«Բժիշկները, փոխանակ աշխատեն, Ամանոր էին նշում»․ մահացած նորածիններից մեկի մայրը մեղադրում է բժիշկներին

Past.am

Ինչպես արդեն տեղեկացրել ենք, ՌԴ Օրլովյան շրջանի ծննդատներից մեկում հունվարի 1-ից մինչեւ 12-ը 8 նորածին է մահացել։ Ծննդատունը, որը համարվում է տարածաշրջանում լավագույնը, մեղադրում էր մայրիկներին։ Բժիշկները նշում էին, որ մայրիկները մոռացել են հղիության մասին ու շքեղ Ամանոր տոնել, ինչն էլ բերել է նման հետեւանքի՝ մահացած բոլոր փոքրիկները ժամկետից շուտ էին ծնվել։

Իսկ ահա փոքրիկների ծնողները բժիշկներին են մեղադրում։ Օրլովյան շրջանի գյուղերից մեկի 34-ամյա բնակչուհին մահացած նորածիններից մեկի մայրն է։ Նա մեղադրում է բժիշկներին դստեր մահվան մեջ։ Կինն արդեն 3 երեխա ունի, մահացած փոքրիկը չորրորդն էր։ «Դեռ դեկտեմբերի 17-ին ջրերը գնացին։ Գնացի հիվանդանոց, սրսկեցին ու թողեցին հիվանդասենյակում։ Այդպես մնացել եմ մինչեւ ամսի 25-ը։ Սարսափում էի, թե երեխան ինչպես է, եթե ջրերս գնացել են։ Բժիշկները հանգստացնում էին, որ հղիությունս դեռ փոքր է՝ 31 շաբաթ, պետք է սպասել»,- ասում է կինը։

Աննան պատմում է, որ բժիշկները իր հետ առանձնապես բարեկիրթ չեն եղել, դեկտեմբերի 24-ին հերթական ստուգման ժամանակ ինքը արյուն է նկատել, բժշկին հարցրել է, թե ինչ է կատարվում, վերջինը ոչինչ չի պատասխանել։

«Ես լքված էի, ոչ ոք ինձնով չէր զբաղվում։ Ինձ հետ պառկած աղջիկներն ասում էին, որ պետք է վճարել բժիշկներին, որպեսզի ինձ ուշադիր լինեն։ Ես ինձ շատ վատ էի զգում, իսկ ամսի 25-ին շատ վատացա։ Ասում էի, որ ծննդաբերում եմ, բայց նրանց համար միեւնույնն էր»,- պատմում է նա։ Ի վերջո, դեկտեմբերի 26-ին նա դուստր է ունեցել՝ 1 800 գրամ քաշով։

«Ալինան գոռաց, բայց նրան միանգամից վերակենդանացման բաժանմունք տարան։ Բժիշկներն ասացին, որ նա հարապտղային ջրեր է կուլ տվել, որն արդեն փչացած է եղել։ Հասկացա, որ բժիշկները անիմաստ էին ձգձգել, թե ինչի էին սպասել, պարզ չէ, երևի գումարի»։

Երեխան թեեւ փոքրիկ էր ծնվել, բայց կնոջ խոսքերով, բավական ակտիվ էր։

«Նա արդեն ինքնուրույն շնչում էր, ձեռքերն ու ոտքերը շարժում էր»։ Դեկտեմբերի 31-ին կնոջը դուրս են գրել, երեխային՝ ոչ։ Հունվարի 6-ին փոքրիկը մահացել է։

«Չէի կարողանում հավատալ։ Ամեն օր ինձ ասում էին, որ երեխան լավ է, ու հանկարծ մահացավ։ Պատճառը տոներն էին։ Բժիշկները տոնել են, երեխաներով բուժքույրերն են զբաղվել, ահա եւ արդյունքը»։

Կինը պնդում է, որ անպայման դատի է տալու հիվանդանոցին։