Գերմանիայի ակադեմիկոսները քննադատել են Թուրքիայում գիտնականների դեմ բռնությունները

Գերմանիայի համալսարանների ավելի քան 1500 ակադեմիկոսներ աջակցությունն են հայտնել Թուրքիայում իրենց գործընկերներին, ովքեր պետական մակարդակով հալածանքի են ենթարկվում խաղաղության կոչերի համար: Ինչպես հաղորդում է «Արմենպրես»-ը, այս մասին տեղեկացնում է թուրքական Demokrathaber.net-ը:

Ակադեմիկոսները հայտարարություն են հրապարակել` պահանջելով Թուրքիայում դադարեցնել հալածանքներն ակադեմիկոսների նկատմամբ: «Մենք անհանգստացած և վախեցած ենք Թուրքիայի զարգացումներով, որի շրջանակում քրդական քաղաքները վերածվում են ավերակների, իսկ քաղաքացիների կյանքը վտանգվում է: Մեր աջակցությունն ենք հայտնում «Ակադեմիկոսներ հանուն խաղաղության» նախաձեռնությանը, որը Թուրքիայի կառավարությանը հորդորում է վերդառնալ բանակցային սեղանի շուրջ և խաղաղ կարգավորում տալ խնդրին»,- ասվում է հայտարարության մեջ:

Գերմանացի ակադեմիկոսները նշել են, որ քուրք ժողովրդի դեմ շարունակվող պատերազմը, ԶԼՄ-ների նկատմամբ կիրառվող բռնաճնշումները և ակադեմիկոսների հալածանքներն անհնարին են դարձնում իրենց համագործակցությունը Թուրքիայի համալսարանների հետ: Նրանք հորդորել են Գերմանիայի կառավարությանն ու Եվրամիությանն աշխատել քրդական խնդրի խաղաղ կարգավորման շուրջ, ընդդիմադիր կեցվածք ընդունել բռնությունների նկատմամբ, լուռ չմնալ և քննադատել ակադեմիկոսների դեմ իրականացվող ճնշումները:

Թուրքիայի 1128 ակադեմիկոսներ ստորագրել էին իշխանություններին հասցեագրված հայտարարության տակ, որում նրանք կոչ էին անում դադարեցնել բռնությունները երկրի հարավ-արևելքում և «Քրդական հարցը» կարգավորել խաղաղ ճանապարհով։ Այս հայտարարությունը զայրացրել էր նախագահ Ռեջեփ Թայիփ Էրդողանին, ով «դավաճան» էր անվանել գիտնականներին և հրահանգել դատախազությանը նրանց դեմ հետաքննություն սկսել: Արդյունքում 21 ակադեմիկոս ձերբակալվել էին, իսկ ավելի ուշ` ազատ արձակվել: