ԱՊՊԱ գործակալությունում ծեծի են ենթարկել կին վարորդին․ «Հրապարակ»

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Hraparak.am-ին է դիմել քաղաքացի Մ․Գ․-ն՝ խնդրելով ներկայացնել իր գլխին եկած պատմությունը, որի գործող անձանց անուններն առայժմ չենք հրապարակում:

Հավելենք, որ «2024թ-ի մայիսի 13-ի առավոտյան, աշխատանքի գնալիս, Աբովյան պուրակում ավտովթարի եմ ենթարկվել: Մի աղջկա մեքենա հարվածեց իմ մեքենային եւ դա արձանագրվեց թե ոստիկանության, թե Լիգա Ինշուրանս ապահովագրական ընկերության կողմից: Երկու անգամ բողոքարկել եմ եւ նշել, որ ինձ հարվածողն է մեղավոր: Դեպքից երկու օր է անցնում եւ ապահովագրական ընկերությունը իմ կրած վնասն է ինձ ներկայացնում, ըստ որի՝ ավտոմեքենայի աջակողմյան դուռը, հայելին եւ անվաթևը՝ կռիլո վնասվել են, վնասը գնահատվել է 116 հզր․ դրամ, որից 16 հզր․-ը այդ երեք դետալների ձեռք բերման գումարն է, եւ ամենատարօրինակը՝ կռիլոն գնահատված է ընդամենը 500 դրամ, որի ձեռք բերման աղբյուրն էլ List.am կայքն է հանդիսացել: Քանի որ ինքս իրավաբան եմ, լավ գիտեմ բողոքարկման ընթացքը, երկօրյա ժամկետում այն արել եմ, ընդգծել, որ ուշադրություն դարձնեն հանգամանքին, որ List.am կայքում նման գնով նման դետալ չի վաճառվում, հետևաբար դա գնահատման հիմք չէր կարող հանդիսանալ: Խնդրել եմ գնահատումն իրականացնել շուկայական իրական արժեքով, վարպետին վճարելիք գինը ևս ներառել: Նաև զանգով  տեղեկացնում եմ ապահովագրական ընկերությանը, որ անձամբ գնալու եմ գրասենյակ՝ ճշտելու, թե այդ կեղծ տեղեկատվությունը որտեղից են գտել:

Հաջորդ օրը՝ մայիսի 24-ին գնում եմ իմ մեքենան ապահովագրած ընկերության գլխամասային գրասենյակ, որտեղ աշխատակցին խնդրում եմ ինձ պարզաբանում տան: Խնդրում եմ փորձագետ հրավիրել»,-պատմում է մեզ դիմած քաղաքացին։ Իր շարունակ պնդումներից հետո փորձագետ հրավիրելու փոխարեն իրեն ուղեկցել են ինչ-որ պաշտոնյայի մոտ, ով  պետք է իր բոլոր հարցերին պատասխան տար: Պարզվում է՝ այդ անձն անվտանգության ծառայության պետն է: «Հարցնում եմ՝ ինչ կապ ունի նա մեքենայի գնահատման հետ: Սենյակի ներսից կանչում է՝ ասելով․ «Արի, արի, ստեղ բոլոր հարցերով ես եմ զբաղվում»: Ես ասում եմ, որ եթե ինձ չտրամադրեն, թե այդ տեղեկատվությունը որտեղից են վերցրել, իրենց փորձագետի նկատմամբ ոստիկանությունում հաղորդում կներկայացնեմ: Մեկ էլ այդ անվտանգության պետը, որի անուն-ազգանունը դռան վրա գրված էր՝  Ա․ Գ, ինձ հեգնում է, թե էն քրջոտ Շկոդայի մասին է խոսքը, ասում է՝ քեզ էդ էլ շատ է, որ տվել ենք: Հետո թե բա տեսել ես դիմացիդ մեքենան ինչ մեքենա է, քոնը ինչ վիճակում է, բա էդպես էլ պիտի լիներ: Եվ նստած տեղից վեր կացավ, եկավ թևիցս բռնեց, ինձ դուրս հանեց սենյակից ու հարվածեց դիմացի դռան պատին: Շատ հանկարծակի եկա, ասեցի՝ էս ինչ եք անում: Էդ խոսքի վրա մի հատ էլ գլխիս ու վզակոթիս տվեց: Ասացի՝ հիմա անուն-ազգանունդ, պաշտոնդ կգրեմ , եւ մենք ոստիկանությունում կհանդիպենք: Երբ դռան վրայից իր պաշտոն էի փորձում ճշտել, էդ պահին էլ մի հատ խփեց աչքիս, ինձ թվաց ուշքս գնաց»: Մեր զրուցակիցը վստահեցնում է, որ մինչ անվտանգության պետը բառացիորեն իրեն ծեծի էր ենթարկում, գրասենյակի աշխատակիցները շրջափակել էին տարածքը, որ թույլ չտան իրեն դուրս գա, ավելին՝ նույնիսկ մի քանի հոգով ձեռքերն են պահել մինչև այն պահը, երբ աչքից արյուն է հոսել: «Չասեմ, թե ինչ այլանդակ խոսքեր ու հայհոյանքներ էր տալիս: Մի կերպ ուշքի եկա, տեսնեմ` որ աչքիցս արյուն է հոսում, ասում եմ՝ անասուն եք, էս ինչ եք արել ինձ, սա մոտենում է, որ նորից ինձ խփի, մի կերպ սրան հրում եմ ու գոռում եմ, որ ոչ ոք ինձ չմոտենա, ոստիկանություն կկանչեմ: Էդ ընթացքում փորձում են ինձ համոզել, աչքս լվանալ, որ ոչ ոք չտեսնի ինձ էդ վիճակում, ու նույնիսկ հրաժարվում են շտապօգնություն կանչել, էդ կանանցից մեկն  ասում է ՝ ռադ եղի մեր օֆիսից, քեզ հասնում ա :Ինձ հետ կյանքում նման բան չէր եղել, ես զանգում եմ ոստիկանություն, շտապօգնություն, երկար զանգերից հետո ոստիկանությունն է պատասխանում:Գալիս է շտապօգնությունը, բժիշկը ճնշումս չափեց, աչքս թեթև մշակեց, հետո ինձ որոշեցին հիվանդանոց տեղափոխել:  Հիվանդանոցում ցավազրկեցին, բոլոր հետազոտություններն արեցին եւ ինձ անմիջապես տարան ինտենսիվ թերապիայի բաժին: Երեկոյան իմ վիճակը թեթևացավ և ես տուն գնացի:

Երկուշաբթի գնում եմ տեղեկանք վերցնելու, որ ներկայացնեմ աշխատավայր: Ինձ զարմացրեց, որ տեղեկանքում նշված չէր, թե որտեղից եւ ինչի համար է շտապօգնությունն ինձ հիվանդանոց հասցրել: Ավելին, հետազոտությունների արդյունքում ոչ մի վնասվածք չի հայտնաբերվել: Հետո իմանում եմ, որ ինձ ծեծի ենթարկած անձը ոստիկանությունում բացատրություն է տվել, թե ես իրեն ծեծում էի, ինքն էլ ինքնապաշտպանվել է, և պատկերացում չունի, թե ոնց է իմ աչքը վնասվել: Բա որ ես էի իրենց ծեծում ու ջարդում, ինչի իրենք չէին ոստիկանություն կանչում կամ հոգեբուժարան զանգում, ասեին՝ մի գիժ կա էստեղ, եկեք, տարեք»,-պնդում է քաղաքացին: Դեպքից միայն օրեր անց ոստիկանություն են հրավիրում, ցուցմունք է տալիս, քննիչի որոշմամբ փորձաքննություն է նշանակվում:

«Իմ միջոցներով նորից բուժզննում եմ անցել, աչքս հետազոտել, որովհետև աչքս դեռ լավ չի տեսնում, փառք Աստծո հետազոտության արդյունքով լուրջ վնասվածք չեմ ստացել, բայց գլխիս հետ կապված դեռ ՄՌՏ պիտի անցեմ, եթե Աստված չանի մի բան էն չեղավ, էն ժամանակ ես իրենց հետ կխոսեմ: Դատաբժիշկը թղթերը վերցրեց, կարդաց, զարմացավ, թե էս որ թիվն է, որ մարդ են ծեծում, էն էլ՝ կնոջ: Զարմացավ, թե ինչու են կիսատ թղթերը, որտեղ են մյուս բժշկական եզրակացությունները, չէ որ ինձ առաջին բուժօգնություն են ցույց տվել, ուր են տեսախցիկների ձայնագրությունները: Ասաց` ես ուզում եմ տեսնել ոնց ես վերքը ստացել, հիմա ոնց նկարագրեմ, մենակ ոստիկանության հաղորդագրության մեջ է նշված, եւ հրաժարվեց քննիչին եզրակացություն տալ, պահանջեց քննիչից առգրավել ամբուլատոր քարտն ու  շտապօգնության թերթիկը, որ փոխանցվել է հիվանդանոցին, հետազոտությունների քաղվածքը, որպեսզի կարողանա եզրակացություն գրել, զարմացավ, թե բոլոր վերքերդ առողջացել են, նոր ուղարկում են ինձ մոտ: Էս ամենից ես հասկացա, որ տվյալ ապահովագրական ընկերությունը գործարքի է գնում մյուս կողմի հետ, դիտավորյալ ցածր գնահատելով տուժող կողմի մեքենան»: Ըստ մեր զրուցակցի քրեական գործ է հարուցվել, ինքը սպասողական վիճակում է, ակնկալում է, որ հարցաքննության կկանչվեն բոլոր նրանք, որոնց անունները ինքը նշել է: 

Նշենք, որ մենք ևս փորձեցինք կապվել նշված ապահովագրական ընկերության հետ՝ ճշտելու դեպքից մանրամասներ: « Եթե գործ կա հարուցած,դիմեք ոստիկանություն, մեր մոտ նման բան չի եղել,  չգիտենք»,-պատասխանեց ընկերության աշխատակցուհին: