Սեփականության իրավունքների պաշտպանությամբ Ադրբեջանը հետ է մնում Հայաստանից

«Սեփականության իրավունքների պաշտպանության միջազգային վարկանիշում» Ադրբեջանը 129 երկրների մեջ զբաղեցնում է 103-րդ տեղը` 9 կետով հետ մնալով 94-րդ տեղը զբաղեցրած Հայաստանից:

Ինչպես հաղորդում է «Արմենպրես»-ը` վկայակոչելով «Սեփականության իրավունքների միջազգային դաշինքի» զեկույցը, Ադրբեջանը Մերձավոր Արեւելքի եւ Հյուսիսային Աֆրիկայի 20 երկրների մեջ զբաղեցնում է 15-րդ տեղը:

Նշվում է, որ հեղինակային իրավունքների պաշտպանության մակարդակով 105 երկրների մեջ, որոնք զեկույցում գնահատվել են այդ կատեգորիայում, Ադրբեջանը զբաղեցնում է 95-րդ տեղը: Կոռուպցիայի վերահսկման գծով այդ երկիրը զբաղեցնում է 110-րդ, իսկ քաղաքական կայունության մակարդակով` 81-րդ տեղը: «Օրենքի գերակայության» կատեգորիայում Ադրբեջանը 129 երկրների մեջ զբաղեցնում է 97-րդ տեղը:

Հայաստանը մերձավորարեւելյան եւ հյուսիսաֆրիկյան երկրների մեջ զբաղեցնում է 12-րդ տեղը, հեղինակային իրավունքների պաշտպանության մակարդակով զբաղեցնում է 76-րդ տեղը, կոռուպցիայի վերահսկողության գծով` 81-րդ տեղը, քաղաքական կայունության գծով` 56-րդ տեղը, «Օրենքի գերակայության» կատեգորիայում` 129 երկրների մեջ 74-րդ տեղը:

Վարկանիշում հարեւան Վրաստանը զբաղեցնում է 95-րդ, Իրանը` 108-րդ, իսկ Թուրքիան 58-րդ տեղը: Վարկանիշում առաջին տեղերը զբաղեցնում են Ֆինլյանդիան, Նորվեգիան, Նոր Զելանդիան, Լյուքսեմբուրգը եւ Սինգապուրը: