Հունահռոմեական ոճի հայ ըմբիշները կմասնակցեն Սոֆիայի Դան Կոլով եւ Նիկոլա Պետրով ամենամյա միջազգային մրցաշարին

Հունահռոմեական ոճի ըմբշամարտի Հայաստանի հավաքականը կմեկնի Բուլղարիա՝ մասնակցելու հունվարի 28-31-ը Սոֆիայում կայանալիք Դան Կոլով եւ Նիկոլա Պետրով ամենամյա միջազգային մրցաշարին: Ինչպես հայտնում է «Արմենպրես»-ը, Հայաստանի ըմբշամարտի հավաքականի պաշտոնական կայքը հրապարակել է այն ըմբիշների անունները, ովքեր հավաքականի գլխավոր մարզիչ Լեւոն Ջուլֆալակյանի որոշմամբ կներ կայացնեն Հայաստանը Բուլղարիայի մայրաքաղաքում: Տարվա առաջին կարեւոր մրցաշարին կներկայանան  Ռոման Ամոյանը, Գեւորգ Ղարիբյանը, Նարեկ Խաչատրյանը (59 կգ), Միհրան Հարությունյանը (71 կգ), Կարապետ Չալյանը (75 կգ), Արթուր Շահինյանը, Մաքսիմ Մանուկյանը (85 կգ), Արթուր Ալեքսանյանը (98 կգ) եւ Էդգար Խաչատրյանը (130 կգ):

Սոֆիայում 59 կգ եւ 85 կգ քաշային կարգերում համապատասխանաբար երեք եւ երկու ըմբիշով մասնակցությունը պայմանավորված է այդ քաշային կարգերում առաջատարներին որոշելու անհարժեշտությամբ:

Հավաքականի գլխավոր մարզչին Սոֆիայում կօգնեն Էդուարդ Սահակյանն ու Սամվել Գևորգյանը: Գեւորգ Ալեքսանյանը Հայաստանը կներկայացնի որպես մրցավար:

Միաժամանակ, Արսեն եւ Արամ Ջուլֆալակյանները՝ Արամ Գասպարյանի գլխավորությամբ Ստամբուլում կմասնակցեն եւս մեկ մրցաշարի: «Օլիմպիական վարկանիշային մրցաշարերից մեկն անցկացվելու է Ստամբուլում: Եվ քանի որ այս մրցաշարին պատրաստվում են մասնակցել Արսենի հիմնական մրցակիցները, ուստի նպատակահարմար գտանք նրան ուղարկել Թուրքիա, որպեսզի եւ՛ ծանոթ լինի մարզադահլիճում տիրող մթնոլորտին, եւ զգա իր մոտակա մրցակիցների ներուժը: Արամ Ջուլֆալակյանն էլ նրան օգնելու է մարզումային գործընթացում»,- Լեւոն Ջուլֆալակյանի խոսքը մեջբերել է կայքը: