Ծեծված երիտասարդին նոր մեղադրանք են առաջադրել. Փաշինյանը գնում է վա-բանկ՝ իր թիմը կուռ պահելու համար

Ազգային ժողովի ՔՊ-ական պատգամավորի հետ վիճած և խուլիգանության մեջ մեղադրվող երիտասարդին դաժանաբար ծեծի ենթարկելուց հետո, ազատ արձակելու փոխարեն, վարչախումբը նոր մեղադրանքներ է առաջադրել։

Հիշեցնենք՝ նախօրեին պատգամավորներն ու փաստաբանները տեղեկություն էին հայտնել, որ Սամվել Վարդանյանին աննախադեպ խոշտանգման են ենթարկել. ՁՊՎ տեղափոխելու ճանապարհին ոստիկանները հեռացել էին մեքենայից, և դիմակավորված ինչ-որ անձինք խոշտանգել, վիրավորել, հայհոյանքներ էին տվել նրան։

Դեպքի կապակցությամբ արտահայտվել էր նույնիսկ Մարդու իրավունքների պաշտպանը, բայց փաշինյանական վարչախումբը, մեղավորներին պատժելու փոխարեն, որոշել է կալանավորել Սամվել Վարդանյանին։

Մի կողմից՝ գործող վարչախմբի այս անօրինակ դաժանությունը անտրամաբանական է թվում, բայց իրականում խորքային առումով Փաշինյանը որևէ այլ տարբերակ չունի, քան ընդդիմախոսների նկատմամբ դաժան հաշվեհարդար տեսնելը։ Հատկապես վերջին շրջանում իշխանության նկատմամբ ատելությունն ավելի քան սրվել է հասարակության մեջ։

Փաշինյանն ինքն էլ հասկանում է, որ եթե թիմակիցներն անընդհատ հայտնվեն նման իրավիճակներում, երբ մարդիկ իրենց պարզապես մտածածը կասեն նրանց դեմքին, կարճ ժամանակահատվածում գործող իշխանությունները կարող են կանգնել կազմալուծման շեմին, ուստի և հրահանգավորված ու կազմակերպված դաժան հաշվեհարդարների միջոցով փորձում են վախեցնել հանրությանը՝ յուրաքանչյուրին ներշնչելով, որ ՔՊ-ական պատգամավորի մասին սեփական կարծիքն արտահայտելու պարագայում, իրենք էլ կարող են հայտնվել նույն Սամվել Վարդանյանի վիճակում, իսկ այդպիսի պայմաններում ոչ բոլորն են պատրաստ դաժան ծեծ ու նվաստցումներ կրել գործող վարչախմբի դեմ պայքարում։

Նիկոլ Փաշինյանը վաղուց թքած ունի բոլոր տեսակի ժողովրդավարական դրսևորումների, զեկույցների, միջազգային և տեղական իրավապաշտպանների քննադատությունների վրա, նրան պետք է ամեն գնով պահպանել իր իշխանությունը, իսկ դրա համար բռնապետությունն ամենացածր գինն է, որ նա պատրաստ է վճարել։

Տաթև Ասատրյան