Իրանի համար Թուրքիան ու Ադրբեջանը հետաքրքիր չեն տարանցիկ երկիր լինելու առումով

Հայաստանն ու Իրանը նպաստեցին տարածաշրջանում համագործակցության նոր ձևաչափի ձևավորմանը: Խոսքը էներգետիկ ոլորտում  Ռուսաստան-Վրաստան-Հայաստան-Իրան քառակողմ համագործակցության մասին է: Այս մասին «Արմենպրես»-ի մամուլի սրահում հրավիրված ասուլիսին նշեց իրանագետ Վարդան Ոսկանյանը:

«Վրաստանը ցանկություն ունի դիվերսիֆիկացնել գազային կախվածությունը Ադրբեջանից, Իրանն էլ պատրաստ է տրամադրել այդ գազն ու դա անել հենց  Հայաստանի տարածքով` խուսափելով և Արդբեջանի, և Թուրքիայի տարածքներից»,-ասաց Վարդան Ոսկանյանը:

Նրա խոսքով, Թուրքիայի տարածքը Իրանի համար անկանխատեսելի է` կապված քրդական հարցի սրացման հետ: Քրդական հարցի սրացմամբ պայմանավորված` այդ ընթացքում Թուրքիայում նավթատարերի, գազատարերի պայթյուններ եղան, որոնց պատճառով երկրի իմիջը զգալի տուժեց: Նաև եղան գործողություններ իրանական բեռնատարների, ավտոբուսների նկատմամբ ու սկանդալային դեպքեր գրանցվեցին Թուրքիա-Իրան հարաբերությունների համատեքստում: Վարդան Ոսկանյանն ընդգծեց, որ Թուրքիան կորցրեց իր գրավչությունը Իրանի համար:

«Ինչ վերաբերում է Ադրբեջանին, ապա այս ուղին դժվար թե Իրանն ընտրի, որովհետև այստեղ լուրջ խնդիրներ կան: Ադրբեջանում ճնշվում են իրանամետ բոլոր ուժերը, Նարդարանի դեպքերն ամենաակնհայտ իրադարձություններն էին: Ադրբեջանա-իրանական խնդիրների կծիկն այնքան բարդ է, որ դժվար է պատկերացնել, թե ինչպես դա կլուծվի: Հետևաբար ամենավստահելի, ամենաարդյունավետ ուղիներից մեկը  Հայաստանն է»,-ասաց իրանագետը:

Անդրադառնալով Ռուսաստանի հնարավոր գործողություններին` իրանագետը նշեց, որ պաշտոնական Մոսկվան նպատակ ունի Վրաստանը վերադարձնել սեփական ազդեցության ոլորտ: Դա նշանակում է, որ Հայաստանը կարող է կարևոր դերակատարություն ստանձնել:

«Մեր մեջ տարածված է այն վախը, թե Ռուսաստանն անպայման պետք է խոչընդոտի:  Մի կարևոր հանգամանք կա, եթե որևէ ծրագիր չի լինում արգելափակել, ապա ճիշտ կլինի մասնակցել: Կարծում եմ `Ռուսաստանում էլ վաղուց դա արդեն հասկացել են»,-ավելացրեց Վարդան Ոսկանյանը: