ևս 453 տոհմային երինջի ձեռքբերումն ու ներկրումը:
Գյուղատնտեսությունը պարտք չմնաց պետությանը: Հայրենանվեր աշխատանքի շնորհիվ ոլորտի աշխատողներն ապահովեցին տնտեսական բարձր արդյունք` երկնիշ տնտեսական աճ և դրեցին այս տարվա բերքի հիմքը: